ବୀରେନ୍ଦ୍ରଙ୍କୁ କେନ୍ଦ୍ର ସାହିତ୍ୟ ଅକାଦେମି ପୁରସ୍କାର

0

ପୁରୀ : ଶିଶୁ ସାହିତ୍ୟିକ ବୀରେନ୍ଦ୍ର ମହାନ୍ତିଙ୍କୁ ଶିଶୁ କବିତା ସଂକଳନ ‘ରୁମ୍‍କୁ ଝୁମା’ ନିମନ୍ତେ ଗୁରୁବାର କେନ୍ଦ୍ର ସାହିତ୍ୟ ଅକାଦେମି ପୁରସ୍କାର ପ୍ରଦାନ କରାଯାଇଛି।
ସିକିମର ଗ୍ୟାଙ୍ଗଟକରେ ଅନୁଷ୍ଠିତ ସ୍ୱତନ୍ତ୍ର ଉତ୍ସବରେ ଅକାଦେମିର ସଭାପତି ଚନ୍ଦ୍ରଶେଖର କମ୍ବର ସଭାପତିତ୍ୱ କରିଥିଲେ। ବିଶିଷ୍ଟ ଆସାମୀ କବି ନାଗେନ ସାଇକିଆ ମୁଖ୍ୟ ଅତିଥି ଭାବେ ଯୋଗଦେଇ ଶ୍ରୀ ମହାନ୍ତିଙ୍କୁ ତାମ୍ରଫଳକ ସମେତ ୫୦ହଜାର ଟଙ୍କା ପ୍ରଦାନ କରିଛନ୍ତି। ଅକାଦେମି ଉପସଭାପତି ମାଧବ କୌଶିକଙ୍କ ସମେତ ଦେଶର ବହୁ ଲବ୍ଧପ୍ରତିଷ୍ଠ ସାହିତ୍ୟିକ ସେଥିରେ ଉପସ୍ଥିତ ଥିଲେ। ଶ୍ରୀ ମହାନ୍ତିଙ୍କ ଉଚ୍ଚକୋଟୀର ଶିଶୁସାହିତ୍ୟ ରଚନା ସମ୍ପର୍କରେ ବକ୍ତାମାନେ ପ୍ରଶଂସା କରିଥିଲେ।
ଓଡ଼ିଶା ସାହିତ୍ୟ ଏକାଡେମୀ ସଭ୍ୟ ଥିବା ଶ୍ରୀ ମହାନ୍ତି ସମ୍ମିଳିତ ପୁରୀ-ନିମାପଡ଼ା କେନ୍ଦ୍ର ସମବାୟ ବ୍ୟାଙ୍କର ମ୍ୟାନେଜରଭାବେ କାର୍ଯ୍ୟ କରୁଛନ୍ତି। ତାଙ୍କ ଦ୍ୱାରା ରଚିତ ଅନେକ ଶିଶୁ ସାହିତ୍ୟ ପାଠକୀୟ ଆଦୃତି ଲାଭ କରିଛି। ତାଙ୍କ ଘର ପୁରୀ ଅଠରନଳା ନିକଟସ୍ଥ ନୀଳଚକ୍ର ନଗରରେ। ସୂଚନାଯୋଗ୍ୟ, ଯୁବକବି ଜୟଦ୍ରଥ ସୁନା ମଧ୍ୟ ‘ଶୋଷ’ ପୁସ୍ତକ ପାଇଁ କେନ୍ଦ୍ର ସାହିତ୍ୟ ଅକାଦେମି ଯୁବ ପୁରସ୍କାର ପ୍ରାପ୍ତ ହୋଇଛନ୍ତି।

Leave A Reply