ସରକାରଙ୍କୁ ମାନିଲେନି ଘରୋଇ ସ୍କୁଲ, ଦେବେ ଫି’ ଆଦାୟ ତଥ୍ୟ

ଭୁବନେଶ୍ବର: କରୋନା ଯୋଗୁଁ ଦୀର୍ଘ ୯ ମାସ ଧରି ସ୍କୁଲ ବନ୍ଦ ଥିବାରୁ ଫି’ ଛାଡ଼କୁ ନେଇ ଦୀର୍ଘ ଦିନ ଧରି ବିବାଦ ଦେଖା ଦେଇଥିଲା। ସ୍କୁଲ ଫି’ ହ୍ରାସ୍‌ ପାଇଁ ବିଦ୍ୟାଳୟ ଓ ଗଣଶିକ୍ଷା ବିଭାଗ ନିଷ୍ପତ୍ତି ନେଇଥିଲା। ତେବେ ସରକାରଙ୍କ ଏହି ନିୟମକୁ କିଛି ଘରୋଇ ସ୍କୁଲ ପାଳନ କରୁ ନଥିବା ଅଭିଯୋଗ ହୋଇଛି। ସବୁ ଜିଲା ଶିକ୍ଷା ଅଧିକାରୀ(ଡିଇଓ) ଓ ବ୍ଲକ୍‌ ଶିକ୍ଷା ଅଧିକାରୀ(ବିଇଓ)ଙ୍କୁ ଫି’ ଛାଡ଼ କରୁ ନଥିବା ଶିକ୍ଷାନୁଷ୍ଠାନ ସହ ଆଲୋଚନା କରି ଆବଶ୍ୟକ ପଦକ୍ଷେପ ନେବାକୁ ବିଭାଗ ପକ୍ଷରୁ ନିର୍ଦେଶ ଦିଆଯାଇଥିଲା। ବିଭାଗ ପକ୍ଷରୁ ନିର୍ଦେଶ ପାଇବା ପରେ ରାଜ୍ୟର ବହୁ ଜିଲାରେ ଡିଇଓ ଫି’ ଛାଡ଼ ସଂକ୍ରାନ୍ତରେ ରିପୋର୍ଟ ମାଗିଛନ୍ତି। ପୂର୍ବରୁ କେତେ ଟଙ୍କା ଫି’ ଆଦାୟ କରାଯାଉଥିଲା ଓ ଏବେ କେତେ ଟଙ୍କା ରହିଛି ସେନେଇ ତଥ୍ୟ ମଗାଯାଇଛି। ଖୋର୍ଦ୍ଧା ସମେତ ବିଭିନ୍ନ ଜିଲାରେ ରିପୋର୍ଟ ମଗାଯାଇଥିବା ଜଣାପଡ଼ିଛି।

ଓଡ଼ିଶା ଅଭିଭାବକ ମହାସଂଘ ଅଭିଯୋଗ ପରେ ଭୁବନେଶ୍ୱର ବିଇଓଙ୍କ ଅଧ୍ୟକ୍ଷତାରେ ନିୟମ ପାଳନ କରୁ ନଥିବା ନେଇ ଅଭିଯୋଗ ହୋଇଥିବା କିଛି ସ୍କୁଲ କର୍ତ୍ତୃପକ୍ଷଙ୍କର ବୈଠକ ମଙ୍ଗଳବାର ଅନୁଷ୍ଠିତ ହୋଇଛି। ବୈଠକରେ ସ୍କୁଲ ପୂର୍ବ ଦୁଇ ବର୍ଷର ଏବଂ ଚଳିତ ବର୍ଷ ଶ୍ରେଣୀ ଅନୁସାରେ ଓ କେଉଁ ବାବଦରେ କେତେ ସ୍କୁଲ ଫି’ ଆଦାୟ ହେଉଛି ତା’ର ବିବରଣୀ ପ୍ରଦାନ କରିବାକୁ ନିଷ୍ପତ୍ତି ନିଆଯାଇଛି। ବୈଠକରେ ଓଡିଶ ଅଭିଭାବକ ମହାସଂଘ ସାଧାରଣ ସମ୍ପାଦକ ଅଶୋକ ପାଇକରାୟ, ସହ-ଅଧକ୍ଷ ପ୍ରସନ୍ନ ବିଷୋୟୀ ଯୋଗ ଦେଇଥିଲେ।

Comments
Loading...