ନୂଆଦିଲ୍ଲୀ : ଏକ ଆୟ ବହିର୍ଭୁତ ସମ୍ପତ୍ତି ଠୁଳ ମାମଲାରେ ଦିଲ୍ଲୀ ଆପ୍ ସରକାରଙ୍କର ସ୍ୱାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର କୁମାର ଜୈନଙ୍କୁ ଜେରା କରିବାପାଇଁ କେନ୍ଦ୍ର ସରକାର ସିବିଆଇକୁ ଅନୁମତି ପ୍ରଦାନ କରିଛନ୍ତି। ୨୦୧୭ ଅଗଷ୍ଟ ମାସରେ ସିବିଆଇ ରୁଜ୍ଜୁ କରିଥିବା ଏକ ମାମଲାରେ ଶ୍ରୀ ଜୈନ୍ଙ୍କୁ ଜେରା କରିବାଲାଗି ସ୍ୱରାଷ୍ଟ୍ର ମନ୍ତ୍ରଣାଳୟ ଅନୁମତି ପ୍ରଦାନ କରିଛି। ଶ୍ରୀ ଜୈନ ସରକାରରେ ଥାଇ ପ୍ରଚୁର ପରିମାଣର ଆୟ ବହିର୍ଭୁତ ସମ୍ପତ୍ତି ଠୁଳ କରିଥିବା ଅଭିଯୋଗ ରହିଛି। ୨୦୧୫ ଫେବୃୟାରୀ ମାସଠାରୁ ଗତବର୍ଷ ମେ’ ମାସ ମଧ୍ୟରେ ସେ ୧ କୋଟି ୬୨ ଲକ୍ଷ ଟଙ୍କାର ସମ୍ପତ୍ତି ଠୁଳ କରିଛନ୍ତି। ସିବିଆଇ କହିଛି, ତଦନ୍ତବେଳେ ଶ୍ରୀ ଜୈନ୍ ଓ ତାଙ୍କର କିଛି ସହଯୋଗୀ ୪ କୋଟି ୬୩ ଲକ୍ଷ ଟଙ୍କାର କଳାଧନକୁ ଆଇନସମ୍ମତ କରିଥିଲେ ବୋଲି ଜଣାପଡ଼ିଛି। ୨୦୧୫-୧୬ରେ ଦିଲ୍ଲୀରେ ବହୁ ନକଲି କମ୍ପାନୀ ପ୍ରତିଷ୍ଠା କରି ସେମାନେ ଏଭଳି କଳାଧନକୁ ଆଇନସମ୍ମତ କରିଥିଲେ।
