ଲକ୍ଷ୍ନୌ : ରାମ ମନ୍ଦିର ନିର୍ମାଣ ପାଇଁ ମୋଦୀ ସରକାର ଅଧ୍ୟାଦେଶ ଆଣି ଆଇନ କରନ୍ତୁ କିମ୍ବା ଅନ୍ୟ ବାଟ ଖୋଜନ୍ତୁ। ନହେଲେ ପ୍ରଧାନମନ୍ତ୍ରୀଙ୍କୁ ବଦଳାଇ ଦିଆଯିବ। ଲକ୍ଷ୍ନୌଠାରେ ଆୟୋଜିତ ଜନସଭାରେ ରବିବାର ଉଦ୍ବୋଧନ ଦେଇ ଏହା କହିଛନ୍ତି ଅନ୍ତର୍ଜାତୀୟ ହିନ୍ଦୁ ପରିଷଦର ମୁଖ୍ୟ ପ୍ରବୀଣ ତୋଗାଡ଼ିଆ।
ଏହାସହ ଲକ୍ଷ୍ନୌଠାରୁ ଅଯୋଧ୍ୟା ପର୍ଯ୍ୟନ୍ତ ଯାତ୍ରା ପାଇଁ ତୋଗାଡ଼ିଆଙ୍କୁ ଉତ୍ତରପ୍ରଦେଶ ସରକାର ଅନୁମତି ପ୍ରଦାନ କରିଛନ୍ତି। ଲକ୍ଷ୍ନୌଠାରେ ଆୟୋଜିତ ‘ସଂକଳ୍ପ ସଭା’ରେ ତୋଗାଡ଼ିଆ ଉଦ୍ବୋଧନ ଦେଇ ବିଜେପି ନେତୃତ୍ୱାଧୀନ ଏନ୍ଡିଏ ସରକାରଙ୍କ ଉପରେ ବର୍ଷିଥିଲେ। ରବିବାର ରାତି ସୁଦ୍ଧା ଏହି ଯାତ୍ରା ଅଯୋଧ୍ୟାରେ ପହଞ୍ଚିବ ବୋଲି ଆଶା କରାଯାଉଛି। ସଂକଳ୍ପ ସଭାରେ ତୋଗାଡ଼ିଆ କହିଛନ୍ତି ଯେ ହିନ୍ଦୁଙ୍କ ଭୂଲୁଣ୍ଠିତ ଗୌରବ ଏବଂ ସମ୍ମାନ ଫେରାଇ ଆଣିବା ପାଇଁ ଆମେ ଏକାଠି ହୋଇଛୁ। ରାମ ମନ୍ଦିର ପାଇଁ ସଂଘର୍ଷ ଏବେ ଆରମ୍ଭ ହୋଇନାହିଁ। ରାଜୀବ ଗାନ୍ଧୀ, ନରସିଂହ ରାଓ, ଅଟଳ ବିହାରୀ ବାଜପେୟୀଙ୍କ ସାମ୍ନାରେ ରାମ ମନ୍ଦିର ନିର୍ମାଣ ଏକ ସଂଘର୍ଷ ଥିଲା। ରାମ ମନ୍ଦିର ନିର୍ମାଣ ପାଇଁ ପ୍ରତିଶ୍ରୁତି ଦେଇ ମୋଦୀ ସରକାରକୁ ଆସିଥିଲେ। ସରକାରକୁ ଆସିବା ପରେ ମୋଦୀ ସରକାର ଲୋକଙ୍କୁ ଠକି ଚାଲିଛନ୍ତି। ମନ୍ଦିର ନିର୍ମାଣ ପାଇଁ ଆଇନ ଅଣାଯାଉ କିମ୍ବା ଅନ୍ୟ ବାଟ ବାହାର କରାଯାଉ। ନଚେତ ଲୋକ ଦ୍ୱିତୀୟ ପ୍ରଧାନମନ୍ତ୍ରୀ ବାଛିବେ। ଲୋକେ ପ୍ରଧାନମନ୍ତ୍ରୀ ବଦଳାଇ ଦେବେ।
ତୋଗାଡ଼ିଆଙ୍କ ଘନିଷ୍ଠ ଲୋକଙ୍କଠାରୁ ପ୍ରାପ୍ତ ସୂଚନା ଅନୁସାରେ ତୋଗାଡ଼ିଆ ୨୨ ଓ ୨୩ ଅକ୍ଟୋବରରେ ଅଯୋଧ୍ୟାରେ ଏକ କାର୍ଯ୍ୟକ୍ରମରେ ଯୋଗଦେବେ। ୨୩ ଅକ୍ଟୋବରରେ ସେ ଏକ ବଡ଼ ରାଜନୈତିକ ନିଷ୍ପତ୍ତି ନେବେ ଓ ଏନେଇ ଘୋଷଣା କରିବେ। କୁହାଯାଉଛି ସେ ଏକ ନୂଆ ରାଜନୈତିକ ଦଳ ଗଠନ ପାଇଁ ଘୋଷଣା କରିବେ ଓ ଆସନ୍ତା ଲୋକସଭା ନିର୍ବାଚନରେ ତାଙ୍କ ଦଳ ପ୍ରାର୍ଥୀ ଦେବ।
