ଖାଦ୍ୟ ଅପଚୟ ନ କରିବା ଉପରେ ମୋଦୀଙ୍କ ଗୁରୁତ୍ୱାରୋପ

ନୂଆଦିଲ୍ଲୀ: ଖାଦ୍ୟ ଅପଚୟ ନ କରିବା ଏବଂ ଶକ୍ତି ଓ ଜଳ ସଂରକ୍ଷଣ ଉପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁରୁତ୍ୱାରୋପ କରିଛନ୍ତି। ଗତକାଲି ସନ୍ଧ୍ୟାରେ ନୂଆଦିଲ୍ଲୀଠାରେ ଅନୁଷ୍ଠିତ ଦଶହରା କାର୍ଯ୍ୟକ୍ରମରେ ଯୋଗଦେବା ଅବସରରେ ସେ କହିଛନ୍ତି ଯେ ଜାତିର ପିତା ମହାତ୍ମା ଗାନ୍ଧୀଙ୍କ ୧୫୦ତମ ଜୟନ୍ତୀ ପାଳନ ଅବସରରେ ତାଙ୍କ ପ୍ରତି ସମ୍ମାନ ପ୍ରଦର୍ଶନ କରିବାକୁ ହେଲେ ଖାଦ୍ୟ, ପାନୀୟ ଓ ଶକ୍ତିର ଉଚିତ ବ୍ୟବହାର ତଥା ଥରେ ବ୍ୟବହାର ଯୋଗ୍ୟ ପ୍ଲାଷ୍ଟିକ୍‍ ପରିହାର କରାଯିବା ଉଚିତ। ନବରାତ୍ରର ଗୁରୁତ୍ୱକୁ ଆଖିଆଗରେ ରଖି ଜନସାଧାରଣ ମହିଳା ସଶକ୍ତିକରଣ ଦିଗରେ କାର୍ଯ୍ୟ କରିବା ପାଇଁ ସେ ଆହ୍ୱାନ ଦେଇଛନ୍ତି। ଆଗାମୀ ଦୀପାବଳି ଅବସରରେ କୃତୀ କନ୍ୟାମାନଙ୍କୁ ସମ୍ବର୍ଦ୍ଧିତ କରିବା ଉପରେ ସେ ଗୁରୁତ୍ୱ ଦେଇଛନ୍ତି। ଏହି ଅବସରରେ ସେ ମଧ୍ୟ ଭାରତୀୟ ବିମାନ ବାହିନୀର ସାହସିକତାର ଉଚ୍ଚ ପ୍ରଶଂସା କରିଛନ୍ତି।

ସୂଚନାଯୋଗ୍ୟ ଯେ ବିଜୟା ଦଶମୀ ହେଉଛି ଭାରତୀୟ ବାୟୁସେନାର ପ୍ରତିଷ୍ଠା ଦିବସ। ହନୁମାନଙ୍କୁ ଆମେ ଯେପରି ସମ୍ମାନ କରୁଛୁ, ବାୟୁସେନାର ଯବାନ ଓ ଅଧିକାରୀମାନଙ୍କୁ ସେହିପରି ସମ୍ମାନ ଦେବାକୁ ସେ ଜନସାଧାରଣଙ୍କୁ ପରାମର୍ଶ ଦେଇଛନ୍ତି। ଏହି ଅବସରରେ ଅସତ୍ୟ ଉପରେ ସତ୍ୟର ବିଜୟର ପ୍ରତୀକ ସ୍ୱରୂପ ପ୍ରଧାନମନ୍ତ୍ରୀ ରାବଣ ପ୍ରତିମାରେ ଅଗ୍ନିସଂଯୋଗ କରିଥିଲେ।

Comments are closed.