୩ ସପ୍ତାହ ହେଲା ଲୁହାଖଣ୍ଡି ଗ୍ରାମର ସୌର ଚାଳିତ ପାନୀୟ ଜଳ ବ୍ୟବସ୍ଥା ଅଚଳ; ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବାକୁ ଅଞ୍ଚଳବାସୀଙ୍କ ନିବେଦନ

ରେଙ୍ଗାଲି: ସମ୍ବଲପୁର ଜିଲା ରେଙ୍ଗାଲି ବ୍ଳକ୍ କିନାଲୋଇ ଗ୍ରାମ ପଞ୍ଚାୟତ ଅନ୍ତର୍ଗତ ଲୁହାଖଣ୍ଡି ଗ୍ରାମରେ ଥିବା ସୌରଚାଳିତ ନଳକୂପ ଗତ ୩ସପ୍ତାହ ହେଲା ଅଚଳ ହୋଇ ପଡିଛି। ଫଳରେ ଏହି ନଳକୂପ ଉପରେ ନିର୍ଭର କରୁଥିବା ୧୮ରୁ ୨୦ ପରିବାର ପାନୀୟ ଜଳ ପାଇଁ ନାହିଁ ନଥିବା ଅସୁବିଧାର ସମ୍ମୁଖିନ ହେଉଥିବାବେଳେ ପାଣି ମୁନ୍ଦାଏ ପାଇବା ନିମନ୍ତେ ଡହକ ବିକଳ ହେଉଛନ୍ତି। ଗ୍ରାମ୍ୟ ଜଳ ଯୋଗାଣ ବିଭାଗ ଯନ୍ତ୍ରୀଙ୍କୁ ଅଚଳାବସ୍ଥା ଦୂର କରି ପାନୀୟ ଜଳ ଯୋଗାଣ ସ୍ୱାଭାବିକ କରିବାକୁ ଗ୍ରାମବାସୀ ଏବଂ କିନାଲୋଇ ପଞ୍ଚାୟତର ସରପଞ୍ଚ ସରୋଜିନୀ କାଲୋ ଦୃଷ୍ଟି ଆକର୍ଷଣ କରିଥିଲେ ମଧ୍ୟ ଏ ପର୍ଯ୍ୟନ୍ତ କୌଣସି ପଦକ୍ଷେପ ଗ୍ରହଣ କରାଯାଇ ନଥିବାରୁ ଗ୍ରାମବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଉଛି। ଗ୍ରୀଷ୍ମ ଋତୁରେ କୌଣସି ଗ୍ରାମରେ ଯେପରି ପାନୀୟ ଜଳ ସମସ୍ୟା ସୃଷ୍ଟି ନହୁଏ ସେଥିପ୍ରତି ସ୍ୱତନ୍ତ୍ର ବ୍ୟବସ୍ଥା କରିବାକୁ ରାଜ୍ୟ ସରକାର ଜିଲା ଏବଂ ବ୍ଳକ୍ ପ୍ରଶାସନ ତଥା ପାନୀୟ ଜଳ ଯୋଗାଣ ବିଭାଗକୁ ନିର୍ଦ୍ଦେଶ ଦେଇ ଥିବା ବେଳେ ଲୁହାଖଣ୍ଡି ଗ୍ରାମରେ ଗତ ୩ ସପ୍ତାହ ହେଲା ଅଚଳ ହୋଇ ପଡିଥିବା ସୌର ଚାଳିତ ନଳକୂପ ମରାମତି ହେଉନାହିଁ। ତେଣୁ ଉଚ୍ଚ କର୍ତ୍ତୃପକ୍ଷ ଏହି ସମସ୍ୟାର ସମାଧାନ କରି ପାନୀୟ ଜଳ ଯୋଗାଣ ପାଇଁ ପଦକ୍ଷେପ ନେବାକୁ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦିଅନ୍ତୁ ବୋଲି ସ୍ଥାନୀୟ ଅଞ୍ଚଳବାସୀ ନିବେଦନ କରିଛନ୍ତି।

Comments are closed.