ପୁରୀ: ଶ୍ରୀମନ୍ଦିରରେ ନାବାଳିକାଙ୍କୁ ଅସଦାଚରଣ ଅଭିଯୋଗ ମାମଲାରେ ଅଭିଯୁକ୍ତ କନଷ୍ଟେବଲ ନିଲମ୍ବିତ ହୋଇଛନ୍ତି । ସିସିଟିଭି ଫୁଟେଜ୍ ରୁ ଚିହ୍ନଟ କରାଯାଇ ଅଭିଯୁକ୍ତ ଛୁକେଶ ମେହେରଙ୍କୁ ଥାନାରେ ଅଟକ ରଖାଯାଇଛି । ପରେ ତାଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯିବ ବୋଲି ସୂଚନା ମିଳିଛି ।
ସୂଚନାଯୋଗ୍ୟ, ଶନିବାର ସକାଳେ ପରିବାର ସହ ଶ୍ରୀମନ୍ଦିରର ଭିତରକାଠ ନିକଟରେ ଶ୍ରୀଜିଉଙ୍କ ଦର୍ଶନ କରିବା ବେଳେ ଜଣେ ଆଇଆରବି କନେଷ୍ଟବଳ ଛୁକେଶ ମେହେର ୧୪ ବର୍ଷିୟା ନାବାଳିକା ସହ ଅସଦାଚରଣ କରିଥିବା ନେଇ ଅଭିଯୋଗ ହୋଇଥିଲା। ପୀଡିତା ବାପା ଏନେଇ ସିଂହଦ୍ବାର ଥାନାରେ ଏତଲା ଦେଇଥିଲେ । ଅଭିଯୋଗ ପରେ ପୁଲିସ ସିସିଟିଭି ଫୁଟେଜ୍ ଯାଞ୍ଚ କରି ଅଭିଯୁକ୍ତଙ୍କୁ ଧରିଛି।
ପର୍ଯ୍ୟଟକଙ୍କୁ ନେଇ ଗୁରୁବାର ଶ୍ରୀମନ୍ଦିରେ ସେବାୟତ ଓ ପୁଲିସ ମଧ୍ୟରେ ବିବାଦ ଦେଖିବାକୁ ମିଳିଥିଲା । ପୁଲିସ ମାଡରେ ଜଣେ ସେବାୟତଙ୍କ ନାକ ଫାଟି ଯାଇଥିବା ବୋଲି ଅଭିଯୋଗ ହୋଇଥିଲା। ଏହାର ପ୍ରତିବାଦରେ ଶୁକ୍ରବାର ସେବାୟତମାନେ ଶ୍ରୀଜିଉଙ୍କ ନୀତିକାନ୍ତି ବନ୍ଦ କରିବା ସହ ସାଧାରଣ ଦର୍ଶନ ମଧ୍ୟ ବନ୍ଦ କରିଦେଇଥିଲେ । ଯାହାକୁ ନେଇ ଗତକାଲି ସିଂହଦ୍ବାର ନିକଟରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା । ପୁଲିସ ଓ ସେବାୟତଙ୍କ ବିବାଦର ସମାଧାନ ପରେ ଶ୍ରୀମନ୍ଦିରରେ ଶୃଙ୍ଖଳିତ ଦର୍ଶନକୁ ୨୪ ଘଣ୍ଟା ପୁରି ନଥିବା ବେଳେ ଶନିବାର ପୁଣି ନୂଆ ବିବାଦ ମୁଣ୍ଡ ଟେକିଥିଲା ।