ମୋଦୀଙ୍କୁ ଅଭିନନ୍ଦନ ଜଣାଇଲେ ବିଭିନ୍ନ ରାଷ୍ଟ୍ରର ନେତା

ନୂଆଦିଲ୍ଲୀ : ଲୋକସଭା ନିର୍ବାଚନରେ ପ୍ରଚଣ୍ଡ ବହୁମତ ସହ ବିଜେପି ନେତୃତ୍ୱାଧୀନ ଏନ୍‍ଡିଏ ବିଜୟ ଲାଭ କରିଛି। ଏହାକୁ ନେଇ ଅନ୍ୟ ରାଷ୍ଟ୍ରର ନେତାମାନେ ବିଜେପି ନେତା ତଥା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଅଭିନନ୍ଦନ ଜଣାଇଛନ୍ତି।
ଏହି କ୍ରମରେ ଚୀନ ରାଷ୍ଟ୍ରପତି ଜିନ ପିଙ୍ଗ ମୋଦୀଙ୍କୁ ଅଭିନନ୍ଦନ ଜଣାଇଛନ୍ତି। ସେ ଟ୍ୱି୍‍ଟ୍‍ କରି ମୋଦୀଙ୍କ ନେତୃତ୍ୱରେ ଏନ୍‍ଡିଏର ବିଜୟ ପାଇଁ ଅଭିିନନ୍ଦନ ଜ୍ଞାପନ କରିଛନ୍ତି। ଏହାସହ ଦୁଇ ପଡୋଶୀ ଦେଶ ଚୀନ-ଭାରତ ସମ୍ପର୍କ ଆଗକୁ ଦୃଢ ହେବ ବୋଲି ଆଶା ବ୍ୟକ୍ତ କରିଛନ୍ତି। ସେହିପରି ଇସ୍ରାଏଲ ପ୍ରଧାନମନ୍ତ୍ରୀ ବେଂଜାମିନ ନେତାନ୍ୟାହୁ ମୋଦୀଙ୍କୁ ଅଭିନନ୍ଦନ ଜ୍ଞାପନ କରିଛନ୍ତି। ଆଗକୁ ଆମ ବନ୍ଧୁତା ଓ ଦୃଢ ସମ୍ପର୍କ ଜାରି ରହିବ ବୋଲି ସେ ଟ୍ୱିଟ୍‍ କରିଛନ୍ତି।

ଭୁଟାନ ପ୍ରଧାନମନ୍ତ୍ରୀ ଡ. ଲୋଟାଇ ତିଶରିଙ୍ଗ ମୋଦୀଙ୍କୁ ଫୋନ୍‍ କଲ୍‍ କରି ଶୁଭେଚ୍ଛା ଜଣାଇଛନ୍ତି। ଅନ୍ୟମାନଙ୍କ ମଧ୍ୟରେ ଶ୍ରୀଲଙ୍କା ପ୍ରଧାନମନ୍ତ୍ରୀ ରାନିଲ ବିକ୍ରିମସଂଘେ, ନେପାଳ ପ୍ରଧାନମନ୍ତ୍ରୀ କେ.ପି ଶର୍ମା ଓଲି, ଆଫଗାନିସ୍ତାନ ପ୍ରଧାନମନ୍ତ୍ରୀ ଅଶ୍ରଫ ଘାନି, ଜାପାନ ପ୍ରଧାନମନ୍ତ୍ରୀ ସିଞ୍ଜୋ ଆବେ ପ୍ରମୁଖ ନରେନ୍ଦ୍ର ମୋଦୀଙ୍କୁ ଫୋନ୍‍ କଲ ଓ ଟ୍ୱିଟ୍‍ କରି ଅଭିନନ୍ଦନ ଜଣାଇଛନ୍ତି। ସେହିପରି ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ ଟ୍ୱିଟ୍‍ କରି ନରେନ୍ଦ୍ର ମୋଦୀଙ୍କୁ ବିଜୟ ପାଇଁ ଅଭିନନ୍ଦନ ଜଣାଇଛନ୍ତି। ମୋଦୀଙ୍କ ସହ ମିଶି ଦକ୍ଷିଣ ଏସିଆର ଶାନ୍ତି, ପ୍ରଗତି ଏବଂ ସମୃଦ୍ଧି ଦିଗରେ କାର୍ଯ୍ୟ କରିବାକୁ ସେ ଆଶା ବ୍ୟକ୍ତ କରିଛନ୍ତି।

Comments
Loading...