ରାଜାମୌଲୀଙ୍କ ‘‘୩-ଆର୍’’ ଉପରେ ସୁଶାନ୍ତ ସିଂହ ରାଜପୁତ୍ ମୃତ୍ୟୁ ଛାଇ

ବାହୁବଳୀ ଫିଲ୍ମ ବକ୍ସ ଅଫିସରେ ରେକର୍ଡ଼ କରିବା ପରେ ଏହାର ନିର୍ଦେଶକ ଏସ୍.ଏସ୍.ରାଜାମୌଲୀଙ୍କୁ କେହି କେହି ବାହୁବଳୀ ବୋଲି ସମ୍ବୋଧନ କରିଥାଆନ୍ତି । ରାଜାମୌଲୀଙ୍କ ଫିଲ୍ମଗୁଡ଼ିକ ବ୍ୟୟବହୁଳ ହୋଇଥାଏ ସତ, ମାତ୍ର ଏହା ବ୍ୟୟ ତୁଳନାରେ ଢ଼େର ଅଧିକ ଆୟ କରିଥାଏ । ୫୦୦ କୋଟି ଟଙ୍କାରୁ ଅଧିକ ଆୟ କରିଥିବା ପ୍ରଥମ ଫିଲ୍ମ ଭାବରେ ବାହୁବଳୀ ରେକର୍ଡ଼ କରିଛି । ତାଙ୍କର ଆଗାମୀ ଫିଲ୍ମ ‘‘୩-ଆର୍’’ ଉପରେ ଏବେ ସମସ୍ତଙ୍କ ନଜର ରହିଛି । ଏହି ଫିଲ୍ମରେ ଦକ୍ଷିଣ ଭାରତର ଦୁଇ ସୁପରଷ୍ଟାର ଜୁନିଅର୍ ଏନଟିଆର୍, ରାମଚରଣଙ୍କ ସହ ହିନ୍ଦୀ ସୁପରଷ୍ଟାର ଅଜୟ ଦେବଗନ ଅଭିନୟ କରୁଛନ୍ତି । ଏମାନଙ୍କ ବ୍ୟତୀତ ଦକ୍ଷିଣୀ ସୁନ୍ଦରୀ ଶ୍ରୀୟା ସରନ୍ ଓ ଆଲିଆ ଭଟ୍ଟଙ୍କୁ ମଧ୍ୟ ଫିଲ୍ମ ପାଇଁ ଚୁକ୍ତିବଦ୍ଧ କରାଯାଇଛି ।

ଲକ୍ ଡ଼ାଉନ ଯୋଗୁ ଏହି ଫିଲ୍ମର ସୁଟିଂ ବନ୍ଦ ରହିଛି । ଜୁନ୍ ଶେଷ ଆଡ଼କୁ ଏହାର ପୁନଃ ସୁଟିଂ ଆରମ୍ଭ ପାଇଁ ଲକ୍ଷ୍ୟ ରଖାଯାଇଥିବାବେଳେ ଏବେ ସୁଶାନ୍ତ ସିଂହ ରାଜପୁତଙ୍କ ଅକସ୍ମାତ ମୃତ୍ୟୁ ରାଜାମୌଲୀଙ୍କ ଏହି ପ୍ରୋଜେକ୍ଟ ଉପରେ କଳା ବାଦଲ ଢ଼ାଙ୍କି ଦେଇଛି । ଆଲିଆ ଭଟ୍ଟଙ୍କୁ ଫିଲ୍ମରୁ ବାଦ ଦେବା ପାଇଁ ରାଜାମୌଲୀଙ୍କ ଉପରେ ଚାପ ବଢ଼ିବାରେ ଲାଗିଛି ।

ମାତ୍ର ରାଜାମୌଲୀଙ୍କ ସହ କରଣ ଜୋହରଙ୍କ ଘନିଷ୍ଠ ସମ୍ପର୍କ ଥିବାରୁ ଆଲିଆଙ୍କୁ ଫିଲ୍ମରୁ ବାହାର କରିବା ସହଜ ହେବ ନାହିଁ ବୋଲି ମଧ୍ୟ କେହିକେହି ମତ ଦେଉଛନ୍ତି । ତାଛଡ଼ା ଫିଲ୍ମର ବହୁ ଅଂଶ ସୁଟିଂ ସରିଛି, ତେଣୁ ଆଲିଆଙ୍କୁ ବାହାର କଲେ ଏହି ଫିଲ୍ମକୁ ପୁଣି ମୂଳରୁ ସୁଟିଂ କରିବାକୁ ପଡ଼ିବ । ଯାହା ପାଇଁ ଆହୁରି ବହୁ ଅର୍ଥ ଖର୍ଚ କରିବାକୁ ପଡ଼ିବ । ଏହା ହିଁ ରାଜାମୌଳିଙ୍କୁ ଦ୍ବନ୍ଦ୍ବରେ ପକାଇଛି ।