ପ୍ରଧାନମନ୍ତ୍ରୀଙ୍କ ହେଲିକପ୍ଟର ଯାଞ୍ଚ ମାମଲା: ନିର୍ବାଚନ କମିଶନଙ୍କ ସୁପାରିଶକୁ ବିରୋଧ କରିବେ ଆଇଏଏସ ମହସୀନ

ବେଙ୍ଗାଲୁର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ହେଲିକପ୍ଟର ଯାଞ୍ଚ ମାମଲାରେ ଶୃଂଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ନିର୍ବାଚନ କମିଶନଙ୍କ ଦ୍ୱାରା ରାଜ୍ୟ ସରକାରଙ୍କୁ କରାଯାଇଥିବା ସୁପାରିଶକୁ ନ୍ୟାୟାଳୟରେ ଚ୍ୟାଲେଞ୍ଜ କରିବେ ଆଇଏଏସ ମହମ୍ମଦ ମହସୀନ। ନିର୍ବାଚନ କମିଶନ ଦ୍ୱାରା ମହସୀନଙ୍କ ନିଲମ୍ବନ ଆଦେଶକୁ  କାର୍ଯ୍ୟକାରୀ ନ କରିବାକୁ କେନ୍ଦ୍ରୀୟ ପ୍ରଶାସନିକ ଟ୍ରିବୁନାଲଙ୍କ ନିର୍ଦ୍ଦେଶ ପରେ ଏଭଳି ପରିସ୍ଥିତି ଉପୁଜିଛି।

ମହସୀନ ଚଳିତ ଲୋକସଭା ନିର୍ବାଚନରେ ଓଡିଶା ପାଇଁ ପର୍ଯ୍ୟବେକ୍ଷକ ନିଯୁକ୍ତ ହୋଇଥିଲେ ଏବଂ ସ୍ୱତନ୍ତ୍ର ସୁରକ୍ଷା ନିୟମ ଉଲ୍ଲଙ୍ଘନ କରି ପ୍ରଧାନମନ୍ତ୍ରୀଙ୍କ ହେଲିକପ୍ଟର ଯାଞ୍ଚ କରିଥିଲେ ଫଳରେ ତାଙ୍କୁ ନିର୍ବାଚନ ଆୟୋଗ ପୁଣି ରାଜ୍ୟକୁ ଫେରାଇ ଦେଇଥିଲେ। କେନ୍ଦ୍ରୀୟ ପ୍ରଶାସନିକ ଟ୍ରିବୁନାଲଙ୍କ ନିର୍ଦ୍ଦେଶ ପରେ ନିର୍ବାଚନ ଆୟୋଗ ନିଲମ୍ବନ ଆଦେଶ ପ୍ରତ୍ୟାହାର କରିଛନ୍ତି କିନ୍ତୁ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ କର୍ଣ୍ଣାଟକ ସରକାରଙ୍କୁ ସୁପାରିଶ ସହ ପରବର୍ତ୍ତୀ ଆଦେଶ ପର୍ଯ୍ୟନ୍ତ ମହସୀନଙ୍କୁ ନିର୍ବାଚନ ସମ୍ପର୍କିତ କାର୍ଯ୍ୟରେ ସାମିଲ ନ କରିବା ପାଇଁ କହିଛନ୍ତି।

ମହସୀନ ଏକ ସମ୍ବାଦଦାତା ସମ୍ମିଳନୀରେ କହିଛନ୍ତି, ସେ ନିର୍ବାଚନ ଆୟୋଗଙ୍କ ନିର୍ଦ୍ଦେଶ ବିରୁଦ୍ଧରେ ଆଇନର ଆଶ୍ରୟ ନେବେ । ଏହି ମାମଲାରେ କେନ୍ଦ୍ରୀୟ ପ୍ରଶାସନିକ ଟ୍ରିବୁନାଲ କହିଛନ୍ତି ଯେ, ନିର୍ବାଚନ ଆୟୋଗ ଓ ଅନ୍ୟ ଚାରି ଜଣଙ୍କୁ ନୋଟିସ ଜାରି କରାଯାଇଛି ଓ ପରବର୍ତ୍ତୀ ଶୁଣାଣି ଜୁନ ୬ରେ କରାଯିବ।