ରେମେଡ ଅଞ୍ଚଳର ବିଭିନ୍ନ ସମସ୍ୟାର ସମାଧାନ ପାଇଁ ଦାବି 

ସମ୍ବଲପୁର : ସମ୍ବଲପୁର ମହାନଗର ନିଗମ ଭାବରେ ଗଠିତ ହେବା ଦିନଠାରୁ ୭ ବର୍ଷ ବିତିଯିବା ସତ୍ତ୍ବେ ଏ ପର୍ଯ୍ୟନ୍ତ ନିଗମ ନିର୍ବାଚନ ହୋଇ ନ ଥିବାରୁ ଲୋକେ ଜନପ୍ରତିନିଧିଟିଏ ପାଇ ପାରି ନ ଥିବାରୁ ସେମାନଙ୍କର ଅଞ୍ଚଳର ସମସ୍ୟାଗୁଡିକୁ ପ୍ରଶାସନ ସମ୍ମୁଖରେ ସଠିକ ଭାବରେ ଉପସ୍ଥାପନ କରି ପାରୁ ନାହାନ୍ତି। ଏବେ ନିଗମ ସମ୍ପୂର୍ଣ୍ଣ ରୂପେ ସରକାରୀ ବାବୁମାନଙ୍କ ଦ୍ୱାରା ପରିଚାଳିତ ହେଉଥିବାରୁ ସାଧାରଣ ଜନତାଙ୍କ ସମସ୍ୟା ଶୁଣିବାକୁ ବେଳ ନ ଥିବାବେଳେ ଅନେକ ସମୟରେ ଲୋକେ ସେମାନଙ୍କ ନିକଟକୁ ପହଞ୍ଚି ପାରୁ ନାହାନ୍ତି। ଏଭଳି କ୍ଷେତ୍ରରେ ନିଗମ ଅର୍ନ୍ତଗତ ଅଞ୍ଚଳରେ ନାଳ, ଶୌଚାଳୟ, ବିଶୁଦ୍ଧ ପାନୀୟ ଜଳ, ପରିମଳ, ରାସ୍ତାଘାଟ ଆଦି ସର୍ବନିମ୍ନ ସୁବିଧା ପାଇବାରୁ ଲୋକେ ବଞ୍ଚିତ ହୋଇ ନିଜକୁ ଠକେଇର ଶିକାର ହୋଇଥିବାର ଅନୁଭବ କରୁଛନ୍ତି। ନିଗମ ଅଧିନସ୍ଥ ୱାର୍ଡ ନଂ ୧୪ ଅର୍ନ୍ତଗତ ରେମେଡ ଅଞ୍ଚଳରେ ରାସ୍ତାଘାଟ, ନାଳ ସମେତ ଶୌଚାଳୟର ଗୁରୁତର ସମସ୍ୟା ଲାଗି ରହିଛି। ଅଞ୍ଚଳବାସୀଙ୍କର ଅନେକ ବାର ଦାବି ସତ୍ତ୍ବେ ଏ ପର୍ଯ୍ୟନ୍ତ କୌଣସି ସୁଫଳ ମିଳି ପାରି ନାହିଁ। ଏଣୁ ସୋମବାର ସ୍ୱେଚ୍ଛାସେବୀ ଅନୁଷ୍ଠାନ ଟିମ୍ ସିଦ୍ଧୁ ସାହା ସମ୍ବଲପୁରର ସଦସ୍ୟମାନଙ୍କ ସହିତ ଅଞ୍ଚଳବାସୀ ଉପ ମହାନଗର ନିଗମ କମିଶନର ରବିନ୍ଦ୍ର କୁମାର ପଟେଲଙ୍କୁ ସାକ୍ଷାତକାର କରି ଏକ ଦାବିପତ୍ର ପ୍ରଦାନ କରିଛନ୍ତି। ଅଞ୍ଚଳରେ ସ୍ୱଚ୍ଛ ଓ ନିର୍ମଳ ପରିବେଶ ପାଇଁ ଶୌଚାଳୟର ନିତାନ୍ତ ଆବଶ୍ୟକତା ରହିଥିବାବେଳେ ନାଳ, ପାନୀୟ ଜଳ ଓ ରାସ୍ତାଘାଟର ବିଶେଷ ଅସୁବିଧା ରହିଥିବାର ଉପ କମିଶନର ପଟେଲଙ୍କୁ ଜଣାଇ ସମାଧାନ ପାଇଁ ଅନୁରୋଧ କରିଥିଲେ। ଉପ କମିଶନର ପଟେଲ ଏହି ବିଷୟରେ ଶିଘ୍ର ଧ୍ୟାନ ଦିଆଯାଇ ବିହିତ ପଦକ୍ଷେପ ନିଆଯିବ ବୋଲି ଅଞ୍ଚଳବାସୀଙ୍କୁ ପ୍ରତିଶୃତି ଦେଇଛନ୍ତି। ସାକ୍ଷାତକାର ସମୟରେ ଟିମ୍ ସିଦ୍ଧୁ ସାହାର ସଦସ୍ୟ ଭଗତ ସାକ୍ଷୀପଡା, ସୁବାଶିଷ ପଣ୍ଡା, ଲୋକେଶ ପାଣ୍ଡେ, ସୌରଭ ପ୍ରଧାନ, ଜଫର ଖାନ, ରୋହିତ ବେହେରାଙ୍କ ସମେତ ଅଞ୍ଚଳର ଅନେକ ବରିଷ୍ଠ ମହିଳା, ଯୁବକମାନେ ଉପସ୍ଥିତ ରହିଥିଲେ।

Comments
Loading...