ନୂଆଦିଲ୍ଲୀ : ଅନୁବାଦ ସାହିତ୍ୟ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଓଡ଼ିଆ ସାହିତ୍ୟିକା ଶ୍ରଦ୍ଧାଞ୍ଜଳି କାନୁନଗୋଙ୍କୁ କେନ୍ଦ୍ର ସାହିତ୍ୟ ଅକାଦେମୀ ପୁରସ୍କାର ୨୦୧୮ ପାଇଁ ମନୋନୀତ କରାଯାଇଛି। ଓଡ଼ିଆ ଭାଷାରେ ଅନୁବାଦିତ ପୁସ୍ତକ ‘ଶ୍ରୀମୟୀ ମା’ ପାଇଁ ଶ୍ରଦ୍ଧାଞ୍ଜଳି କାନୁନଗୋ କେନ୍ଦ୍ର ସାହିତ୍ୟ ଅକାଦେମୀ ଅନୁବାଦ ସାହିତ୍ୟ ପୁରସ୍କାର ପାଇବେ। ମୂଳ ରଚୟିତା ନବ କୁମାର ବସୁଙ୍କ ବଙ୍ଗଳା ଭାଷାରେ ରଚନା ଶ୍ରୀମୟୀ ମା’କୁ ଶ୍ରଦ୍ଧାଞ୍ଜଳି ଓଡ଼ିଆ ଭାଷାରେ ଅନୁବାଦ କରିଛନ୍ତି। ଚଳିତ ବର୍ଷ ସମୁଦାୟ ୨୪ଟି ଭାରତୀୟ ଭାଷାରେ ଅନୁବାଦ ସାହିତ୍ୟ ପୁରସ୍କାର ଘୋଷଣା କରାଯାଇଛି। ବର୍ଷ ଶେଷ ଆଡ଼କୁ ଏକ ସ୍ୱତନ୍ତ୍ର ଉତ୍ସବରେ ପୁରସ୍କାର ଆକାରରେ ପଚାଶ ହଜାର ଟଙ୍କା ଏବଂ ଏକ ତାମ୍ର ଫଳକ ଦିଆଯାଇ କୃତୀ ସାହିତ୍ୟିକଙ୍କୁ ସମ୍ମାନୀତ କରାଯିବ ବୋଲି ଅକାଦେମୀର ଅଧ୍ୟକ୍ଷ ଡକ୍ଟର ଚନ୍ଦ୍ରଶେଖର କାମ୍ବର ଏକ ସାମ୍ବାଦିକ ସମ୍ମିଳନୀରେ ଜଣାଇଛନ୍ତି। କେନ୍ଦ୍ର ସାହିତ୍ୟ ଅକାଦେମୀ ଓଡ଼ିଆ ଭାଷା ଅନୁବାଦ ପୁରସ୍କାର ଚୟନ କମିଟି ସଦସ୍ୟ ଭାବେ ଶ୍ରୀମତୀ ଗାୟତ୍ରୀ ସରାଫ, ପ୍ରଫେସର କାଳିଦାସ ମିଶ୍ର ଓ ଡକ୍ଟର ସଂଗ୍ରାମ ଜେନା ରହିଥିଲେ।
