ପ୍ରଧାନମନ୍ତ୍ରୀଙ୍କୁ ଭେଟିଲେ ପଞ୍ଜାବ ମୁଖ୍ୟମନ୍ତ୍ରୀ ଛନ୍ନି

କୃଷି ଆଇନ ଉପରେ ଆଲୋଚନା ସହିତ କର୍ତ୍ତାରପୁର କରିଡର ଖୋଲିବାକୁ ଅନୁରୋଧ କଲେ

ନୂଆଦିଲ୍ଲୀ: ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ ସିଂ ଛନ୍ନି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସାକ୍ଷାତ କରି ତାଙ୍କ ସହିତ କୃଷି ଆଇନ ସମ୍ପର୍କରେ ଆଲୋଚନା କରିଛନ୍ତି । ଏଥିସହିତ କୋଭିଡ-୧୯ ମହାମାରୀ କାରଣରୁ ବନ୍ଦ ରହିଥିବା କର୍ତ୍ତାରପୁର କରିଡର ପୁନର୍ବାର ଖୋଲିବାକୁ ସେ ପ୍ରଧାନମନ୍ତ୍ରୀଙ୍କୁ ଅନୁରୋଧ ଜଣାଇଛନ୍ତି । ଦୁହିଁଙ୍କ ମଧ୍ୟରେ ପ୍ରାୟ ଏକଘଣ୍ଟା ଆଲୋଚନା ହୋଇଥିବା ସରକାରୀ ସୂତ୍ରରୁ କୁହାଯାଇଛି ।
ବୈଠକ ପରେ ଛନ୍ନି ସାମ୍ବାଦିକଙ୍କୁ କହିଥିଲେ ଯେ କୃଷି ଆଇନକୁ ନେଇ ଚାଲିଥିବା ବିରୋଧାଭାସର ସମାଧାନ କରିବା ଏବଂ ବିକ୍ଷୋଭକାରୀ ଚାଷୀଙ୍କ ସହିତ ଆଲୋଚନା ଆରମ୍ଭ କରିବାକୁ ସେ ପ୍ରଧାନମନ୍ତ୍ରୀଙ୍କର ଦୃଷ୍ଟି ଆକର୍ଷଣ କରିଥିଲେ । ଏଥିସହିତ ତିନିଟି କୃଷି ଆଇନ ପ୍ରତ୍ୟାହାର କରାଯିବାକୁ ସେ ନିଜର ଦାବି ଉପସ୍ଥାପନ କରିଥିଲେ । ପ୍ରଧାନମନ୍ତ୍ରୀଙ୍କ ସହିତ ତାଙ୍କର ଏହା ସୌଜନ୍ୟମୂଳକ ସାକ୍ଷାତ ରହିଥିଲେ ମଧ୍ୟ ଏହି ଅବସରରେ ସେ ଏହିସବୁ ପ୍ରସଙ୍ଗ ଉଠାଇଥିବା ଛନ୍ନି କହିଛନ୍ତି । ସେ ଏହା ମଧ୍ୟ କହିଛନ୍ତି ଯେ କେନ୍ଦ୍ର ସରକାର ଯଦି କୃଷି ଆଇନ ପ୍ରତ୍ୟାହାର ନକରନ୍ତି ତେବେ ରାଜ୍ୟ ସରକାର ବିଧାସଭାର ଏକ ଅଧିବେଶନ ଡକାଇ ଏହି ଆଇନକୁ ଅଗ୍ରାହ୍ୟ କରିଦେବେ । ଧାନ ସଂଗ୍ରହ ନେଇ କେନ୍ଦ୍ର ଖାଉଟି ବ୍ୟାପାର, ଖାଦ୍ୟ ଓ ସାଧାରଣ ବଣ୍ଟନ ମନ୍ତ୍ରଣାଳୟ ପକ୍ଷରୁ ଜାରି କରାଯାଇଥିବା ଆଦେଶ ପ୍ରତ୍ୟାହାର କରିନେବାକୁ ମଧ୍ୟ ସେ ପ୍ରଧାନମନ୍ତ୍ରୀଙ୍କର ଦୃଷ୍ଟି ଆକର୍ଷଣ କରିଥିଲେ ।

Comments
Loading...