ଭୁବନେଶ୍ବର: ବିଦ୍ୟାଳୟ ରୂପାନ୍ତରୀକରଣ ଯୋଜନା ପାଇଁ ଏକ ସ୍ବତନ୍ତ୍ର ବୈଠକ ଅନୁଷ୍ଠିତ ହୋଇଯାଇଛି। ଉଚ୍ଚ ବିଦ୍ୟାଳୟ ରୂପାନ୍ତରୀକରଣ କାର୍ଯ୍ୟକ୍ରମ ଅଧୀନରେ ନୂତନ ଭାବେ ୮୮୯ ବିଦ୍ୟାଳୟ ପାଇଁ ୫୩୩ କୋଟି ୪୦ ଲକ୍ଷ ଟଙ୍କାର ପ୍ରକଳ୍ପକୁ ଓମ୍ବାଡିସି ପରିଷଦ ପକ୍ଷରୁ ମଞ୍ଜୁରୀ ମିଳିଛି। ସମିତି ଦ୍ୱାରା ଏନେଇ ପ୍ରସ୍ତାବ ଗୃହୀତ ହୋଇଛି।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦେଶକ୍ରମେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର, ଉନ୍ନୟନ କମିସନର ପ୍ରଦୀପ କୁମାର ଜେନା, ଅର୍ଥ ବିଭାଗ ସଚିବ ବିଶାଲ ଦେବ, ଓମ୍ବାଡିସିର ମୁଖ୍ୟନିର୍ବାହୀ ଅଧିକାରୀ ଉମାନାନ୍ଦୁରୀ ଓ ଗଣଶିକ୍ଷା ପ୍ରମୁଖ ସଚିବ ସତ୍ୟବ୍ରତ ସାହୁଙ୍କ ଉପସ୍ଥିତିରେ ଏହି ବୈଠକ ହୋଇଥିଲା। ପ୍ରତି ବିଦ୍ୟାଳୟ ପାଇଁ ୬୦ ଲକ୍ଷ ଟଙ୍କାର ବ୍ୟୟ ଅଟକଳ କରିବାକୁ ନିଷ୍ପତ୍ତି ନିଆଯାଇଛି।
ଅନୁଗୋଳ ଜିଲାର ୧୬ଟି ସ୍କୁଲ ପାଇଁ ୯ କୋଟି ୬୦ ଲକ୍ଷ ଟଙ୍କା, ଦେବଗଡ଼ର ୪୭ ସ୍କୁଲ ପାଇଁ ୨୮ କୋଟି ୨୦ ଲକ୍ଷ, ଢେଙ୍କାନାଳ ଜିଲାର ୧୭ଟି ସ୍କୁଲ ପାଇଁ ୧୦ କୋଟି ୨୦ ଲକ୍ଷ, ଯାଜପୁର ଜିଲାର ୧୯୫ ସ୍କୁଲ ପାଇଁ ୧୧୭ କୋଟି, ଝାରସୁଗୁଡ଼ା ଜିଲାର ୮୦ଟି ସ୍କୁଲ ପାଇଁ ୪୮ କୋଟି, ମୟୂରଭଞ୍ଜ ଜିଲାର ୩୩୯ଟି ସ୍କୁଲ ଲାଗି ୨୦୩ କୋଟି ୪୦ ଲକ୍ଷ ଓ ସୁନ୍ଦରଗଡ଼ ଜିଲାର ୧୯୫ଟି ସ୍କୁଲ ପାଇଁ ୧୧୭ କୋଟି ଟଙ୍କା ହାଇସ୍କୁଲ ରୂପାନ୍ତରୀକରଣ ପାଇଁ ଅର୍ଥ ମଞ୍ଜୁର କରାଯାଇଛି। ଆଦିବାସୀ ଓ ଉପାନ୍ତ ଅଞ୍ଚଳର ଥିବା ଛାତ୍ରଛାତ୍ରୀ ଏହାଦ୍ବାରା ଉତ୍କୃଷ୍ଟ ଶିକ୍ଷା ପାଇପାରିବେ।
ଏହି ବିଦ୍ୟାଳୟରେ ଅତ୍ୟାଧୁନିକ ସ୍ମାର୍ଟ ଶ୍ରେଣୀଗୃହ, ବିଜ୍ଞାନାଗାର, ଇ-ପାଠାଗାର, ସ୍କୁଲ ପରିବେଶର ଉନ୍ନତିକରଣ, ପୁରାତନ ଛାତ୍ର ସଂଘ ଓ ସ୍କୁଲ ପରିଚାଳନା କମିଟି ଦ୍ୱାରା ସ୍କୁଲ ପରିଚାଳନା ଓ ପିଲାଙ୍କ ଦକ୍ଷତା ବିକାଶ ପରିଚାଳନା ଅର୍ଥରୁ ଭରଣା କରାଯିବ ବୋଲି ବିଭାଗ ପକ୍ଷରୁ କୁହାଯାଇଛି। ସେହିପରି ସ୍ମାର୍ଟବୋର୍ଡ, ଡିଜିଟାଲ ଶ୍ରେଣୀଗୃହ ପାଇଁ ଆବଶ୍ୟକ ଉପକରଣ ପରି ଆଇସିଟି ଉପକରଣ ଅର୍ଥ ଖର୍ଚ୍ଚ ହେବ। ଗୋଷ୍ଠୀ ସମ୍ପୃକ୍ତୀକରଣ ଓ ପୁରାତନ ଛାତ୍ରଛାତ୍ରୀଙ୍କ ସହ ସ୍କୁଲ କମିଟିର ଯୋଗାଯୋଗ ମାଧ୍ୟମରେ ଏହି କାର୍ଯ୍ୟକ୍ରମଗୁଡ଼ିକର ଚୂଡ଼ାନ୍ତ ରୂପରେଖ ପ୍ରସ୍ତୁତ କରାଯିବ।
Comments are closed.