ରେଙ୍ଗାଲି: ସମ୍ବଲପୁର ଜିଲ୍ଲାର ରେଙ୍ଗାଲି ସେବା ସମବାୟ ସମିତିରୁ ୟୁରିଆ ସାର ନେବା ପାଇଁ ଆଜି ସକାଳ ୭ଟାରୁ ୫ଟି ପଞ୍ଚାୟତର ବିଭିନ୍ନ ଗାଁରୁ ବହୁ ସଂଖ୍ୟକ ଚାଷୀ ଆସି ଏକତ୍ରିତ ହୋଇଥିଲେ। ଚାଷୀ ୟୁରିଆ ସାର ପାଇଁ ଭିଡ ହୋଇଥିବା ଖବର ପାଇଁ ରେଙ୍ଗାଲି ପୁଳିସ ଘଟଣା ସ୍ଥଳକୁ ପହଞ୍ଚି ବୁଝାସୁଝା କରି ସାମାଜିକ ଦୂରତା ରଖି ଧାଡିରେ ଛିଡା କରାଇବାର ବ୍ୟବସ୍ଥା କରିଥିଲା। ତେବେ ଦୀର୍ଘ ସମୟ ଧରି ଅପେକ୍ଷା ସତ୍ୱେ ସାର ନପାଇବାରୁ ଚାଷୀମାନେ ନିରାଶ ହୋଇ ଘରକୁ ଫେରି ଯାଇଛନ୍ତି।
ସାର ନମିଳିବାରୁ ଚାଷୀମାନଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଥିଲା। ଚାଷୀଙ୍କ ଯେତିକି ଭିଡ ଥିଲା ସେତିକି ପରିମାଣର ସାର ସେବା ସମବାୟ ସମିତିରେ ନଥିବାରୁ ସାର ଦେବା ପ୍ରକ୍ରିୟା ବନ୍ଦ କର ଦିଆଯାଇଥିଲା। ଫଳରେ ଚାଷୀ ମହଲରେ ଉତ୍ତେଜନା ପ୍ରକାଶ ପାଇଥିଲା। ସୂଚନା ଅନୁଯାୟୀ, ରେଙ୍ଗାଲି ସେବା ସମବାୟ ସମିତି ପକ୍ଷରୁ ଚଳିତ ଖରିଫ୍ ଋତୁରେ ୧୧ଶହ କୁଇଣ୍ଟାଲ୍ ୟୁରିଆ ସାର ଯୋଗାଇ ଦେବାକୁ ବିଭାଗୀୟ କର୍ତ୍ତୃପକ୍ଷଙ୍କୁ ଟାର୍ଗେଟ୍ ଦିଆଯାଇଥିଲା। କିନ୍ତୁ ଏପର୍ଯ୍ୟନ୍ତ ମାତ୍ର ୫ଶହ କୁଇଣ୍ଟାଲ୍ ୟୁରିଆ ସାର ଏହି ସେବା ସମବାୟ ସମିତିକୁ ଯୋଗାଇ ଦିଆଯାଇଛି। ଆହୁରି ୬ଶହ କୁଇଣ୍ଟାଲ୍ ୟୁରିଆ ସାର ର ଅବଶ୍ୟକତା ଥିବା ବେଳେ ଗତ ୧୭ ତାରିଖ ସୋମବାର ଦିନ ଦୟା କଲା ଭଳି ରେଙ୍ଗାଲି ସେବା-ସମବାୟ ସମିତି କୁ ମାତ୍ର ୩ଶହ ବସ୍ତା ୟୁରିଆ ସାର ଯୋଗାଇ ଦିଆଯାଇଛି।