କଟକ : ଦୀପାବଳିରେ ବାଣଫୁଟା ଓ ବିକ୍ରି ଉପରେ ଅଲ ଓଡ଼ିଶା ଫାୟାର ୱାର୍କସ ଡିଲରସ ଆସୋସିଏସନର ପକ୍ଷରୁ ଦାୟର ଆବେଦନ ଉଚ୍ଚ ନ୍ୟାୟାଳୟ ଦ୍ବାରା ଅଗ୍ରାହ୍ୟ ହୋଇଛି। ମୁଖ୍ୟ ବିଚାରପତି ଡକ୍ଟର ଜଷ୍ଟିସ ଏସ.ମୁରଲୀଧର ଓ ଜଷ୍ଟିସ ବି.ପି.ରାଉତରାୟଙ୍କୁ ନେଇ ଗଠିତ ଖଣ୍ଡପୀଠ ଚଳିତ ବର୍ଷ ବାଣ ଫୁଟାଇବା ଓ ବିକ୍ରି ଉପରେ ରାଜ୍ୟ ସରକାର ଜାରି କରିଥିବା କଟକଣାକୁ ବିରୋଧ କରି ଦାୟର ମାମଲାରେ ଶୁଣାଣି କରି ଏହା ଏକ ରେଜିଷ୍ଟ୍ରଭୁକ୍ତ ସଙ୍ଗଠନ ହୋଇ ନଥିବାରୁ ଆବେଦନ ଅଗ୍ରାହ୍ୟ କରିଛନ୍ତି। ତେବେ ଆବେଦନକାରୀ ସାନି ଆବେଦନ କରି ପାରିବେ ବୋଲି ଦର୍ଶାଇ ଆବେଦନକାରୀଙ୍କୁ ସ୍ୱାଧୀନତା ଦେଇଛନ୍ତି ଉଚ୍ଚ ନ୍ୟାୟାଳୟ। ଅଲ୍ ଓଡ଼ିଶା ଫାୟାର ୱାର୍କସ୍ ଡିଲର ଆସୋସିଏସନ୍ ପକ୍ଷରୁ ଦାୟର ଏ ସମ୍ପର୍କିତ ଆବେଦନରେ ଉଲ୍ଲେଖ କରାଯାଇଥିଲା ଯେ ରାଜ୍ୟରେ କରୋନା ସଂକ୍ରମଣ ସ୍ଥିତିରେ ସୁଧାର ଆସିଛି ବୋଲି ସରକାର ସ୍ବୀକାର କରିବା ସହିତ ବିଭିନ୍ନ କ୍ଷେତ୍ରକୁ କଟକଣା ମୁକ୍ତ କରିଛନ୍ତି। ବିଭାଘର, ବ୍ରତଘର, ଅନ୍ତିମ ସଂସ୍କାରଠାରୁ ଆରମ୍ଭ କରି ବିଭିନ୍ନ କାର୍ଯ୍ୟକ୍ରମ ପାଇଁ କଟକଣା କୋହଳ କରାଯାଇଛି; କିନ୍ତୁ ସବୁ କଟକଣା କୋହଳ କରାଯାଉଥିବା ବେଳେ ବାଣ ଉପରେ ଏଭଳି ନିଷେଧାଦେଶ ଜାରି କରାଯାଇଛି। ଏଭଳି କରାଯିବା ଗ୍ରହଣୀୟ ନୁହେଁ। ଦୀପାବଳିରେ ବାଣ ଫୁଟାଇବା ଏକ ପୁରାତନ ପରମ୍ପରା ଓ ଲୋକଙ୍କ ଭାବନା ସହିତ ଜଡ଼ିତ। ବାଣ ପ୍ରସ୍ତୁତିଠାରୁ ଆରମ୍ଭ କରି ବିକ୍ରିୟ କରି ଶତାଧିକ ଲୋକ ପରିବାର ଚଳାଇଥାନ୍ତି। ବାଣ ରାଜ୍ୟ ବାହାରରୁ ମଧ୍ୟ ଆସିଥାଏ। ଏଥିପାଇଁ ବହୁ ଆଗରୁ ବ୍ୟବସାୟୀ ଅଗ୍ରିମ ଦେଇଥାନ୍ତି। ବର୍ତ୍ତମାନ ହଠାତ ବାଣ ବିକ୍ରି ଓ ଫୁଟାଇବା ଉପରେ କଟକଣା ଜାରି ଦ୍ବାରା ବଡ଼ ଛୋଟ ବ୍ୟବସାୟୀମାନେ ବ୍ୟାପକ ସମସ୍ୟାର ସମୁଖୀନ ହେଉଛନ୍ତି। ଏଭଳି ସ୍ଥିତିରେ ବାଣ ବିକ୍ରି ଓ ଫୁଟାଇବା ପାଇଁ ଦୀପାବଳିରେ ଅନୁମତି ଦିଆଯାଉ ବୋଲି ଆବେଦନରେ ଦର୍ଶାଯାଇଥିଲା। ଏହି ମାମଲାରେ କେନ୍ଦ୍ର ସରକାରଙ୍କ ସହିତ ରାଜ୍ୟ ସ୍ବତନ୍ତ୍ର ରିଲିଫ କମିସନର, ପ୍ରଦୂଷଣ ନିୟନ୍ତ୍ରଣ ବୋର୍ଡକୁ ପକ୍ଷଭୁକ୍ତ କରାଯାଇଥିଲା।
ଗତ ସେପ୍ଟେମ୍ବର ୩୦ରେ ସରକାର ନୂଆ ନିୟମାବଳୀ ଜାରି କରି ଚଳିତ ବର୍ଷ ଦୀପାବଳି ଓ ପାର୍ବଣରେ ବାଣି ବିକ୍ରି ହେବନି କି ଫୁଟିବନି ବୋଲି ସ୍ପଷ୍ଟ କରିଥିଲେ। ଜନସାଧାରଣଙ୍କ ସ୍ବାସ୍ଥ୍ୟର ସୁରକ୍ଷା ଓ କରୋନା ସଂକ୍ରମଣ ଉପରେ ଅଙ୍କୁଶ ପାଇଁ ଏପରି କଟକଣା ଜାରି କରାଯାଇଥିବା କୁହାଯାଇଥିଲା; କିନ୍ତୁ ବିଭିନ୍ନ କ୍ଷେତ୍ରକୁ କଟକଣାମୁକ୍ତ କରାଯାଇଥିବାବେଳେ ବାଣ ଉପରେ କଟକଣାକୁ ନେଇ ପ୍ରଶ୍ନ ଉଠିଥିଲା।
Comments are closed.