ଆସନ୍ତା ୨୧ ତାରିଖରୁ ଖୋଲିବ ସ୍କୁଲ: ପ୍ରଥମ ପର୍ଯ୍ୟାୟରେ ୯ମରୁ ଦ୍ବାଦଶ ଶ୍ରେଣୀ ପିଲାଙ୍କୁ ସ୍କୁଲ ଯିବାକୁ ଅନୁମତି

ନୂଆଦିଲ୍ଲୀ: ଆସନ୍ତା ସେପ୍ଟେମ୍ବର ୨୧ ତାରିଖରୁ ଖୋଲିବ ସ୍କୁଲ । ଏଥିପାଇଁ କେନ୍ଦ୍ର ସରକାର ଜାରି କରିଛନ୍ତି ମାର୍ଗଦର୍ଶିକା । କେନ୍ଦ୍ର ସରକାରଙ୍କ ସ୍ବାସ୍ଥ୍ୟ ମନ୍ତ୍ରଣାଳୟ ୯ମରୁ ଦ୍ବାଦଶ ଶ୍ରେଣୀ ପିଲାଙ୍କ ନିମନ୍ତେ ଆଂଶିକ ଭାବରେ ସ୍କୁଲ ଆରମ୍ଭ କରିବା ନିମନ୍ତେ ଏସଓପି ଜାରି କରିଛନ୍ତି । ଏହି ମାର୍ଗଦର୍ଶିକା ଅନୁସାରେ ଶିକ୍ଷକ, ଛାତ୍ର, ସ୍କୁଲର କର୍ମଚାରୀ ପ୍ରତ୍ୟେକ ଅନ୍ୟୂନ ୬ ଫୁଟ ଦୂରତା ବଜାୟ ରଖିବେ, ନିୟମିତ ହାତ ଧୋଇବେ, ମୁହଁରେ ମାସ୍କ ପିନ୍ଧିବେ ଓ କରୋନା ସଂକ୍ରାନ୍ତ ସମସ୍ତ ନିୟମକୁ ପାଳନ କରିବା ବାଧ୍ୟତାମୂଳକ । କେବଳ ସେତିକି ନୁହେଁ, ପିଲାମାନେ ସ୍କୁଲ ଆସିବା ନିମନ୍ତେ ଅଭିଭାବକଙ୍କ ଅନୁମତି ମଧ୍ୟ ନେବାକୁ ପଡ଼ିବ । ଏହା ସହ ଆଉ କିଛି ସର୍ତ ମଧ୍ୟ ଜାରି କରିଛି କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ।

୧. ସ୍କୁଲରେ ପଢ଼ା ଆରମ୍ଭ ହେଲେ ମଧ୍ୟ ଅନଲାଇନ ଓ ଦୂରଶିକ୍ଷା କାର୍ଯ୍ୟକ୍ରମ ଅବ୍ୟାହତ ରହିବ।

୨.କେବଳ ୯ମରୁ ୧୨ଶ ଶ୍ରେଣୀର ଛାତ୍ରଛାତ୍ରୀଙ୍କୁ ସ୍କୁଲ ଆସିବାକୁ କର୍ତ୍ତୃପକ୍ଷ ଅନୁମତି ଦେବେ ।

୩. ସ୍କୁଲକୁ ଆସିବା ପାଇଁ ଛାତ୍ରଛାତ୍ରୀଙ୍କୁ ଅଭିଭାବକଙ୍କଠାରୁ ଲିଖିତ ଅନୁମତି ପତ୍ର ଆଣିବାକୁ ପଡ଼ିବ

୪.କଣ୍ଟେନମେଣ୍ଟ ଜୋନରେ ରହୁଥିବା ଛାତ୍ର, ଶିକ୍ଷକ, କର୍ମଚାରୀଙ୍କୁ ସ୍କୁଲ ଆସିବାକୁ ଅନୁମତି ମିଳିବ ନାହିଁ

୫. ସ୍କୁଲ ଖୋଲିବା ପୂର୍ବରୁ ଶ୍ରେଣୀ କୋଠରୀ, ପରୀକ୍ଷାଗାର, ଶୌଚାଳୟ ଓ ପୁରା ପରିସର ଶୋଧନ ଜରୁରୀ

୬.ଯେଉଁ ସ୍କୁଲଗୁଡ଼ିକ କ୍ବାରେଣ୍ଟାଇନ ସେଣ୍ଟର ହୋଇଥିଲା, ସେଠାରେ ଅଧିକ ଭଲ ଭାବରେ ଶୋଧନ କରାଯିବ