ଆର୍ବିଆଇ ବାର୍ଷିକ ରିପୋର୍ଟ : ୨୦୧୯-୨୦ରେ ଖଣ୍ଡିଏ ବି ଦୁଇହଜାର ଟଙ୍କିଆ ନୋଟ୍ ଛପାଯାଇନି
ମୁମ୍ବଇ : ବିଗତ କିଛି ବର୍ଷ ହେବ ଦେଶରେ ଦୁଇହଜାର ଟଙ୍କିଆ ନୋଟ୍ର ସର୍କୁଲେସନ୍ କମିବାରେ ଲାଗିଛି । ୨୦୧୯-୨୦ରେ ଖଣ୍ଡିଏ ବି ଦୁଇହଜାର ଟଙ୍କିଆ ନୋଟ୍ ମୁଦ୍ରଣ କରିନି ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ)। ୨୦୧୮ ମାର୍ଚ୍ଚ ଶେଷ ବେଳକୁ ୩୩,୬୩୨ ଲକ୍ଷ ପିସ୍ ୨୦୦୦ ଟଙ୍କିଆ ନୋଟ୍ ସର୍କୁଲେସନ୍ରେ ରହିଥିବାବେଳେ ୨୦୧୯ ମାର୍ଚ୍ଚ ଶେଷ ବେଳକୁ ଏହି ସଂଖ୍ୟା ୩୨,୯୧୦ ଲକ୍ଷ ପିସ୍କୁ ଖସିଆସିଛି । ତେବେ ଚଳିତବର୍ଷ ମାର୍ଚ୍ଚ ଶେଷ ବେଳକୁ ଏହା ୨୭,୩୯୮ ଲକ୍ଷ ପିସ୍କୁ ହ୍ରାସ ଘଟିଥିବା ଆର୍ବିଆଇର ବାର୍ଷିକ ରିପୋର୍ଟରେ କୁହାଯାଇଛି ।
ରିପୋର୍ଟ ଅନୁଯାୟୀ, ଚଳିତବର୍ଷ ମାର୍ଚ୍ଚ ଶେଷ ସୁଦ୍ଧା ଦେଶରେ ସର୍କୁଲେସନ୍ରେ ରହିଥିବା ମୋଟ ନୋଟ୍ ସଂଖ୍ୟାର ୨.୪% ହେଉଛି ୨୦୦୦ ଟଙ୍କିଆ ନୋଟ୍ । ୨୦୧୯ ମାର୍ଚ୍ଚ ଶେଷ ଭାଗରେ ଏହା ସର୍କୁଲେସନ୍ରେ ରହିଥିବା ମୋଟ ନୋଟ୍ର ୩% ଏବଂ ୨୦୧୮ ମାର୍ଚ୍ଚ ଶେଷରେ ୩.୩% ରହିଥିଲା । ମୂଲ୍ୟ ଦୃଷ୍ଟିରୁ ଦେଖିଲେ ଚଳିତବର୍ଷ ମାର୍ଚ୍ଚ ଶେଷ ସୁଦ୍ଧା ସର୍କୁଲେସନ୍ରେ ରହିଥିବା ମୋଟ ନୋଟ୍ ମୂଲ୍ୟର ଏହା ୨୨.୬%, ୨୦୧୯ ମାର୍ଚ୍ଚ ଶେଷ ସୁଦ୍ଧା ୩୧.୨% ଏବଂ ୨୦୧୮ ମାର୍ଚ୍ଚ ଶେଷ ବେଳକୁ ଏହା ୩୭.୩% ରହିଥିଲା । ଅନ୍ୟପକ୍ଷରେ ସର୍କୁଲେସନ୍ରେ ରହିଥିବା ୫୦୦ ଏବଂ ୨୦୦ ଟଙ୍କିଆ ନୋଟ୍ ସଂଖ୍ୟା ବଢ଼ିବାରେ ଲାଗିଥିବା ଏହି ରିପୋର୍ଟରେ ଦର୍ଶାଯାଇଛି । ସଂଖ୍ୟା ହେଉ କି ମୂଲ୍ୟ ଦୃଷ୍ଟିରୁ ହେଉ ୨୦୧୮ଠାରୁ ବିଗତ ତିନି ବର୍ଷରୁ ଅଧିକ ସମୟ ହେବ ସର୍କୁଲେସନ୍ରେ ରହିଥିବା ୫୦୦ ଏବଂ ୨୦୦ ଟଙ୍କିଆ ନୋଟ୍ ସଂଖ୍ୟାରେ ବୃଦ୍ଧି ଘଟିଛି । ତେବେ ୨୦୧୯-୨୦ରେ ଆର୍ବିଆଇ ଦ୍ବାରା କୌଣସି ନୋଟ୍ ମୁଦ୍ରଣ କରାଯାଇନାହିଁ । ଏହାଛଡା ଏହି ସମୟ ମଧ୍ୟରେ ଭାରତୀୟ ରିଜର୍ଭ ବ୍ୟାଙ୍କ ନୋଟ୍ ମୁଦ୍ରଣ ପ୍ରାଇଭେଟ୍ ଲିମିଟେଡ୍ (ଏସ୍ପିଏମ୍ସିଆଇଏଲ୍) ଦ୍ବାରା କୌଣସି ନୋଟ୍ ଯୋଗାଣ କରାଯାଇନାହିଁ ।
୨୦୧୯-୨୦ରେ ୧୪୬୩ କୋଟି ୫୦୦ ଟଙ୍କିଆ ନୋଟ୍ ମୁଦ୍ରଣ କରିଥିବାବେଳେ ଏଥିରୁ ୧୨୦୦ କୋଟି ନୋଟ୍ ସର୍କୁଲେସନ୍ରେ ଛଡାଯାଇଛି । ମୋଟ ୨,୯୬,୬୯୫ ପିସ୍ ଜାଲ ନୋଟ୍ ଚିହ୍ନଟ କରାଯାଇଛି। ୧୦,୫୦,୨୦୦ ଏବଂ ୫୦୦ (ମହାତ୍ମାଗାନ୍ଧୀ ସିରିଜ୍) ନୋଟ୍ର ଜାଲ ନୋଟ୍ ସଂଖ୍ୟାରେ ଯଥାକ୍ରମେ ୧୪୪.୬%, ୨୮.୭%, ୧୫୧.୨% ଏବଂ ୩୭.୫% ବୃଦ୍ଧି ଘଟିଛି । ତେବେ ଗୁରୁତ୍ବପୂର୍ଣ୍ଣ କଥା ହେଉଛି ୨୦,୧୦୦ ଏବଂ ୨୦୦୦ ଟଙ୍କିଆ ନୋଟରେ ଆସୁଥିବା ଜାଲ ନୋଟ୍ ସଂଖ୍ୟାରେ ଯଥାକ୍ରମେ ୩୭.୭%, ୨୩.୭% ଏବଂ ୨୨.୧% ହ୍ରାସ ଘଟିଛି । ସୂଚନାଯୋଗ୍ୟ ଗତ ଆର୍ଥିକବର୍ଷରେ ୧୭,୦୨୦ ପିସ୍ ୨୦୦୦ ଟଙ୍କିଆ ଜାଲ ନୋଟ୍ ଧରାଯାଇଥିବା ରିଜର୍ଭ ବ୍ୟାଙ୍କ ପକ୍ଷରୁ ଏହି ରିପୋର୍ଟରେ କୁହାଯାଇଛି ।
Comments are closed.