କପଡା ବ୍ୟାଗ ପ୍ରସ୍ତୁତ କାରୀ କାରଖାନାରେ ଚଢ଼ାଉ, ୪ କ୍ବୁଣ୍ଟାଲ ପଲିଥିନ ଜବତ

ଗୋପାଳପୁର : ଗୋପାଳପୁର ଥାନା ଅନ୍ତର୍ଗତ ପଥରା ଛକ ଠାରେ ମଙ୍ଗଳବାର ଅପରାହ୍ନରେ କପଡା ବ୍ୟାଗ ପ୍ରସ୍ତୁତ କାରଖାନା ଉପରେ ପୁଲିସ ଓ ପ୍ରଶାସନ ମିଳିତ ଭାବେ ଚଢ଼ାଉ କରାଯାଇଥିଲା । ଚଢାଉ ସମୟରେ ସେଠାରୁ କେତେକ ଅଖା ବସ୍ତାରେ ପ୍ରାୟ ୪ କ୍ବୁଣ୍ଟାଲ ପଲିଥିନ ଜବତ କରାଯାଇଥିବା ସହ ତାହାର ଆନୁମାନିକ ମୂଲ୍ୟ ପ୍ରାୟ ୪୦ ହଜାର ଟଙ୍କା ହେବ ବୋଲି ଜଣାପଡିଛି। କୌଣସି ସୁତ୍ରରୁ ଖବର ପାଇ କନିଷି ତହସିଲଦାର ତାପସ ରାଉତ ଓ ଗୋପାଳପୁର ଥାନା ଅଧିକାରୀ ବିବେକାନନ୍ଦ ମହନ୍ତ ପ୍ରମୁଖ ଚଢ଼ାଉ କରିଥିଲେ। ଏହି ସମୟରେ ଉକ୍ତ କାରଖାନା ପରିସରରେ କେତେକ ବ୍ୟାଗରେ ବେଆଇନ ଭାବେ ପଲିଥିନ ବ୍ୟାଗ ମହଜୁଦ ରଖିଥିବା ମିଳିଥିଲା। ଏନେଇ କାରଖାନା ମାଲିକ ଶିବ ପାଣିଗ୍ରାହୀଙ୍କୁ ପଚରାଉଚରା ସମୟରେ ସେ ଏହାକୁ ବିକ୍ରି ନିମନ୍ତେ ରଖିଥିବା ମାନିଥିଲେ। ଏହି କ୍ରମରେ ପ୍ରଶାସନ ପକ୍ଷରୁ ଉକ୍ତ ୪ କ୍ବୁଣ୍ଟାଲ ପଲିଥିନ ଜବତ କରାଯିବା ସହ ୨ ହଜାର ଟଙ୍କା ଜୋରିମାନା ଆଦାୟ କରାଯାଇଛି। ଜବତ କରାଯାଇଥିବା ପଲିଥିନଗୁଡ଼ିକୁ ଆସନ୍ତା ଦିନରେ ନଷ୍ଟ କରାଯିବ ବୋଲି ତହସିଲଦାର ଶ୍ରୀ ରାଉତ ସୂଚନା ଦେଇଛନ୍ତି। ପଲିଥିନ ତିଆରି ଓ ବିକ୍ରି ବେଆଇନ ରହିଥିବା ବେଳେ ପ୍ରତିଦିନ ଶହ ଶହ କ୍ବୁଣ୍ଟାଲ ପଲିଥିନ ବ୍ୟାଗ ପ୍ରସ୍ତୁତ ହେଉଥିବା ସହ ବଜାରରେ ବେଧଡକ ବିକ୍ରି ଚାଲିଛି। ପୂର୍ବରୁ ପ୍ରଶାସନ ଓ ପୁଲିସ ପକ୍ଷରୁ ପଲିଥିନ ନେଇ ଚଢ଼ାଉ ଜୋରଦାର କରାଯାଇଥିବା ବେଳେ ଏବେ ଏଥିରେ କିଛି କୋହଳ ହୋଇଯାଇଥିବାରୁ ମୁନାଫାଖୋର ବ୍ୟବସାୟୀ ମାନେ ପୁଣି ଥରେ ପଲିଥିନ ବେପାରକୁ ଖୋଲାଖୋଲି ଆରମ୍ଭ କରିଦେଇଥିବା ଦେଖିବାକୁ ମିଳିଛି।

Comments are closed.