କୋଭିଡ-୧୯ ମୁକାବିଲା : ମୋଦୀଙ୍କ ପଞ୍ଚସୂତ୍ରୀ ମନ୍ତ୍ର ସଂକଳ୍ପ, ସଂଯମ, ସକାରାତ୍ମକତା, ସମ୍ମାନ ଓ ସହଯୋଗ

କ୍ରୀଡାବିତମାନଙ୍କ ସହ ପ୍ରଧାନମନ୍ତ୍ରୀଙ୍କ ମତ ବିନିମୟ

-କ୍ରୀଡାବିତମାନେ ଦେଶ ପାଇଁ ଗୌରବ ଆଣିଛନ୍ତି, ବର୍ତ୍ତମାନ ସକାରାତ୍ମକ ମନୋଭାବ ଦ୍ୱାରା ଦେଶର ମନୋବଳ ଦୃଢ଼ କରିବାରେ ସେମାନଙ୍କର ଗୁରୁଦାୟୀତ୍ୱ ରହିଛି – ପ୍ରଧାନମନ୍ତ୍ରୀ
-ପ୍ରଧାନମନ୍ତ୍ରୀଙ୍କ ନେତୃତ୍ୱକୁ ପ୍ରଶଂସା କଲେ କ୍ରୀଡାବିତ, ସକାରାତ୍ମକତା ଓ ସାମାଜିକ ଦୂରତ୍ୱ ଉପରେ ସଚେତନତା ସୃଷ୍ଟି କରିବା ଲାଗି କଲେ ସଂକଳ୍ପ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁକ୍ରବାର ଭିଡିଓ କନଫରେନ୍ସ ଜରିଆରେ କ୍ରୀଡାବିତମାନଙ୍କ ସହ ମତ ବିନିମୟ କରିଛନ୍ତି । ପ୍ରଧାନମନ୍ତ୍ରୀ କହିଛନ୍ତି ଯେ, କୋଭିଡ-୧୯ ସମଗ୍ର ମାନବ ସମାଜ ନିମନ୍ତେ ଏକ ଘାତକ ରୂପ ଧାରଣ କରିଛି । ପ୍ରଥମ ବିଶ୍ୱଯୁଦ୍ଧ ପରେ ଅଲିମ୍ପିକକୁ ସ୍ଥଗିତ କରିବା ଘଟଣାରୁ ଏହାର ଗମ୍ଭିରତା ବେଶ ଜଣାପଡୁଛି । ୱିମ୍ବଲଡନ ଏବଂ ଭାରତରେ ଆପିଏଲ କ୍ରୀଡା ଭଳି ଲୋକପ୍ରିୟ ଖେଳଗୁଡିକୁ ଏହି ମହାମାରୀର ଭୟାଭୟତାକୁ ଆଖି ଆଗରେ ରଖି ଘୁଞ୍ଚାଇ ଦିଆଯାଇଛି । ଖେଳରେ ଅସାଧାରଣ ନୈପୁଣ୍ୟ ପ୍ରଦର୍ଶନ କରି ଦେଶକୁ ଗୌରାବାନ୍ୱିତ କରିଥିବାରୁ ପ୍ରଧାନମନ୍ତ୍ରୀ କ୍ରୀଡାବିତମାନଙ୍କୁ ପ୍ରଶଂସା କରିଛନ୍ତି । ବର୍ତ୍ତମାନ ଦେଶବାସୀଙ୍କ ନୈତିକ ମନୋବଳ ଦୃଢ଼ କରିବା ସହ ସାମାଜିକ ଦୂରତ୍ୱ ଓ ଲକଡାଉନ କାଳରେ ନିର୍ଦ୍ଦେଶାବଳୀଗୁଡିକୁ ପାଳନ କରିବା ନେଇ ଲୋକମାନଙ୍କୁ ସଚେତନ କରାଇବାରେ ସେମାନେ ଗୁରୁଦାୟିତ୍ୱ ତୁଲାଇ ପାରିବେ ବୋଲି ପ୍ରଧାନମନ୍ତ୍ରୀ କହିଛନ୍ତି । କ୍ରୀଡା ପାଇଁ ଆବଶ୍ୟକ ତାଲିମ ଓ କଡା ମୁକାବିଲାର ସମ୍ମୁଖିନ କରିବାର ସାହାସ, ସକାରାତ୍ମକ ମନୋଭାବ, ଆତ୍ମଶୃଙ୍ଖଳା ଓ ଆତ୍ମବିଶ୍ୱାସରେ ଜଣେ କ୍ରୀଡାବିତ ତାହାର ତାଲିମ କାଳରେ ଶିକ୍ଷା କରିଥିବାରୁ ଏବେ ତାହାକୁ ଆଧାର କରି ସେମାନେ କରୋନା ସଂକ୍ରମଣ ରୋକିବା ଦିଗରେ ସାହାଯ୍ୟ କରିପାରିବେ ।
କ୍ରୀଡାବିତମାନେ ଲୋକମାନଙ୍କୁ ସଚେତନ କରିବା ପାଇଁ ପାଞ୍ଚଟି ବିଷୟ ଉପରେ ଗୁରୁତ୍ୱ ଦେବାଲାଗି ସେ ଆହ୍ୱାନ ଦେଇଛନ୍ତି । ସେଗୁଡିକ ହେଲା – ମହାମାରୀର ମୁକାବିଲା ପାଇଁ ସଂକଳ୍ପ, ସାମାଜିକ ଦୂରତ୍ୱ ପାଇଁ ସଂଯମ, ଆଶାବାଦୀ ହେବା ପାଇଁ ସକାରାତ୍ମକତା, ଏ ଦିଗରେ ଅଗ୍ରଣୀ ଭୂମିକାରେ କାର୍ୟ୍ୟ କରୁଥିବା ସ୍ୱାସ୍ଥ୍ୟକର୍ମୀମାନଙ୍କୁ ସମ୍ମାନ ଏବଂ ପୁଲିସ କର୍ମଚାରୀଙ୍କୁ ସହଯୋଗ । ଏହାବ୍ୟତିତ ପ୍ରଧାନମନ୍ତ୍ରୀ ରିଲିଫ ପାଣ୍ଠିକୁ ବ୍ୟକ୍ତିଗତ ସ୍ତରରେ ଦାନ ଅନ୍ୟ ଏକ ଆବଶ୍ୟକତା । ଏହାଛଡା ପ୍ରଧାନମନ୍ତ୍ରୀ ଶ୍ରୀ ମୋଦୀ ଉଭୟ ଶାରୀରିକ ଓ ମାନସିକ ଦୃଢ଼ତାର ବାର୍ତ୍ତା ଲୋକମାନଙ୍କ ପାଖରେ ପହଞ୍ଚାଇବା ସହ ଆୟୁଷ ମନ୍ତ୍ରଣାଳୟର ନିୟମାବଳୀଗୁଡିକୁ ଲୋକପ୍ରିୟ କରିବା ପାଇଁ କ୍ରୀଡାବିତମାନଙ୍କୁ ପରାମର୍ଶ ଦେଇଛନ୍ତି ।
ଏଭଳି ଘଡିସନ୍ଧି ମୂହୁର୍ତ୍ତରେ ପ୍ରଧାନମନ୍ତ୍ରୀଙ୍କ ନେତୃତ୍ୱକୁ କ୍ରୀଡାବିତମାନେ ପ୍ରଶଂସା କରିଛନ୍ତି । ତ୍ୟାଗପୂତ ମନୋଭାବ ପ୍ରଦର୍ଶନ କରି ଏହି କରୋନା ମୁକାବିଲା ଯୁଦ୍ଧରେ ଅବତୀର୍ଣ୍ଣ ସ୍ୱାସ୍ଥ୍ୟକର୍ମୀମାନଙ୍କ ପ୍ରତି ସମ୍ମାନ ଜଣାଇଥିବାରୁ ସେମାନେ ପ୍ରଧାନମନ୍ତ୍ରୀଙ୍କୁ ପ୍ରଶଂସା କରିଛନ୍ତି । ଶୃଙ୍ଖଳା, ମାନସିକ ଦୃଢ଼ତା ମଣିଷର ରୋଗ ପ୍ରତିରୋଧକ ଶକ୍ତି ବୃଦ୍ଧିରେ ମଧ୍ୟ ସହାୟକ ହେବ ବୋଲି ସେମାନେ କହିଛନ୍ତି ।
କ୍ରୀଡାବିତମାନଙ୍କ ବଳିଷ୍ଠ ଯୋଗଦାନ ଯୋଗୁଁ ଭାରତ ଏଭଳି ମହାମାରୀର ସାମ୍ନା କରିପାରିବ ବୋଲି ପ୍ରଧାନମନ୍ତ୍ରୀ ଆଶାପୋଷଣ କରିଛନ୍ତି ।

