କରେନା ମୁକାବିଲା : କମିଲା କରୋନା ଔଷଧର ମୂଲ୍ୟ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉଚ୍ଚସ୍ତରୀୟ ବୈଠକରେ ନିଷ୍ପତ୍ତି

ନୂଆଦିଲ୍ଲୀ : କରୋନା ସଂକ୍ରମିତଙ୍କ ଚିକିତ୍ସାରେ ସର୍ବାଧିକ ଉପଯୋଗୀ ସାବ୍ୟସ୍ତ ରେମ୍‌ଡିସିଭିର୍‌ ଇଞ୍ଜେକସନ୍‌ର ମୂଲ୍ୟ ହ୍ରାସ କରିଛନ୍ତି କେନ୍ଦ୍ର ସରକାର। ଏଥିପାଇଁ ବିଭିନ୍ନ ମହଲରୁ ଦାବି ହେଉଥିଲା। ଏମିତି କି ରେମଡିସିଭିରର କଳାବଜାରୀ ହେଉଥିବା ନେଇ ଅଭିଯୋଗ ଆସିଥିଲା। ସରକାରଙ୍କ ପକ୍ଷରୁ ଏହା କରୋନା ସଂକ୍ରମିତଙ୍କ ଚିକିତ୍ସାରେ ବ୍ୟବହୃତ ଅନ୍ୟ ଔଷଧଗୁଡ଼ିକର ମୂଲ୍ୟ ମଧ୍ୟ ସରକାର କମାଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଶନିବାର ଅନୁଷ୍ଠିତ ଉଚ୍ଚସ୍ତରୀୟ ବୈଠକର ନିଷ୍ପତ୍ତି ଅନୁସାରେ ରେମଡିସିଭିରର ମୂଲ୍ୟ ୫୪୦୦ ଟଙ୍କାରୁ ୩୫୦୦ ଟଙ୍କାକୁ ହ୍ରାସ କରାଯାଇଛି। ଏଥିସହିତ କ୍ୟାଡିଲା ହେଲ୍‌ଥକେୟାର ଲିମିଟେଡ୍‌ ଦ୍ବାରା ପ୍ରସ୍ତୁତ ରେମ୍‌ଡାକ୍‌ର ମୂଲ୍ୟ ୨୮୦୦ ଟଙ୍କାରୁ କମାଯାଇ ୮୯୯ ଟଙ୍କା ଧାର୍ଯ୍ୟ କରାଯାଇଛି। ସିଞ୍ଜେନ ଇଣ୍ଟରନ୍ୟାସନାଲ୍‌ ଲିମିଟେଡ୍‌ ପ୍ରସ୍ତୁତ ରେମ୍‌ୱିନ୍‌ର ମୂଲ୍ୟ ୩୯୫୦ ଟଙ୍କା ଥିଲାବେଳେ ଏହାକୁ ହ୍ରାସ କରାଯାଇ ୨୪୫୦ ଟଙ୍କା ରଖାଯାଇଛି। ସିପ୍ଲା ପ୍ରସ୍ତୁତ ସିପ୍ରେମି ଏଣିକି ୧୦୦୦ ଟଙ୍କା ହ୍ରାସପାଇ ୩୦୦୦ ଟଙ୍କାରେ ଉପଲବ୍ଧ ହେବ। ସେହିପରି କୋଭିଫର ମୂଲ୍ୟରେ ୧୯୦୦ ଟଙ୍କା ହ୍ରାସ କରାଯାଇ ୩୪୯୦ ଧାର୍ଯ୍ୟ ହୋଇଛି। ଏହି ଅବସରରେ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଡା. ହର୍ଷବର୍ଦ୍ଧନ ୧୧ ରାଜ୍ୟର ସ୍ବାସ୍ଥ୍ୟମନ୍ତ୍ରୀଙ୍କ ସହ ଆଲୋଚନା ପରେ କହିଛନ୍ତି ଯେ ଦେଶରେ ଟିକାର ଅଭାବ ନାହିଁ। ବିଭିନ୍ନ ରାଜ୍ୟକୁ ବର୍ତ୍ତମାନ ସୁଦ୍ଧା ୧୪ କୋଟି ୧୫ ଲକ୍ଷ ଡୋଜ ଟିକା ପଠାଯାଇଛି। ସେଥିମଧ୍ୟରୁ ୧୨ କୋଟି ୫୭ ଲକ୍ଷ ୧୮ ହଜାର ଡୋଜ ବ୍ୟବହୃତ ହୋଇଥିଲାବେଳେ ଆହୁରି ୧ କୋଟି ୫୯ ଲକ୍ଷ ଟିକା ମହଜୁଦ ରହିଛି। ଆଉ ୧ କୋଟି ୧୬ ଲକ୍ଷ ୮୪ ହଜାର ଡୋଜ୍‌ ଟିକା ପଠାଇବାକୁ ବନ୍ଦୋବସ୍ତ ଚାଲିଛି ବୋଲି ସେ କହିଛନ୍ତି।

Comments
Loading...