ଅଜବ ଉପାୟ: ଫିଲ୍ମ ଦେଖିବା ପାଇଁ ଗାଈ ପେଟକୁ କଲେ ପରଦା, ଫଟୋ ଭାଇରାଲ୍

ନୂଆଦିଲ୍ଲୀ: ଚଳିତ ଦିନରେ ସାମାଜିକ ଗଣମାଧ୍ୟମରେ ଏକ ଫଟୋ ଖୁବ୍ ଭାଇରାଲ ହେବାରେ ଲାଗିଛି, ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି। ଆପଣମାନେ କେବେ ନା କେବେ ପ୍ରୋଜେକ୍ଟରରେ ଫିଲ୍ମ ନିଶ୍ଚିତ ଦେଖିଥିବେ। କିନ୍ତୁ ଗାଈ ପେଟରେ ସ୍କ୍ରିନ୍ କରି କେବେ ଦେଖି ନ ଥିବେ। ଆଜ୍ଞା ହଁ, ସାମାଜିକ ଗଣମାଧ୍ୟମରେ ଭାଇରାଲ୍ ହୋଇଥିବା ଫଟୋରେ ଠିକ୍ ଏହିପରି ହିଁ କିଛି ଦେଖିବାକୁ ମିଳିଛି। କିଛି ଲୋକ ଅଦ୍ଭୁତ ଉପାୟ ବାହାର କରି ଫିଲ୍ମ ଦେଖିବା ପାଇଁ ଏକ ଗାଈର ପେଟକୁ ହିଁ ସ୍କ୍ରିନ୍ କରି ଦେଇଛନ୍ତି। ଏହି ଫଟୋକୁ ଆଇପିଏସ୍ ଅଧିକାରୀ ଦୀପାଂଶୁ କାବରା ନିଜ ଟ୍ୱିଟର ଆକାଉଣ୍ଟରେ ଶେୟାର କରିଛନ୍ତି।

ଭାଇରାଲ୍ ହୋଇଥିବା ଏହି ଫଟୋରେ ଦେଖିବାକୁ ମିଳିଛି ଯେ, ଅନ୍ଧାର ରାତିରେ କିଛି ଲୋକ ପ୍ରୋଜେକ୍ଟର ଲଗାଇ ଇଂରାଜୀ ଚଳଚ୍ଚିତ୍ର ‘ଟେନେଟ୍’ ଦେଖୁଛନ୍ତି। ତେବେ ଫଟୋ ଦେଖି ଆପଣ ନିଜ ହସକୁ ଅଟକାଇ ପାରିବେ ନାହିଁ, କାରଣ ଫିଲ୍ମର ସ୍କ୍ରିନ୍କୁ ଗୋଟିଏ ଗାଈର ପେଟ ଉପରେ ଫୋକସ୍ କରାଯାଇଛି। ସାଧାରଣତଃ ପ୍ରୋଜେକ୍ଟରରେ ଫିଲ୍ମ ଦେଖିବା ପାଇଁ ଧଳା ପରଦା ଆବଶ୍ୟକ ହୋଇଥାଏ। କିନ୍ତୁ ଫଟୋରେ ନଜର ଆସୁଥିବା ଲୋକମାନଙ୍କୁ ବୋଧ ହୁଏ ପରଦା ମିଳିଲା ନାହିଁ, ସେଥିପାଇଁ ସେମାନେ ଧଳା ଗାଈକୁ ହିଁ ପରଦା କରିଦେଲେ। ତେବେ ଏହି ଫଟୋଟି କେଉଁ ସ୍ଥାନର ତାହା ଜଣାପଡ଼ିନାହିଁ କିନ୍ତୁ ଆଇପିଏସ୍ ଦୀପାଂଶୁଙ୍କ ଦ୍ୱାରା ଶେୟାର କରାଯାଇଥିବା ଏହି ଫଟୋକୁ ଲୋକେ ଖୁବ୍ ପସନ୍ଦ କରୁଥିବା ଦେଖିବାକୁ ମିଳିଛି।

 

Comments
Loading...