ଆସନ୍ତାକାଲିଠାରୁ ୨ ଦିନ ସ୍କୁଲ୍‍ ବନ୍ଦ

ଫୁଲସଜା ଗାଡ଼ି ଉପରେ ବନ୍ଦର ପ୍ରଭାବ ପଡ଼ିବ ନାହିଁ : ନିରଞ୍ଜନ

ଭୁବନେଶ୍ୱର: ଆସନ୍ତାକାଲିଠାରୁ ଦୁଇ ଦିନ ଅର୍ଥାତ୍‍ ୧୫ ଓ ୧୬ ତାରିଖ ରାଜ୍ୟର ସମସ୍ତ ସ୍କୁଲ୍‍ ବନ୍ଦ ରହିବ। ୧୫ ତାରିଖ କଂଗ୍ରେସର ବନ୍ଦ ଡାକରା ଦୃଷ୍ଟିରୁ ଏବଂ ୧୬ ତାରିଖ ସରସ୍ୱତୀ ପୂଜାରେ କରୋନା ସଂକ୍ରମଣକୁ ଦୃଷ୍ଟିରେ ରଖି ସ୍କୁଲ ବନ୍ଦ ରହିବ। ଏନେଇ ରବିବାର ସୂଚନା ଦେଇଛନ୍ତି ଗଣଶିକ୍ଷା ମନ୍ତ୍ରୀ ସମୀର ଦାସ।

ସୂଚନା ଅନୁସାରେ, ପେଟ୍ରୋଲ, ଡିଜେଲ୍ ସହ ଏଲପିଜି ଗ୍ୟାସ୍ ଦରର ଅହେତୁକ ବୃଦ୍ଧିକୁ ନେଇ ଆସନ୍ତାକାଲି କଂଗ୍ରେସ ପକ୍ଷରୁ ୬ ଘଣ୍ଟିଆ ଓଡ଼ିଶା ବନ୍ଦ ଡାକରା ଦିଆଯାଇଛି। ସକାଳ ୭ଟାରୁ ଦିନ ଗୋଟାଏ ଯାଏ ବନ୍ଦ ଡାକରା ଦେଇଛି କଂଗ୍ରେସ । ତେଣୁ ଛାତ୍ରଛାତ୍ରୀଙ୍କ ସୁରକ୍ଷା ଦୃଷ୍ଟିରୁ ଏହିଦିନ ସ୍କୁଲ ବନ୍ଦ ରଖିବାକୁ ନିର୍ଦ୍ଦେଶ ଦିଆଯାଇଛି। ସେହିଭଳି କରୋନାକୁ ଦୃଷ୍ଟିରେ ରଖି ୧୬ ତାରିଖ ସରସ୍ୱତୀ ପୂଜାରେ ସ୍କୁଲରେ ମିଳିମିଶି ଭୋଜି କରିବା, ଅଧିକ ପିଲା ଏକତ୍ରିତ ହେବା ଆଦି ଆଶଙ୍କାରେ ସ୍କୁଲ୍‍ ବନ୍ଦ ରଖିବାକୁ ନିର୍ଦ୍ଦେଶ ଦେଇଛନ୍ତି ଗଣଶିକ୍ଷା ମନ୍ତ୍ରୀ।

ଅପର ପକ୍ଷରେ, ଆସନ୍ତାକାଲି ବନ୍ଦକୁ ଶାନ୍ତିପୂର୍ଣ୍ଣ କରିବା ପାଇଁ ଆହ୍ୱାନ ଦେଇଛନ୍ତି ପିସିସି ସଭାପତି ନିରଞ୍ଜନ ପଟ୍ଟନାୟକ। ଆମ୍ବୁଲାନ୍ସ, ଜରୁରୀ ସେବାରେ ନିୟୋଜିତ ଥିବା ଯାନବାହାନ, ଔଷଧ ଦୋକାନ, ଅତ୍ୟାବଶ୍ୟକୀୟ ସେବାରେ ଥିବା ଗାଡ଼ି ଏଥିରୁ ବାଦ୍ ପଡ଼ିବ। ସେହିଭଳି ଯେଉଁ ଗାଡ଼ିରେ ଫୁଲ ସଜା ହୋଇଥିବ ଅର୍ଥାତ ବିବାହ ପାଇଁ ଯାଉଥିବା ଗାଡ଼ି କିମ୍ବା ଶବ ସତ୍କାର ପାଇଁ ଯାଉଥିବା ଗାଡ଼ିକୁ ଏଥିରୁ ବାଦ ଦିଆଯିବ।

Comments
Loading...