ଏଣିକି ସେନା ପାଇଁ ଅସ୍ତ୍ର ତିଆରି କରିବେ ଘରୋଇ କମ୍ପାନୀ, ନିୟମ ପରିବର୍ତ୍ତନ କଲେ ସରକାର
ନୂଆଦିଲ୍ଲୀ : ଏବେ ସରକାରୀ କମ୍ପାନୀଙ୍କ ସହ ଘରୋଇ କମ୍ପାନୀଙ୍କୁ ବି ସେନା ପାଇଁ ଅସ୍ତ୍ର ତିଆରି କରିବାର ଭାର ମିଳିବ। ପ୍ରତିରକ୍ଷା ମନ୍ତ୍ରାଳୟ ଏନେଇ ନିୟମରେ ବଡ଼ଧରଣର ପରିବର୍ତ୍ତନ କରିଛି। ଫଳରେ ଏଣିକି ବିଦେଶ କମ୍ପାନୀଗୁଡ଼ିକ ଅସ୍ତ୍ର ତିଆରି ପାଇଁ ବୈଷୟିକ ଜ୍ଞାନ ଆଦାନପ୍ରଦାନ କ୍ଷେତ୍ରରେ ଘରୋଇ କମ୍ପାନୀଙ୍କୁ ଚୟନ କରିପାରିବେ। ଅର୍ଥାତ ବିଦେଶୀ କମ୍ପାନୀଗୁଡ଼ିକୁ ଅସ୍ତ୍ର ତିଆରିରେ ସହଭାଗୀତା ପାଇଁ ଘରୋଇ କମ୍ପାନୀଙ୍କୁ ଚୟନ କରିବାର ସ୍ୱାଧୀନତା ମିଳିବ। ଏହି ନିୟମ ପରିବର୍ତ୍ତନ ଦ୍ୱାରା ଏଚ୍ଏଏଲ (ହାଲ), ବିଇଏଲ ଏବଂ ବିଡିଏଲ ସରକାରୀ କମ୍ପାନୀଗୁଡ଼ିକର ବହୁ କ୍ଷତି ଘଟିବ ବୋଲି କୁହାଯାଉଛି।
ପୂର୍ବରୁ ବିଦେଶୀ କମ୍ପାନୀ କେବଳ ଉପରୋକ୍ତ ସରକାରୀ କମ୍ପାନୀଗୁଡ଼ିକ ସହ ଚୁକ୍ତି କରିପାରୁଥିଲେ। ନିୟମରେ ପରିବର୍ତ୍ତନ ସହ ଏବେ ଭାରତୀୟ ଘରୋଇ କମ୍ପାନୀଗୁଡ଼ିକ ବିଦେଶୀ କମ୍ପାନୀ ସହ ରାଫେଲ ଭଳି ଚୁକ୍ତି କରିପାରିବେ। ନିକଟରେ ରାଫେଲ ଯୁଦ୍ଧ ବିମାନ ନିର୍ମାଣକାରୀ ଫ୍ରାନ୍ସ କମ୍ପାନୀ ଡାସଲ୍ଟ ଆଭିଏସନ ରିଲାଏନ୍ସ ଡିଫେନ୍ସ ସହ ଅଫସେଟ୍ ଚୁକ୍ତି କରିଥିଲା। ଏହି ଚୁକ୍ତିକୁ ନେଇ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ସରକାରଙ୍କୁ କଡ଼ା ସମାଲୋଚନା କରୁଛନ୍ତି। ସୂଚନା ଅନୁସାରେ ସେପ୍ଟେମ୍ବର ୨୭ରୁ ଏହି ପରିବର୍ତ୍ତିତ ନିୟମ ଲାଗୁ ହୋଇଛି। ପରିବର୍ତ୍ତିତ ନିୟମର ସର୍ତ୍ତ ଅନୁସାରେ କମ୍ପାନୀ ପରିଚାଳନା ଭାର ଜଣେ ଭାରତୀୟ ନାଗରିକଙ୍କ ପାଖରେ ରହିବା ଦରକାର। ଏହାସହ ଅସ୍ତ୍ର ତିଆରି କ୍ଷେତ୍ରରେ ଅନ୍ୟୁନ୍ ୨ ବର୍ଷର ଅଭିଜ୍ଞତା ଥିବା ଆବଶ୍ୟକ।