ରେଙ୍ଗାଲିକେମ୍ପ: ଅତାବିରା ବ୍ଲକ ବୁଗୁବୁଗl ଗାଁ ଟିକ୍ରାପଡ଼ାରେ ଆଜି ଜଳିଯାଇଛି ଭାଗ ଚାଷୀ ସୁଦାମ ରଣାଙ୍କ ଚlରି ଏକର ଜମିର ଧାନ ଖରି। ଗ୍ରାମର ଶେଷ ମୁଣ୍ଡରେ ଥିବା ତାଙ୍କ ଖଳାରେ ଭାଗ ଜମିର କଟା ହୋଇଥିବା ସମସ୍ତ ଧାନକୁ ସେ ଖରି କରି ରଖିଥିଲେ। ଏବେ ରବି ଫସଲ ଆରମ୍ଭ ହୋଇଯାଇଥିଲେ ସୁଦ୍ଧା ସେ ଧାନ ମଡାଇ ପାରି ନଥିଲେ। କାରଣ ଖଳାର ଚାରିପଟେ ପାଣି ଜମୁ ଥିବାରୁ ସେ ପାଣି ଶୁଖିଲା ପରେ ତାକୁ ମଡାଇବେ ବୋଲି ଆଶା ବାନ୍ଧି ଜରିପାଲ ଢାଙ୍କି ଘୋଡାଇ ସୁରକ୍ଷିତ କରି ରଖିଥିଲେ। କିନ୍ତୁ ଆଜି ସକାଳ ପ୍ରାୟ ଆଠଟା ସମୟରେ ଲୋକେ ଉକ୍ତ ଧାନ ଖରିରେ ନିଆଁ ଜଳୁଥିବାର ଦେଖିଥିଲେ। ନିଆଁର ପ୍ରକୋପ ଏତେ ବେଶୀ ଥିଲା ସାଧାରଣ ଉପାୟରେ ନିଆଁକୁ ଆୟତ୍ତ କରାଯାଇ ପାରିନଥିଲା। ତେଣୁ ସେମାନେ ସଙ୍ଗେ ସଙ୍ଗେ ଅଗ୍ନିଶମ ବିଭାଗର ନିଶୁଳ୍କ ନଂ ୧୧୨କୁ ଫୋନ କରିଥିଲେ।
ଏହା ପରେ ସେମାନେ ସୁଦାମ ରଣାକୁ ଖବର ଦେଇଥିଲେ। ଅତାବିରା ଅଗ୍ନିଶମ ବାହିନୀ ଅଧିକାରୀ ରବିନାରାୟଣ ସାହୁଙ୍କ ନିର୍ଦେଶରେ ହାବିଲଦାର ମେଥେଡିଉସ ମାଘି, ଫାୟର ମେନ୍ ରଞ୍ଜିତ ନାଏକ, ରଞ୍ଜନ କୁଲୁ, ପୁରୁଷୋତ୍ତମ ସାହୁ ଓ କୃଷ୍ଣ ଝାଙ୍କର ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ। ହେଲେ ଧାନ ଖରିରୁ ସମସ୍ତ ଧାନପୋଡ଼ି ନଷ୍ଟ ହୋଇଯାଇଥିଲା। ଚାଷ ପାଇଁ ନିଜର ସମସ୍ତ ଅର୍ଥ ଓ ପରିଶ୍ରମ ବ୍ୟୟ କରିଥିବା ସୁଦାମ ଏବେ ହତାଶ ହୋଇ ପଡିଛନ୍ତି। ଅନ୍ୟ ପକ୍ଷରେ ସେ ଜଣେ ଭାଗ ଚାଷୀ। ଚାଷ କରିଥିବା ଜମିର କର କିପରି ସେ ଜମିମାଲିକଙ୍କୁ ଦେବେ, କିପରି ଋଣ ଶୁଝିବେ ଓ ପରିବାରର ଭରଣ ପୋଷଣ କରିବେ ଏ ନେଇ ସେ ଚିନ୍ତାରେ ପଡିଯାଇଛନ୍ତି। ଚଳିତ ଖରିଫ ଋତୁରେ ଏହି ଚାରି ଏକର ଜମିରେ ସେ ୫୦,୦୦୦ ଟଙ୍କା ଖର୍ଚ୍ଚ କରିଥିଲେ। ଜିଲା ପ୍ରଶାସନ ତଥା ରାଜସ୍ବ ବିଭାଗ ଓ କୃଷି ବିଭାଗ ପକ୍ଷରୁ ଏହି ଭାଗ ଚାଷୀଙ୍କ କ୍ଷୟକ୍ଷତିକୁ ଆକଳନ କରି କ୍ଷତି ପୂରଣ ଦେବା ପାଇଁ ଚାଷୀ ମହଲରେ ଦାବି ହେଉଛି।
Comments are closed.