ବ୍ରହ୍ମପୁର: ରାଜ୍ୟରେ ଗୋ ହତ୍ୟା ବଢ଼ୁଥିବା ନେଇ ପ୍ରତିବାଦ କରିଛି ବଜରଙ୍ଗ ଦଳ। ବିଶ୍ବହିନ୍ଦୁ ପରିଷଦ ଏବଂ ବଜରଙ୍ଗ ଦଳର ଗଞ୍ଜାମ ଜିଲା ଶାଖା ତରଫରୁ ଗୁରୁବାର ଏ ନେଇ ଧାରଣା ଦିଆଯିବା ସହିତ ଏକ ଦାବିପତ୍ର ରାଜ୍ୟପାଳଙ୍କ ଉଦ୍ଦେଶ୍ୟରେ ଉପଜିଲାପାଳଙ୍କୁ ପ୍ରଦାନ କରାଯାଇଛି।
ସଂଗଠନ ତରଫରୁ କୁହାଯାଇଛି ଯେ, ବିଗତ କିଛି ମାସ ହେବ ଓଡିଶାରେ ଗୋ ଚାଲାଣକାରୀମାନେ ଅତ୍ୟନ୍ତ ସକ୍ରିୟ ହୋଇଛନ୍ତି। ବେଧଡ଼କ ଭାବେ ହତ୍ୟା ଉଦ୍ଦେଶ୍ୟରେ ଗୋ ଚାଲାଣ ହେଉଛି। ହିନ୍ଦୁମାନଙ୍କ ଆରାଧ୍ୟ ଗୋବଂଶକୁ ପ୍ରତିଦିନ ଶହ ଶହ ଟ୍ରକ ଓ ଅନ୍ୟାନ୍ୟ ଗାଡ଼ିରେ ପଶ୍ଚିମବଙ୍ଗ ଏବଂ ବାଂଲାଦେଶକୁ ଚାଲାଣ କରାଯାଉଛି। ଏଥିରୁ ସଂଗୃହୀତ ବିପୁଳ ଅର୍ଥ ରାଷ୍ଟ୍ରବିରୋଧୀ ଆତଙ୍କବାଦ କାର୍ଯ୍ୟକଳାପରେ ବ୍ୟବହାର ହେଉଛି। ଏହା ବିରୋଧରେ ସଂଘର୍ଷ କରୁଥିବା ଗୋରକ୍ଷକମାନଙ୍କୁ ହତ୍ୟା ଧମକ ସହ ମରଣାନ୍ତକ ଆକ୍ରମଣ ଏବଂ ମିଥ୍ୟା ମାମଲାରେ ଛନ୍ଦି ଦିଆଯାଉଛି। ପୁଲିସ ପ୍ରଶାସନର ନିଷ୍କ୍ରିୟତା ଯୋଗୁ ଗୋ-ଚାଲାଣ ଏବଂ ହତ୍ୟା ବଢ଼ିଛି। ଏ ସମସ୍ତ ବିଷୟକୁ ଅନୁଧ୍ୟାନ କରି ଓଡିଶା ବଜରଙ୍ଗ ଦଳ ତରଫରୁ ଦାବିପତ୍ର ପ୍ରଦାନ କରାଯାଇଛି।
ରାଜ୍ୟ ସରକାର ଗୋହତ୍ୟାକୁ ସମ୍ପୂର୍ଣ୍ଣ ବନ୍ଦ କରିବା ପାଇଁ ଦୃଢ ଆଇନ ଆଣିବା ସହିତ ଗୋରକ୍ଷକମାନଙ୍କ ଉପରେ ଲଗାଯାଇଥିବା ମିଥ୍ୟା ମାମଲାକୁ ରଦ୍ଦ କରିବା, ଚାଲାଣ ରୋକିବା ପାଇଁ ଜିଲା ସ୍ତରରେ ସ୍ୱତନ୍ତ୍ର ଟାସ୍କଫୋର୍ସ ଗଠନ, ଚାଲାଣକାରୀଙ୍କୁ ଚିହ୍ନଟ ସହ ରାଷ୍ଟ୍ରୀୟ ସୁରକ୍ଷା ଆଇନ ଅନୁଯାୟୀ ଦଣ୍ଡିତ କରିବା, ପ୍ରତି ଜିଲାରେ ଗୋଶାଳା ନିର୍ମାଣ ଏବଂ ଗୋ ଆଧାରିତ ଶିଳ୍ପ ପାଇଁ ଆବଶ୍ୟକ ତାଲିମ ଏବଂ ଆର୍ଥିକ ପ୍ରୋସାହନ ପ୍ରଦାନ ପାଇଁ ଦାବି କରାଯାଇଛି। ଦାବିପତ୍ର ପ୍ରଦାନ ବେଳେ ଶିବଦତ୍ତ କୁମାର ଦାଶ, ଲଳିତ ମୋହନ ସେଠୀ, ଗୌତମ ମହାରଣା, ଧୈର୍ଯ୍ୟଧର ସ୍ବାଇଁ ଏବଂ ଅରୂପ ପ୍ରସାଦ ପାତ୍ର ପ୍ରମୁଖ ଉପସ୍ଥିତ ଥିଲେ।
Comments are closed.