ବିଦ୍ୟାଳୟ ଓ ଗଣଶିକ୍ଷା ବିଭାଗ: ନ୍ୟାୟାଳୟରେ ବିଚାରାଧୀନ ରହିଛି ୨୯ ହଜାର ୬୪୪ ଗୋଟି ମାମଲା

ଅଦାଲତଗୁଡ଼ିକରେ ଥିବା ମକଦ୍ଦମାର ସ୍ଥିତି ସଂପର୍କରେ ବିଦ୍ୟାଳୟ ଓ ଗଣଶିକ୍ଷା ବିଭାଗ ସଚିବଙ୍କ ସମୀକ୍ଷା

ଭୁବନେଶ୍ୱର: ବିଦ୍ୟାଳୟ ଓ ଗଣଶିକ୍ଷା ବିଭାଗର ବର୍ତ୍ତମାନ ବିଭିନ୍ନ ନ୍ୟାୟାଳୟରେ ୨୯ ହଜାର ୬୪୪ ଗୋଟି ମାମଲା ବିଚାରାଧୀନ ଅଛି। ବିଗତ ୨୦୧୮ ମସିହାରୁ ଇଣ୍ଟିଗ୍ରେଟେଡ୍‌ ଲିଗାଲ୍‌ ମନିଟରିଂ ସିଷ୍ଟମ୍‌ (ଆଇଏଲ୍‌ଏମ୍‌ଏସ୍‌) ଜରିଆରେ ବିଭିନ୍ନ କେଶଗୁଡ଼ିକରେ ରିଅଲ୍‌ ଟାଇମ୍‌ ଷ୍ଟାଟସ୍‌, ବ୍ଲକ୍‌ ଶିକ୍ଷା ଅଧିକାରୀଠାରୁ ବିଭାଗ ପର୍ଯ୍ୟନ୍ତ ଅପ୍‌ଡେଟ୍‌କରାଯାଉଛି। ଏହି ସମୟୋଚିତ ପଦକ୍ଷେପ ଯୋଗୁଁ ବିଭାଗର କେଶ୍‌ ସଂଖ୍ୟା ମାତ୍ର ଦୁଇ ବର୍ଷ ମଧ୍ୟରେ ୬୫ ହଜାରରୁ ୨୯ ହଜାର ୬୪୪କୁ କମାଯାଇ ପାରିଛି। ମାତ୍ର ଗତ ସପ୍ତାହରେ କିଛି ଅଧିକାରୀଙ୍କର ଅବହେଳା ବଶତଃ ଅଦାଲତ ଅସନ୍ତୋଷ ପ୍ରକାଶ କରିଥିଲେ। ଏହାକୁ ଗୁରୁତ୍ୱର ସହ ବିଚାରକୁ ନେଇ ବିଭାଗୀୟ ସଚିବ ସତ୍ୟବ୍ରତ ସାହୁ ସମସ୍ତ ବିଭାଗୀୟ ପଦାଧିକାରୀ, ସରକାରୀ ଓକିଲ ଓ ଜିଲ୍ଲା ଶିକ୍ଷାଧିକାରୀମାନଙ୍କର ସାପ୍ତାହିକ ବୈଠକ କରିବାକୁ ନିଷ୍ପତ୍ତି ନେଇଥିଲେ। ସେହି ନିଷ୍ପତ୍ତି ଅନୁସାରେ ନଭେମ୍ବର ୮ରେ ଭର୍ଚୁଆଲ୍‌ ମୋଡ୍‌ରେ ଏକ ବୈଠକ କରାଯାଇଥିଲା। ସଚିବ ସତ୍ୟବ୍ରତ ସାହୁଙ୍କ ସମୀକ୍ଷା ସମୟୋପଯୋଗୀ ହୋଇଥିବାରୁ ବିଭାଗର ମକଦ୍ଦମା ପରିଚାଳନା ଠିକ୍‌ ଭାବେ କରାଯିବ ବୋଲି ବିଦ୍ୟାଳୟ ଓ ଗଣଶିକ୍ଷା ବିଭାଗ ସୂତ୍ରରୁ ପ୍ରକାଶ କରାଯାଇଛି।
ଏହି ଅବସରରେ ବିଦ୍ୟାଳୟ ଓ ଗଣଶିକ୍ଷା ବିଭାଗର ପ୍ରମୁଖ ଶାସନ ସଚିବ ସତ୍ୟବ୍ରତ ସାହୁ କହିଥିଲେ ଯେ ଠିକ୍‌ ସମୟରେ ର ଅଦାଲତଙ୍କ ରାୟକୁ କାର୍ଯ୍ୟକାରୀ କରିବାକୁ ଅଗ୍ରାଧିକାର ଦିଆଯିବ। ଆବଶ୍ୟକସ୍ଥଳେ ଆଇନ ବିଭାଗର ମତାମତ ନେଇ ପରବର୍ତ୍ତୀ ପଦକ୍ଷେପ ନିଆଯିବ। ଯେଉଁ ଅଧିକାରୀମାନେ ମକଦ୍ଦମାଗୁଡ଼ିକୁ ବିଳମ୍ବରେ ଉପସ୍ଥାପନ କରୁଛନ୍ତି ସେମାନଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏଥି ସହିତ ସରକାରଙ୍କ ‘ମୋ ସରକାର’ ଅଭିଯାନର ନିର୍ଦ୍ଦେଶାନୁଯାୟୀ ସରକାରୀ କାର୍ଯ୍ୟ କରୁନଥିବା ଓ କର୍ତ୍ତବ୍ୟରେ ଅବହେଳା କରୁଥିବା କର୍ମଚାରୀଙ୍କୁ ବରଖାସ୍ତ କରାଯିବ ଓ ଭଲ କାମ କରୁଥିବା ଅଧିକାରୀଙ୍କୁ ସମୟ ଆଗରୁ ପଦୋନ୍ନତି ଦିଆଯିବ ବୋଲି ସଚିବ ଶ୍ରୀ ସାହୁ ପ୍ରକାଶ କରିଥିଲେ।

Comments
Loading...