ରେଙ୍ଗାଲିକ୍ୟାମ୍ପ: ଉତ୍କଳମଣି ଗୋପବନ୍ଧୁ ଦାସଙ୍କ ୯୪ ତମ ଶ୍ରାଦ୍ଧ ବାର୍ଷିକୀ ଅବସରରେ ଜଣେ ଶିକ୍ଷୟିତ୍ରୀ ବୃକ୍ଷ ରୋପଣ କରି ଗୋପନ୍ଧୁଙ୍କୁ ଶ୍ରଦ୍ଧାଞ୍ଜଳି ଦେଉଥିବା ଦେଖିବାକୁ ମିଳିଛି। ସେ ହେଲେ ଅତାବିରା ବ୍ଲକ ଟୋପ ହାଇସ୍କୁଲର ବିଜ୍ଞାନ ଶିକ୍ଷୟିତ୍ରୀ ଅନୁସୂୟା ଦେବତା। ସେ କହନ୍ତି, ଆଜିର ସମାଜ ଗୋପବନ୍ଧୁଙ୍କ ଆଦର୍ଶ ମାର୍ଗକୁ ଭୂଳିଯାଇଛି। ପ୍ରତି ମୁହୂର୍ତ୍ତରେ ଅନ୍ୟାୟ ଅହିଂସାରେ ମଣିଷ ପରସ୍ପରର ଅନିଷ୍ଟ କରି ଚାଲିଛି। ସମାଜରେ ଅନ୍ୟ ପାଇଁ ବଞ୍ଚିବା ମଣିଷ ଆଜି ମିଳିବା କଷ୍ଟକର ହୋଇପଡିଛି।ତେଣୁ ପୁଣି ଥରେ ସେଇ ମହାନ୍ ଆତ୍ମାଙ୍କ ଆବିର୍ଭାବର ଆବଶ୍ୟକତା ଆଜି ରହିଛି। ମାନବ ସେବାକୁ ନିଜ ଜୀବନରେ ପ୍ରାଥମିକତା ଦେଇ ଜୀବନ ସାରା ସେବାରେ ବ୍ରତୀ ହୋଇ ରହିଥିବା ଦରିଦ୍ରମାନଙ୍କ ବନ୍ଧୁ ଗୋପବନ୍ଧୁଙ୍କ ସ୍ମୃତିରେ ଆଜି ସେ ଏହି ବୃକ୍ଷରୋପଣ କରି ପୁଣି ଥରେ ଲୋକଙ୍କ ମନରେ ଗୋପବନ୍ଧୁଙ୍କ ଜୀବନାଦର୍ଶକୁ ଉଦ୍ଜୀବିତ କରିବାର ପ୍ରୟାସ କରିଛନ୍ତି। ରାସ୍ତା କଡ ତଥା କୁଷ୍ଠାଶ୍ରମରେ ଗଛ ଲଗାଇ ସେଠାରେ ଗୋପବନ୍ଧୁଙ୍କ କିଛି ନୀତିବାଣୀ ଥିବା ପ୍ଲାକାର୍ଡ ରଖି ଦେଇଛନ୍ତି, ଯେପରି ଲୋକଙ୍କ ଦୃଷ୍ଟି ତାଙ୍କ ବାଣୀ ଉପରେ ପଡ଼ିବ ଓ ଲୋକଙ୍କର କିଛି ପରିବର୍ତ୍ତନ ହେବ। ତାଙ୍କର ଏହି କାର୍ଯ୍ୟକୁ ବୁଦ୍ଧିଜୀବି ମହଲରେ ଉଚ୍ଚ ପ୍ରଶଂସା କରାଯାଇଛି।
Comments are closed.