ଦକ୍ଷିଣ ଏସୀୟ କ୍ରୀଡ଼ା : ରେକର୍ଡ ପଦକ ସହ ଶୀର୍ଷରେ ଭାରତ

୧୭୪ଟି ସ୍ବର୍ଣ୍ଣ, ୯୩ଟି ରୌପ୍ୟ ଓ ୪୫ଟି ବ୍ରୋଞ୍ଜ୍ ପଦକ ସହ ଭାରତ ଜିତିଲା ୩୧୨ ପଦକ

କାଠମାଣ୍ଡୁ : ନେପାଳର କାଠମାଣ୍ଡୁ ଓ ପୋଖ୍‌ରାରେ ଚାଲିଥିବା ୧୩ଶ ଦକ୍ଷିଣ ଏସୀୟ କ୍ରୀଡ଼ା ମଙ୍ଗଳବାର ଉଦ୍‌ଯାପିତ ହୋଇଯାଇଛି। ଏହି କ୍ରୀଡ଼ାରେ ଭାରତ ମୋଟ ୩୧୨ଟି ପଦକ ଜିତିଛି; ଯାହା ଏହି କ୍ରୀଡ଼ା ଇତିହାସରେ ଭାରତ ପାଇଁ ସର୍ବାଧିକ। କ୍ରମାଗତ ୧୩ଶ ସଂସ୍କରଣରେ ଭାରତ ପଦକ ତାଲିକା ଶୀର୍ଷରେ ରହିଛି। ଏହି ୧୦ ଦିନର ପ୍ରତିଯୋଗିତାରେ ଭାରତ ୧୭୪ଟି ସ୍ବର୍ଣ୍ଣ, ୯୩ଟି ରୌପ୍ୟ ଓ ୪୫ଟି ବ୍ରୋଞ୍ଜ୍ ପଦକ ସହ ୩୧୨ ପଦକ ପାଇଛି। ୨୦୧୬ରେ ଦକ୍ଷିଣ ଏସୀୟ କ୍ରୀଡ଼ାର ୧୨ଶ ସଂସ୍କରଣ ଗୁଆହାଟୀ ଓ ସିଲଂରେ ଆୟୋଜନ ହୋଇଥିବା ବେଳେ ଭାରତ ୩୦୯ଟି ପଦକ ଜିତିଥିଲା। ତେବେ ଗତଥର ଭାରତ ୧୮୯ଟି ସ୍ବର୍ଣ୍ଣ ଜିତିଥିବା ବେଳେ ଏଥର ୧୫ଟି କମ୍; ଅର୍ଥାତ୍ ୧୭୪ଟି ସ୍ବର୍ଣ୍ଣ ପଦକ ଜିତିଛି।

Image Source : latestly.com

୨୦୧୬ରେ ୨୬୩ ପଦକ ଇଭେଣ୍ଟ ଥିବା ବେଳେ ୭୮୯ଟି ପଦକ ଥିଲା। ତେବେ ଏଥର ୩୩୮ଟି ପଦକ ଇଭେଣ୍ଟ ଥିବା ବେଳେ ୧୦୧୪ଟି ପଦକ ଲାଗି ପ୍ରତିଯୋଗିତା ହୋଇଥିଲା। ଏଥର ଭାରତ ମୋଟ ୩୧୨ଟି ପଦକ ଜିତିଥିବା ବେଳେ ୨ୟ ସ୍ଥାନରେ ଥିବା ଆୟୋଜକ ନେପାଳ ମୋଟ ୨୦୬ଟି ପଦକ ଜିତିପାରିଛି। ଏଥିରେ ଅଛି ୫୧ଟି ସ୍ବର୍ଣ୍ଣ, ୬୦ଟି ରୌପ୍ୟ ଓ ୯୫ଟି ବ୍ରୋଞ୍ଜ୍ ପଦକ। ୪୦ଟି ସ୍ବର୍ଣ୍ଣ, ୮୩ଟି ରୌପ୍ୟ ଓ ୧୨୮ଟି ବ୍ରୋଞ୍ଜ୍ ସହ ୩ୟ ସ୍ଥାନରେ ଥିବା ଶ୍ରୀଲଙ୍କା ମୋଟ ୨୫୧ଟି ପଦକ ଜିତିପାରିଛି। ୧୯୮୪ରୁ ଦକ୍ଷିଣ ଏସୀୟ କ୍ରୀଡ଼ା ଆୟୋଜନ ହେବା ପରଠାରୁ ଭାରତ ୧୩ଟିଯାକ ସଂସ୍କରଣରେ ପଦକ ତାଲିକାର ପ୍ରଥମ ସ୍ଥାନରେ ରହିଛି। ମଙ୍ଗଳବାର ଅନ୍ତିମ ଦିନରେ ଭାରତ ମୋଟ ୧୮ଟି ପଦକ ଜିତିପାରିଛି। ସେଥିରେ ଅଛି ୧୫ଟି ସ୍ବର୍ଣ୍ଣ, ୨ଟି ରୌପ୍ୟ ଓ ଗୋଟିଏ ବ୍ରୋଞ୍ଜ୍। ଏଥିରୁ ଭାରତୀୟ ବକ୍ସର ୬ଟି ସ୍ବର୍ଣ୍ଣ ଓ ଗୋଟିଏ ରୌପ୍ୟପଦକ ଜିତିଛନ୍ତି। ପୁରୁଷ ବିଭାଗରେ ବିକାଶ କୃଷ୍ଣନ୍, ସ୍ପର୍ଶ କୁମାର, ନରେନ୍ଦର ଏବଂ ମହିଳା ବିଭାଗରେ ପିଙ୍କି ରାଣୀ, ସୋନିଆ ଲାଠେର ଓ ମଞ୍ଜୁ ବୋମ୍ବାରିୟା ସ୍ବର୍ଣ୍ଣପଦକ ଜିତିଛନ୍ତି। ଭାରତ ଉଭୟ ପୁରୁଷ ଓ ମହିଳା ବିଭାଗରେ ବାସ୍କେଟ୍‌ବଲ ସ୍ବର୍ଣ୍ଣପଦକ ଜିତିଛି। ସ୍କ୍ବାଶ୍‌ରେ ଭାରତକୁ ମହିଳା ସ୍ବର୍ଣ୍ଣ ଓ ପୁରୁଷ ରୌପ୍ୟପଦକ ମିଳିଛି।

Comments
Loading...