ଚେନ୍ନାଇ: ଇଂଲଣ୍ଡ ବିପକ୍ଷ ୨ୟ ଟେଷ୍ଟରେ ଫର୍ମକୁ ଫେରିଛନ୍ତି ଟିମ୍ ଇଣ୍ଡିଆ ଓପନର ରୋହିତ ଶର୍ମା। ଶନିବାରଠାରୁ ଆରମ୍ଭ ହୋଇଥିବା ଏହି ମ୍ୟାଚରେ ରୋହିତ ଫର୍ମକୁ ଫେରିବା ସହ ଶତକ ହାସଲ କରି ଦଳର ସ୍ଥିତିକୁ ସୁଧାରିବାରେ ସଫଳ ହୋଇଛନ୍ତି। ୮୬ ରନ୍ରେ ୩ ଉଇକେଟ୍ ହରାଇ ଟିମ୍ ଇଣ୍ଡିଆ ବିପର୍ଯ୍ୟୟର ସମ୍ମୁଖୀନ ହୋଇଥିବାବେଳେ ରୋହିତ ଶର୍ମା ଆଜିଙ୍କ୍ୟ ରାହାଣେଙ୍କ ସହିତ ମିଶି ୧୬୨ ରନ୍ର ଭାଗିଦାରୀ କରିଥିଲେ। ଦଳର ସ୍କୋର ୨୪୮ ରନ୍ ହୋଇଥିବାବେଳେ ସେ ଜ୍ୟାକ୍ ଲିଚ୍ଙ୍କ ଦ୍ବାରା ଆଉଟ୍ ହୋଇ ପ୍ୟାଭିଲିୟନ ଫେରିଥିଲେ।
ପ୍ରଥମ ଇନିଂସରେ ରୋହିତ ୧୬୧ ରନ୍ ସଂଗ୍ରହ କରିଥିଲେ, ଯେଉଁଥିରେ ୧୮ ଚୌକା ଏବଂ ୨ ଛକା ସାମିଲ ଥିଲା। ରୋହିତଙ୍କ ସହିତ ରାହାଣେ ବି ଭଲ ପ୍ରଦର୍ଶନ କରିଥିଲେ। କିନ୍ତୁ ରୋହିତ ଆଉଟ ହେବା ପରେ ପରେ ରାହାଣେ ବେଶୀ ସମୟ ତିଷ୍ଠିପାରି ନ ଥିଲେ। ୨୪୯ ରନ୍ ହୋଇଥିବାବେଳେ ସେ ଇଂଲଣ୍ଡ ସ୍ପିନର ମୋଇନ୍ ଅଲ୍ଲୀଙ୍କ ଦ୍ବାରା ଆଉଟ୍ ହୋଇଯାଇଥିଲେ।
ତେବେ ଟିମ୍ ଇଣ୍ଡିଆ ଅଧିନାୟକ ବିରାଟ କୋହଲି ୨ୟ ଟେଷ୍ଟରେ ବି ଭଲ ସ୍କୋର କରିବାରେ ବିଫଳ ହୋଇଛନ୍ତି। ସେ ଏବଂ ଅନ୍ୟତମ ଓପନର ସୁବମନ୍ ଗିଲ୍ ଖାତା ଖୋଲିବା ପୂର୍ବରୁ ଆଉଟ୍ ହୋଇଯାଇଥିଲେ। ଇଂଲଣ୍ଡ ପକ୍ଷରୁ ମୋଇନ୍ ଅଲୀ ଏବଂ ଜ୍ୟାକ୍ ଲିଚ୍ ୨ଟି ଲେଖାଏ ଉଇକେଟ୍ ନେଇଥିବାବେଳେ ଓଲି ଷ୍ଟୋନ୍ ଗୋଟିଏ ଉଇକେଟ୍ ଅକ୍ତିଆର କରିଥିଲେ।
Comments are closed.