ସୁଷମାଙ୍କୁ ଶ୍ରଦ୍ଧାଞ୍ଜଳି – ପ୍ରବାସୀ ଭାରତୀୟ କେନ୍ଦ୍ର ହେଲା ସୁଷମା ସ୍ୱରାଜ ଭବନ

ନୂଆଦିଲ୍ଲୀ: କେନ୍ଦ୍ର ସରକାର ଗୁରୁବାର ଦେଶର ଦୁଇଟି ପ୍ରମୁଖ ପ୍ରତିଷ୍ଠାନର ନାମ ପରିବର୍ତ୍ତନ କରିଛନ୍ତି। ବିଶିଷ୍ଟ ରାଜନେତା ତଥା ଭାରତୀୟ ରାଜନୀତିରେ ଜଣେ ସଫଳ କୂଟନୀତିଜ୍ଞ ଭାବରେ ପରିଚିତ ସ୍ୱର୍ଗତ ସୁଷମା ସ୍ୱରାଜଙ୍କ ନାମରେ ଏହାକୁ ନାମିତ କରାଯାଇଛି। ରାଜଦଜନି ଦିଲ୍ଲୀରେ ଥିବା ପ୍ରବାସୀ ଭାରତୀୟ କେନ୍ଦ୍ରକୁ ପୁନଃ ନାମକରଣ କରାଯାଇ ସୁଷମା ସ୍ୱରାଜ ଭବନ ନାମରେ ନାମିତ କରାଯାଇଥିବା ବେଳେ ବିଦେଶ ସେବା ପ୍ରତିଷ୍ଟାଙ୍କୁ ସୁଷମା ସ୍ୱରାଜ ବିଦେଶ ସେବା ପ୍ରତିଷ୍ଠାନ ଭାବେ ନାମିତ କରାଯାଇଛି।

ବିଦେଶ ସେବା ମନ୍ତ୍ରାଳୟ ପକ୍ଷରୁ ଜାରି ବିଜ୍ଞପ୍ତିରେ କୁହାଯାଇଛି, ଦେଶ ଓ ଦେଶବାସୀଙ୍କ ସେବାରେ ପୂର୍ବତନ ବିଦେଶ ମନ୍ତ୍ରୀ ସୁଷମା ସ୍ୱରାଜଙ୍କ କୂଟନୀତିର ଅନନ୍ୟ ପ୍ରଦର୍ଶନ ସ୍ୱରୂପ ପ୍ରବାସୀ ଭାରତୀୟ କେନ୍ଦ୍ର ଏବଂ ବିଦେଶ ସେବା ପ୍ରତିଷ୍ଠାନର ନାମ ପରିବର୍ତ୍ତନ କରାଯାଇ ସୁଷମା ସ୍ବରାଜଙ୍କ ନାମରେ ନାମିତ କରାଯିବାକୁ ନିଷ୍ପତ୍ତି ହୋଇଛି। ଆସନ୍ତା କାଲି ସ୍ୱର୍ଗତ ସୁଷମା ସ୍ୱରାଜଙ୍କ ଜନ୍ମ ଜୟନ୍ତୀ ପଡୁଥିବାରୁ ଆଜି ଏଭଳି ପଦକ୍ଷେପ ଗ୍ରହଣ କରାଯାଇଥିବା ଜଣାପଡିଛି।