କେବେ ଗଡିବ ଘରୋଇ ବସ୍ : ଆଜି ନିଆଯିବ ଚୁଡାନ୍ତ ନିଷ୍ପତ୍ତି

ଭୁବନେଶ୍ଵର : ରାଜ୍ୟରେ ଘରୋଇ ବସ ଚଳାଚଳ ନେଇ ଆଜି ଚୂଡାନ୍ତ ନିଷ୍ପତି ନିଆଯିବ । ଆଜି ରାଜ୍ୟ ବସ ମାଲିକ ସଂଘର ସାଧାରଣ ପରିଷଦ ବୈଠକ ବସିବ । ଏଥିରେ ବସ ଚଳାଚଳ ନେଇ ନିଷ୍ପତି ନିଆଯିବ ବୋଲି ସଂଘ କହିଛି । ରାଜ୍ୟ ସରକାର ବସ୍ ଚଳାଚଳ କରିବାକୁ ଅନୁମତି ପ୍ରଦାନ କରିବା ପରେ ମଧ୍ୟ ଘରୋଇ ବସ୍ ମାଲିକ ମାନେ ବସ୍ ଚଳାଇ ନଥିଲେ । ବସ୍ ମାଲିକ ମାନେ ସରକରଙ୍କୁ ସେମାନଙ୍କର କେତେକ ଦାବି ପୂରଣ କରିବାକୁ କହିଥିଲେ । ଏହି କ୍ରମରେ ଗତକାଲି ସଚିବାଳୟରେ ଘରୋଇ ବସ୍ ମାଲିକ ସଂଘ ସହ ପରିବହନ ମନ୍ତ୍ରୀ ପଦ୍ମନାଭ ବେହେରା ଆଲୋଚନା କରିଥିଲେ । ଏହି ସମୟରେ ବସ୍ ମାଲିକ ସଂଘ ୩ମାସର ରୋଡ୍ ଟାକ୍ସ ଓ ୬ମାସର ବ୍ୟାଙ୍କ ଲୋନ୍ ଛାଡ ଏବଂ ବସ୍ କର୍ମଚାରୀଙ୍କ ଇନସୁରାନ୍ସ ଦାବି କରିଥିଲା ।

ତେବେ ରାଜ୍ୟରେ ଘରୋଇ ବସ ମାଲିକ ସଂଘର ଅନେକ ଦାବି ମାନି ନେଇଛନ୍ତି ସରକାର । ଏପ୍ରିଲ, ମେ ଓ ଜୁନ୍ ର ରୋଡ ଟ୍ୟାକ୍ସ ଛାଡ କରିଛନ୍ତି । ବ୍ୟାଙ୍କ ଲୋନ ଛାଡ ନେଇ ମୁଖ୍ୟମନ୍ତ୍ରୀଙ୍କୁ ଜଣାଇବୁ ବୋଲି କହିଛନ୍ତି ପରିବହନ ମନ୍ତ୍ରୀ । ଏନେଇ ରାଜ୍ୟ ସରକାର କେନ୍ଦ୍ର ସରକାରଙ୍କୁ ଚିଠି ଲେଖିବେ । ତେବେ ଖୁବଶୀଘ୍ର ଘରୋଇ ବସ୍ ଚାଲିବ ବୋଲି ଆଶା କରିଛନ୍ତି ପରିବହନ ମନ୍ତ୍ରୀ ପଦ୍ମନାଭ ବେହେରା ।

Comments
Loading...