ସୀମା ଓ ଯବାନଙ୍କ ସୁରକ୍ଷା ପ୍ରସଙ୍ଗରେ କହିବାର ସୁଯୋଗ ମିଳିଲାନି; ପ୍ରତିରକ୍ଷା କମିଟି ବୈଠକରୁ ଉଠିଆସିଲେ ରାହୁଲ

ନୂଆଦିଲ୍ଲୀ : ପ୍ରତିରକ୍ଷା ସଂକ୍ରାନ୍ତ ସଂସଦୀୟ କମିଟି ବୈଠକ ଅଧାରୁ ଏହାକୁ ବର୍ଜନ କରିଛନ୍ତି କଂଗ୍ରେସ ନେତା ତଥା କମିଟି ସଦସ୍ୟ ରାହୁଲ ଗାନ୍ଧୀ। ବୁଧବାର କମିଟି ଅଧ୍ୟକ୍ଷ ଜୁଏଲ ଓରାମଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ତାଙ୍କୁ ଚୀନ ସହିତ ସୀମା ବିବାଦ ଓ ଲଦାଖରେ ଯବାନଙ୍କୁ ଅତ୍ୟାଧୁନିକ ସାଜ ସରଞ୍ଜାମ ଯୋଗାଣ ପ୍ରସଙ୍ଗ ଉତ୍ଥାପନ କରିବା ପାଇଁ ସୁଯୋଗ ଦିଆ ନ ଯିବାରୁ ସେ ବୈଠକ ଛାଡ଼ି ଆସିଥିବା ଜଣାଯାଇଛି। ବୈଠକ ବର୍ଜନ ପରେ ରାହୁଲ ଗଣମାଧ୍ୟମକୁ କହିଛନ୍ତି ଯେ, ଏଠାରେ ଜାତୀୟ ସୁରକ୍ଷା ପ୍ରସଙ୍ଗ ଆଲୋଚନା ପରିବର୍ତ୍ତେ ସୈନ୍ୟବାହିନୀର ପୋଷାକ ଉପରେ ଆଲୋଚନା କରାଯାଉଛି। ଏହା ଦ୍ବାରା ଅଯଥା ସମୟ ଅପଚୟ ହେଉଛି। ଯେଉଁ ବୈଠକରେ ସୀମାରେ ଅତ୍ୟନ୍ତ ପ୍ରତିକୂଳ ପରିସ୍ଥିତିରେ କାର୍ଯ୍ୟ କରୁଥିବା ଯବାନଙ୍କ ସୁରକ୍ଷା ତଥା ସୀମା ସୁରକ୍ଷା ବିଷୟ ଆଲୋଚନାର ସୁଯୋଗ ମିଳୁ ନାହିଁ, ସେଠାରେ ଉପସ୍ଥିତ ରହିବା ଅନାବଶ୍ୟକ।

ସୂଚନାନୁଯାୟୀ, ବୈଠକ ଆରମ୍ଭରେ ସିଡିଏସ୍‌ ବିପିନ ରାୱତ ସ୍ଥଳସେନା, ନୌସେନା ଓ ବାୟୁସେନାର ଯବାନଙ୍କ ପୋଷାକ (ୟୁନିଫର୍ମ) ପରିବର୍ତ୍ତନ ପ୍ରସଙ୍ଗ ଉତ୍ଥାପନ କରିଥିଲେ। ଏଥିରେ ହସ୍ତକ୍ଷେପ କରି ରାହୁଲ କହିଥିଲେ ଯେ ରାଜନୈତିକ ନେତୃବୃନ୍ଦ ଦେଶ ଓ ଯବାନଙ୍କ ସୁରକ୍ଷା ପ୍ରସଙ୍ଗରେ ଆଲୋଚନା କଲେ ଭଲ ହୁଅନ୍ତା। ଏହି ସମୟରେ କମିଟି ଅଧ୍ୟକ୍ଷ ଜୁଏଲ ଓରାମ ରାହୁଲଙ୍କୁ ନିରବ ରହିବାକୁ ପରାମର୍ଶ ଦେବା ସହ କିଛି କହିବା ପାଇଁ ଅନୁମତି ଦେଇ ନ ଥିଲେ। ଏଥିରେ ଉତ୍‌କ୍ଷିପ୍ତ ରାହୁଲ ବୈଠକରୁ ଉଠି ଚାଲିଆସିଥିଲେ। ତାଙ୍କ ସହିତ କମିଟିର ସଦସ୍ୟ ଥିବା କଂଗ୍ରେସର ରାଜୀବ ସାତଭ ଓ ରେବନ୍ତ ରେଡ୍ଡି ମଧ୍ୟ ବୈଠକରୁ ଓହରି ଆସିଥିଲେ। ପୂର୍ବରୁ ଏହି କମିଟି ବୈଠକରେ ରାହୁଲ ଯୋଗ ନ ଦେବା ନେଇ ବିବାଦ ସୃଷ୍ଟି ହୋଇଥିଲା ଏବଂ ସେତେବେଳେ ମଧ୍ୟ ରାହୁଲ ସମାନ ଆଭିମୁଖ୍ୟ ପୋଷଣ କରିଥିାଲେ।

Comments
Loading...