ନୱାଜ ସରିଫଙ୍କ ଜ୍ଵାଇଁ ସଫଦର ଆୱାନ ଗିରଫ

ହୋଟେଲ ରୁମ୍ କବାଟ ଭାଙ୍ଗି ଗିରଫ କଲା ପୁଲିସ

ଇସଲାମାବାଦ :  ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫଙ୍କ ଜ୍ଵାଇଁ ସଫଦର ଆୱାନଙ୍କୁ କରାଚି ପୁଲିସ ଗିରଫ କରିଛି। ପାକିସ୍ତାନ ମୁସଲିମ ଲିଗ୍ (ଏନ) ନେତା ତଥା ନୱାଜଙ୍କ ଝିଅ ମରିୟମ ନୱାଜ ସରିଫ ଟ୍ୱିଟ କରି ଏହି ସୂଚନା ଦେଇଛନ୍ତି। ପାକିସ୍ତାନ ଡେମୋକ୍ରାଟିକ୍ ମୁଭମେଣ୍ଟ (ପିଡିଏମ୍)ର କରାଚି ରାଲି ପରେ ଆୱାନଙ୍କୁ ଗିରଫ କରାଇଛି।

ମରିୟମ କହିଛନ୍ତି ଯେ ସେମାନେ କରାଚିର ଏକ ହୋଟେଲରେ ରହୁଥିଲେ। ଏହି ସମୟରେ ପୁଲିସ ତାଙ୍କ କୋଠରୀର କବାଟ ଭାଙ୍ଗି ଭିତରକୁ ପ୍ରବେଶ କରିଥିଲା ​​ଏବଂ କ୍ୟାପଟେନ ସଫଦର ଆୱାନଙ୍କୁ ଗିରଫ କରିଥିଲା। ସୂଚନାଯୋଗ୍ୟ, ପାକିସ୍ତାନରେ ଇମ୍ରାନ ଖାନ ସରକାରଙ୍କ ବିରୋଧରେ ହୋଇଥିବା ବିକ୍ଷୋଭ ସମାବେଶରେ ମରିୟମ ନୱାଜ ଅଂଶଗ୍ରହଣ କରିଥିଲେ।

ଉଲ୍ଲେଖନୀୟ କଥା ହେଉଛି ଯେ, ପାକିସ୍ତାନରେ ଇମ୍ରାନ ଖାନ ସରକାର ବିରୋଧରେ ବିରୋଧର ସ୍ୱର ତୀବ୍ର ହେବାରେ ଲାଗିଛି।  ଇମ୍ରାନ ସରକାରଙ୍କ ବିରୋଧରେ ବିକ୍ଷୋଭ ଓ ଶୋଭାଯାତ୍ରା ବୃଦ୍ଧି ପାଉଛି। ଏହା ଇମ୍ରାନ ଖାନ ଏବଂ ପାକିସ୍ତାନୀ ସେନା ପାଇଁ ଚିନ୍ତାର କାରଣ ପାଲଟିଛି।

କରାଚିରେ ଅନୁଷ୍ଠିତ ସମାବେଶରେ ଅନେକ ଲୋକ ଏକତ୍ରିତ ହୋଇଥିଲେ। ଏହି ସମାବେଶରେ ମରିୟମ ନୱାଜ ଇମ୍ରାନ ସରକାର ଉପରେ ପ୍ରବଳ ବର୍ଷିଥିଲେ। ସେ କହିଥିଲେ, ଯଦି ଆମେ କ୍ଷମତାକୁ ଫେରିବୁ ତେବେ ଇମ୍ରାନ ଜେଲରେ ରହିବେ। ଏହି ସମାବେଶରେ କରୋନାରେ  ଜୀବନ ହରାଇଥିବା ଲୋକଙ୍କୁ ମରିୟମ ନୱାଜ ପ୍ରଥମେ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ସେ ଏହା ମଧ୍ୟ କହିଛନ୍ତି ଯେ, ଇମ୍ରାନ ଖାନ ତାଙ୍କ ବିଫଳତାକୁ ଲୁଚାଉଛନ୍ତି ଏବଂ ଲୋକଙ୍କୁ ଭୟଭୀତ ନ ହେବାକୁ କହୁଛନ୍ତି।

Comments
Loading...