୩ ଦିନିଆ ହେପାଜତରେ ପୁଷ୍ପଲତାଙ୍କ ହତ୍ୟାକାରୀ

ପ୍ରମାଣ ଶୃଙ୍ଖଳ ସଂଗ୍ରହ କରାଯିବ : ଡିସିପି,-ହତ୍ୟାକାରୀକୁ ଫାଶୀ ଦିଆଯାଉ : ମା’

ଭୁବନେଶ୍ବର/ଚନ୍ଦକା : ଚନ୍ଦକା ଥାନା ଅଧୀନ ଅନ୍ଧାରୁଆ-ଦାସପୁର ରାସ୍ତା କଡ଼ରୁ ଗତ ୪ ତାରିଖ ସକାଳୁ ମୁଣ୍ଡ ବିହୀନ ମହିଳାଙ୍କ ୭ଦିନ ପରେ ପରିଚୟ ମିଳିଥିଲା। ମୃତ ମହିଳାଙ୍କ ମା’ ମିନତି ପାତ୍ର ପୁଲିସକୁ ଏହି ସୂଚନା ଦେଇଥିଲେ। ପୁଷ୍ପଲତା ରାଉଳଙ୍କ ପରିଚୟ ଜାଣିବା ପରେ କମିସନରେଟ ପୁଲିସର ସ୍ପେଶାଲ ସ୍କ୍ବାଡ୍‌ ତ୍ବରିତ୍‌ ବେଗରେ ପଦକ୍ଷେପ ନେଇ ଦଶପଲ୍ଲାରୁ ଦୁଇ ଅଭିଯୁକ୍ତ ସଞ୍ଜୟ ଓରଫ୍ ଅଙ୍ଗଦ ଦାସ ଏବଂ ଚନ୍ଦୁ ଓରଫ୍ ଶ୍ରୀକାନ୍ତ ଦାସକୁ ଗିରଫ କରିଥିଲା। ଦୁଇ ଅଭିଯୁକ୍ତଙ୍କୁ ଠାବ କରିବା ପରେ ପୁଷ୍ପଲତାଙ୍କ ମୁଣ୍ଡ ମିଳିଥିଲା। ଅଭିଯୁକ୍ତ ଦୁଇ ଜଣ ସଞ୍ଜୟ ଏବଂ ଚନ୍ଦୁକୁ ଶୁକ୍ରବାର କୋର୍ଟ ଚାଲାଣ କରାଯାଇଛି। ଦୁଇ ଅଭିଯୁକ୍ତଙ୍କୁ ହେପାଜତରେ ଆଣି ପୁଲିସ ଅଧିକ ଜେରା କରିବା ଲାଗି ଏସ୍‌ଡିଜେଏମ୍‌ଙ୍କ କୋର୍ଟରେ ଦୁଇ ଜଣଙ୍କୁ ୫ଦିନ ପାଇଁ ହେପାଜତରେ ଆଣିବା ଲାଗି ଚନ୍ଦକା ପୁଲିସ ଆବେଦନ କରିଥିଲା। ରାତିରେ ଦୁଇ ଅଭିଯୁକ୍ତଙ୍କୁ ୩ଦିନ ପାଇଁ ହେପାଜତରେ ନେବାକୁ ଅନୁମତି ଦେଇଛନ୍ତି। ଦୁଇ ଅଭିଯୁକ୍ତଙ୍କୁ ଆଣିବା ପରେ ମାମଲାର ପୁଙ୍ଖାନୁପୁଙ୍ଖ ତଦନ୍ତ କରାଯିବା ଲାଗି ଅନେକ ପ୍ରମାଣ ସଂଗ୍ରହ କରାଯିବ। ଯାହାକୁ ତଦନ୍ତରେ ଚେନ୍ ଅଫ୍ ଏଭିଡେନ୍ସ ବା ପ୍ରମାଣ ସଂଗ୍ରହର ଶୃଙ୍ଖଳ କୁହାଯାଏ ବୋଲି କହିଛନ୍ତି ଡିସିପି ଡ. ଉମାଶଙ୍କର ଦାଶ।

Comments
Loading...