‘ଗାନ୍ଧି ନାଗରିକତା ଶିକ୍ଷା ପୁରସ୍କାର’ ପ୍ରଦାନ କରିବେ ପର୍ତ୍ତୁଗାଲ ସରକାର

ନୂଆଦିଲ୍ଲୀ: ମହାତ୍ମାଗାନ୍ଧିଙ୍କ ଆଦର୍ଶକୁ ଭିତ୍ତିକରି ପର୍ତ୍ତୁଗାଲ ସରକାର ଚଳିତ ବର୍ଷଠାରୁ ଗାନ୍ଧି ନାଗରିକତା ଶିକ୍ଷା ପୁରସ୍କାର ପ୍ରଦାନ କରିବେ। ସେଠାକାର ପ୍ରଧାନମନ୍ତ୍ରୀ ଆଣ୍ଟୋନିଓ କୋସ୍ତା ଏହି ବିଷୟ ଘୋଷଣା କରି କହିଛନ୍ତି, ଚଳିତ ବର୍ଷ ପ୍ରାଣୀ ମଙ୍ଗଳ ପ୍ରସଙ୍ଗକୁ ଭିତ୍ତିକରି ଏହି ପୁରସ୍କାର ପ୍ରଦାନ କରାଯିବ। ଗୋଟିଏ ଦେଶର ପ୍ରାଣିସମ୍ପଦର ସୁରକ୍ଷା ସେହି ଦେଶର ମହାନତା ପ୍ରତିପାଦନ କରୁଥିବା ଗାନ୍ଧିଙ୍କ ମନ୍ତବ୍ୟକୁ ଉଦ୍ଧାର କରି କୋସ୍ତା ଏହା କହିଛନ୍ତି। ଗତକାଲି ରାଷ୍ଟ୍ରପତି ଭବନରେ ମହାତ୍ମାଗାନ୍ଧିଙ୍କ ୧୫୦ତମ ଜନ୍ମଜୟନ୍ତୀ ପାଳନ ନିମନ୍ତେ ଗଠିତ ରାଷ୍ଟ୍ରୀୟ କମିଟିର ଦ୍ୱିତୀୟ ବୈଠକରେ ଯୋଗଦେଇ ସେ ଏହି ପୁରସ୍କାର ବିଷୟ ଘୋଷଣା କରିଛନ୍ତି।

ବୈଠକରେ ଉପସ୍ଥିତ ରାଷ୍ଟ୍ରପତି ରାମନାଥ କୋବିନ୍ଦ ସାରା ବିଶ୍ୱରେ ମହାତ୍ମାଗାନ୍ଧିଙ୍କ ଶାନ୍ତି, ସମାନତା ଏବଂ ଅହିଂସା ଭଳି ଆଦର୍ଶର ଆଦର ରହିଥିବା ପ୍ରକାଶ କରିଛନ୍ତି। ରାଷ୍ଟ୍ରପତି ତାଙ୍କ ଉଦବୋଧନରେ ବିଶ୍ୱ ଜଳବାୟୁର ପ୍ରଭାବ ସମ୍ପର୍କରେ କହିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି, ପ୍ରତ୍ୟେକ ନାଗରିକ ସେମାନଙ୍କ ଜୀବନରେ ଗାନ୍ଧିଜୀଙ୍କ ଭାବନାକୁ ପ୍ରତିଫଳିତ କରିବା ଆବଶ୍ୟକ। ଆଜିର ବିଶ୍ୱ ଗାନ୍ଧିଙ୍କ ବିଷୟରେ ଜାଣିବା ଏବଂ ତାଙ୍କ ଆଦର୍ଶକୁ ଗ୍ରହଣ କରିବାପାଇଁ ଚେଷ୍ଟିତ ବୋଲି ମୋଦୀ କହିଛନ୍ତି।

Comments are closed.