ପାଟଣା ଥାନାରେ ମାଡ଼; ଥାନାଧିକାରୀଙ୍କ ଦରମାରୁ ୧୦ ହଜାର ଟଙ୍କା ପୀଡ଼ିତଙ୍କୁ ପ୍ରଦାନ ନିର୍ଦେଶ

୪ ସପ୍ତାହ ମଧ୍ୟରେ ରିପୋର୍ଟ ଦେବାକୁ ପୁଲିସ ଡ଼ିଜିଙ୍କୁ ମାନବାଧିକାର କମିଶନଙ୍କ ନିର୍ଦେଶ

ଭୁବନେଶ୍ବର: ଥାନା ଭିତରେ ଜଣେ ଯୁବକଙ୍କୁ ମାଡମରା ଘଟଣାରେ ରାଜ୍ୟ ମାନବାଧିକାର ଆୟୋଗ ହସ୍ତକ୍ଷେପ କରିଛନ୍ତି। ଏହି ଘଟଣା ସମ୍ପର୍କରେ କଣ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ସେ ସମ୍ପର୍କରେ ୪ ସପ୍ତାହ ମଧ୍ୟରେ ରିପୋର୍ଟ ଦେବାକୁ ପୁଲିସ ଡ଼ିଜିଙ୍କୁ ମାନବାଧିକାର ଆୟୋଗ ନିର୍ଦେଶ ଦେଇଛନ୍ତି ।  ଏହାଛଡା  ମାଡ ମାରିଥିବା ମହିଳା ପୁଲିସ ଅଧିକାରୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିବା ପୂର୍ବରୁ ତାଙ୍କ ଦରମାରୁ ୧୦ ହଜାର ଟଙ୍କା କାଟି ପୀଡ଼ିତ ଯୁବକଙ୍କୁ ମଧ୍ୟବର୍ତୀକାଳୀନ ସହାୟତା ଦେବାକୁ କମିଶନ ଗୃହ ବିଭାଗ ପ୍ରମୁଖ ଶାସନ ସଚିବଙ୍କୁ ନିର୍ଦେଶ ଦେଇଛନ୍ତି।


ପାଟଣା ଥାନା ତାଳସରୁଆ ଗ୍ରାମର ରାଜୁ ମହନ୍ତଙ୍କୁ ଏକ ଜମିଜମା ଗଣ୍ଡଗୋଳ ମାମଲାରେ ପୁଲିସ ଥାନାକୁ ଆଣିଥିଲା। ଥାନା ଅଧିକାରିଣୀ ସନ୍ଧ୍ୟାରାଣୀ ଜେନା ତାଙ୍କୁ ଥାନା ଭିତରେ ନିସ୍ତୁକ ପିଟିବା ସହ ଗୋଇଠା ମାରୁଥିବା ଭିଡ଼ିଓ ସୋସିଆଲ ମିଡ଼ିଆରେ ଭାଇରାଲ ହୋଇଥିଲା ।  ବିଭିନ୍ନ ଗଣମାଧ୍ୟମରେ ମଧ୍ୟ ଏ ସଂକ୍ରାନ୍ତରେ ରିପୋର୍ଟ ପ୍ରକାଶ ପାଇଥିଲା ।

ଗଣମାଧ୍ୟମରେ ପ୍ରକାଶିତ ରିପୋର୍ଟ ଆଧାର ଆଧାରରେ କମିଶନ ଉପରୋକ୍ତ ନିର୍ଦେଶ ଦେଇଛନ୍ତି ।  ପୀଡିତ ଯୁବକ ଜଣକ ୨୫ଦିନହେବ କାମଧନ୍ଦା ନ ପାଇ ଉପାସରେ ଦିନ ବିତାଉଥିଲା ବେଳେ ତାଙ୍କୁ ସାହାଯ୍ୟ କରିବା ପରିବର୍ତ୍ତେ ଥାନା ଭିତରେ ମାଡ ମାରିବା ମାନବିକତାର ପରିଚୟ ନୁହେଁ । ଏ ଦିଗରେ ପୁଲିସ ମହାନିର୍ଦେଶକ ପଦକ୍ଷେପ ନେବାକୁ ଆୟୋଗ ପରାମର୍ଶ ଦେଇଛନ୍ତି ।

Comments
Loading...