ଖୁଣ୍ଟା: ଗୋପବନ୍ଧୁ ନଗର ବ୍ଲକର ଆରପଟ୍ଟା ପଂଚାୟତ ନିର୍ବାହୀ ଦାସମାତ ମୁର୍ମୁ ୫ ହଜାର ଟଙ୍କା ଲାଞ୍ଚ ନେବା ଅଭିଯୋଗରେ ଗୁରୁବାର ଭିଜିଲାନ୍ସ ଦ୍ୱାରା ଗିରଫ ହେବା ପ୍ରତିବାଦରେ ବିଭିନ୍ନ ଗ୍ରାମପଞ୍ଚାୟତର ବହୁ ସଂଖ୍ୟାର ପୁରୁଷ ଓ ମହିଳାମାନେ ବ୍ଲକ କାର୍ଯ୍ୟାଳୟରେ ତାଲା ପକାଇଛନ୍ତି । ବ୍ଲକ କାର୍ଯ୍ୟାଳୟରେ ଅଚଳାବସ୍ଥା ସୃଷ୍ଟି ହୋଇଥିବା ବେଳେ ଉଦେଶ୍ୟମୂଳକ ଭାବେ ଭିଜିଲାନ୍ସ ଧରାଇବାରେ ହାତ ଥିବା ଦୁଇ ଜଣ ବ୍ୟକ୍ତିଙ୍କ ବିରୋଧରେ ଗିରଫ ହୋଇଥିବା ଶ୍ରୀ ମୁର୍ମୁଙ୍କ ପତ୍ନୀ ଯମୁନା ମୁର୍ମୁ ଖୁଣ୍ଟା ଥାନାରେ ଗୁରୁତର ଅଭିଯୋଗ କରିଛନ୍ତି । ଦୁଇ ଅଭିଯୁକ୍ତ ପୂର୍ବରୁ ଦାସମତଙ୍କ ଘରେ ପହଂଚି ତାଙ୍କ କାମ ନକଲେ ପରିଣାମ ଭୋଗିବ କହି ଯମୁନାଙ୍କୁ ଜାତିଆଣ ଗାଳି ଦେଇଥିଲେ ବୋଲି ସେ ଅଭିଯୋଗ କରିଛନ୍ତି । ବିକ୍ଷୋଭ କାରୀମାନେ ଅଭିଯୁକ୍ତମାନଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ଦାବି କରି ବାରିପଦା-ଉଦଳା ୧୯ ନମ୍ବର ରାଜ୍ୟରାଜପଥରେ ମଧ୍ୟାହ୍ନରୁ ଧାରଣାରେ ବସିଛନ୍ତି । ଫଳରେ ରାଜରାସ୍ତରେ ସମସ୍ତ ଯାନ ବାହନ ଚଳାଚଳ ବନ୍ଦ ହୋଇଯାଇଛି । ବ୍ଲକରେ ତାଲା ପଡିବା ସହିତ ରାସ୍ତାରୋକ ଯୋଗୁ ଅସ୍ୱାଭାବିକ ପରିସ୍ଥିତି ସୃଷ୍ଟି ହୋଇଛି ।