ଭାରତରତ୍ନ  ସଚିନ ତେନ୍ଦୁଲକର, ବିସିସିଆଇ ସଭାପତି  ସୌରଭ ଗାଙ୍ଗୁଲୀ, ଜାତୀୟ ମହିଳା ହକି ଦଳର ଅଧିନାୟିକା ସୁଶ୍ରୀ ରାଣି ରାମପାଲ, ବେଡମିଣ୍ଟନ ଖେଳାଳୀ ସୁଶ୍ରୀ ପି.ଭି.ସିନ୍ଧୁ, କବାଡି ଖେଳାଳୀ ତଥା ହିମାଚଳ ପ୍ରଦେଶ ପୁଲିସ ବାହିନୀର ଡିଏସପି ଅଜୟ ଠାକୁର, ଦୌଡାଳୀ ସୁଶ୍ରୀ ହିମା ଦାସ, ଦିବ୍ୟାଙ୍ଗ ଉଚ୍ଚ ଡିଆଁ ଖେଳାଳୀ ଶରତ କୁମାର, ବିଶିଷ୍ଟ ଟେନିସ ଖେଳାଳୀ ସୁଶ୍ରୀ ଅଙ୍କିତା ରାଇନା, ବିଶିଷ୍ଟ କ୍ରିକେଟର ଯୁବରାଜ ସିଂ ଏବଂ ଜାତୀୟ ପୁରୁଷ କ୍ରିକେଟ ଦଳର ଅଧିନାୟକ ବିରାଟ କୋହଲିଙ୍କ ସମେତ ୪୦ରୁ ଊର୍ଦ୍ଧ୍ଵ ଖେଳାଳୀ ଏହି ଭିଡିଓ କନଫରେନ୍ସରେ ଯୋଗ ଦେଇଥିଲେ । କେନ୍ଦ୍ର ଯୁବ ବ୍ୟାପାର ଓ କ୍ରୀଡା ମନ୍ତ୍ରୀଙ୍କ ସମେତ ମନ୍ତ୍ରଣାଳୟର ବରିଷ୍ଠ ଅଧିକାରୀମାନେ ମଧ୍ୟ ମତ ବିନିମୟରେ ଅଂଶଗ୍ରହଣ କରିଥିଲେ ।