ମହାରାଷ୍ଟ୍ର ରାଜନୀତି ସରିଲା, ଏବେ ଗୋଆରେ ଚମତ୍କାର ହେବ: ଶିବସେନା

ମୁମ୍ବଇ: ମହାରାଷ୍ଟ୍ରରେ ସରକାର ଗଠନ ପରେ ଏବେ ଶିବସେନାର ନଜର ବିଜେପି ଶାସିତ ଗୋଆ ଉପରେ ପଡ଼ିଛି। ଗୋଆରେ ଅଣ ବିଜେପି ସରକାର ଗଠନ କରିବା ନେଇ ଶିବସେନା ସଙ୍କେତ ଦେଇଛି। ଶିବସେନା ନେତା ସଞ୍ଜୟ ରାଉତ କହିଛନ୍ତି, ମହାରାଷ୍ଟ୍ର ରାଜନୀତି ଶେଷ ହୋଇଛି। ଏବେ ଆମ ନଜର ଗୋଆ ଉପରେ ଅଛି। ଆମେ ସମ୍ପୂର୍ଣ୍ଣ ଦେଶରେ ଅଣବିଜେପି ସରକାର ଆଣିବାକୁ ଚାହୁଁଛୁ। ମହାରାଷ୍ଟ୍ରରୁ ଏହାର ଆରମ୍ଭ ହୋଇଛି। ଏବେ ଆମ ନଜର ଗୋଆ ଉପରେ ଅଛି। ଗୋଆ ପରେ ସମ୍ପୂର୍ଣ୍ଣ ଦେଶକୁ ଏହା ବ୍ୟାପ୍ତ କରାଯିବ।

ସଞ୍ଜୟ ରାଉତ କହିଛନ୍ତି ଯେ, ୩ ବିଧାୟକଙ୍କ ସହିତ ଗୋଆ ଫରୱାର୍ଡ ପାର୍ଟି ଶିବସେନା ସହିତ ମେଣ୍ଟ କରିବାକୁ ଯାଉଛନ୍ତି। ଗୋଆରେ ଏକ ନୂଆ ରାଜନୈତିକ ମୋର୍ଚ୍ଚା ବିସ୍ତାର ହେଉଛି। ମହାରାଷ୍ଟ୍ରରେ ଯେପରି ସରକାର ଗଠନ କରାଗଲା, ଠିକ୍‌ ସେହିପରି ଗୋଆରେ ଚମତ୍କାର ହେବ। ଗୋଆ ଫରୱାର୍ଡ ପାର୍ଟିର ବିଜୟ ସରଦେଶାଇ କହିଛନ୍ତି, ମହାରାଷ୍ଟ୍ରରେ ଯାହା ହେଲା, ତାହା ଗୋଆରେ ବି ହେବା ଦରକାର। ବିରୋଧୀ ଏକାଠି ହେବାକୁ ପଡ଼ିବ। ମୁଁ ସଞ୍ଜୟ ରାଉତଙ୍କୁ ଭେଟିଛି। ମହା ବିକାଶ ଅଘାଡୀ ଗଠନ କରାଯାଇଛି, ଯାହାକୁ ଗୋଆ ପର୍ଯ୍ୟନ୍ତ ବି ବିସ୍ତାର କରାଯିବା ଆବଶ୍ୟକ।

ସୂଚନାଯୋଗ୍ୟ, ଗୋଆରେ ବର୍ତ୍ତମାନ ବିଜେପି ସରକାର ରହିଛି। ୪୦ ସଦସ୍ୟ ବିଶିଷ୍ଟ ଗୋଆ ବିଧାନସଭା ପାଇଁ ୨୦୧୭ରେ ହୋଇଥିବା ନିର୍ବାଚନରେ ବିଜେପିକୁ ୧୩, କଂଗ୍ରେସକୁ ୧୭ ଆସନ ମିଳିଥିଲା। ଏହା ବ୍ୟତୀତ ମହାରାଷ୍ଟ୍ରବାଦୀ ଗୋମାନ୍ତକ ପାର୍ଟିକୁ ୩, ଗୋଆ ଫରୱାର୍ଡ ପାର୍ଟିକୁ ୩ ଏବଂ ଏନସିପି ଗୋଟିଏ ଆସନ ହାତେଇଥିଲା। ଅନ୍ୟ ୩ଟି ଆସନରେ ସ୍ବାଧୀନ ପ୍ରାର୍ଥୀ ବିଜୟୀ ହୋଇଥିଲେ। ନିର୍ବାଚନ ପରେ ରାତାରାତି ୧୦ କଂଗ୍ରେସ ବିଧାୟକ ବିଜେପିରେ ସାମିଲ ହୋଇଯାଇଥିଲେ। ଫଳରେ ବିଜେପି ଏଠାରେ ସରକାର ଗଠନ କରିଥିଲା। ବିଜେପି ନେତା ମନୋହର ପାରିକର ମୁଖ୍ୟମନ୍ତ୍ରୀ ହୋଇଥିଲେ। ତାଙ୍କ ନିଧନ ପରେ ପ୍ରମୋଦ ସାୱନ୍ତ ମୁଖ୍ୟମନ୍ତ୍ରୀ ହୋଇଛନ୍ତି।

Comments are closed.