ପିଜା ବଏକୁ କରୋନା – କ୍ବାରେଣ୍ଟାଇନ୍‌ରେ ୧୭ ସହଯୋଗୀ ଓ ୭୨ ପରିବାର

ନୂଆଦିଲ୍ଲୀ: ଦକ୍ଷିଣ ଦିଲ୍ଲୀ​ର ମାଲବୀୟ ନଗରରେ ଜଣେ ୧୯ବର୍ଷୀୟ ପିଜା ଯୋଗାଣକାରୀ ଯୁବକଙ୍କୁ ନେଇ ଆତଙ୍କ ଖେଳିଯାଇଛି। ସମ୍ପୃକ୍ତ ଯୁବକ କରୋନା ଆକ୍ରାନ୍ତ ହୋଇଥିବାବେଳେ ତାଙ୍କ ସଂସ୍ପର୍ଶରେ ଆସିଥିବା ୧୭ ସହଯୋଗୀ ଓ ୭୨ ପରିବାରଙ୍କୁ କ୍ବାରେଣ୍ଟାଇନ୍‌ରେ ରଖାଯାଇଛି। ସମ୍ପୃକ୍ତ ଯୁବକ ସ୍ଥାନୀୟ ଏକ ପିଜା ଦୋକାନର ଡେଲିଭରୀ ବୟ ଭାବେ କାମ କରନ୍ତି। ଗତ ୨୦ଦିନ ପୂର୍ବେ ତାଙ୍କଠାରେ ସଂକ୍ରମଣର ଲକ୍ଷଣ ଦେଖାଦେଇଥିଲା ବେଳେ ସେ ଚିକିତ୍ସାଧୀନ ଥିଲେ। ଗତ ରବିବାର ମଧ୍ୟ ସେ କେତେଜଣ ଗ୍ରାହକଙ୍କ ଘରେ ପିଜା ପହଞ୍ଚାଇଥିବା ପ୍ରକାଶ।

ଗତ ୧୪ ତାରିଖରେ ତାଙ୍କର ସ୍ବାବ୍‌ ପରୀକ୍ଷା ହୋଇଥିଲାବେଳେ ଗୁରୁବାର ରିପୋର୍ଟ ପଜିଟିଭ୍‌ ବାହାରିଛି। ତାଙ୍କୁ ରାମ ମନୋହର ଲୋହିଆ ହସ୍ପିଟାଲରେ ଭର୍ତ୍ତି କରାଯାଇଛି। ତାଙ୍କ ସଂସ୍ପର୍ଶରେ ୧୭ଜଣ ସହଯୋଗୀ ଆସିଥିବା ଜଣାପଡ଼ିବା ପରେ ସେମାନଙ୍କୁ ଛତରପୁରଠାରେ କ୍ବାରେଣ୍ଟାଇନ୍‌ରେ ରଖାଯାଇଛି। ସେହିଭଳି ଗତ ୨୦ଦିନ ମଧ୍ୟରେ ସେ ପିଜା ପହଞ୍ଚାଇଥିବା ମାଲବ୍ୟ ନଗର, ସାବିତ୍ରୀ ନଗର ଓ ହସ୍‌ ଖସ୍‌ ଅଞ୍ଚଳର ୭୨ ପରିବାରର ସଦସ୍ୟଙ୍କୁ ନିଜ ଘରେ ମଧ୍ୟ କ୍ବାରେଣ୍ଟାଇନ୍‌ରେ ରଖାଯାଇଛି। ସେ କାମ କରୁଥିବା ପିଜା ଦୋକାନକୁ ପ୍ରଶାସନ ଦୁଇ ସପ୍ତାହ ପାଇଁ ବନ୍ଦ କରିଦେଇଛି।

ଏହି ପିଜା ଦୋକାନ ସମ୍ପର୍କ ଥିବା ଅନ୍ୟତମ ଖାଦ୍ୟ ଯୋଗାଣକାରୀ ସଂସ୍ଥା ‘ଜମାଟୋ’ ପକ୍ଷରୁ ଏ ନେଇ ଗ୍ରାହକଙ୍କୁ ସତର୍କ କରାଇଦିଆଯାଇଥିଲେ ମଧ୍ୟ ଆକ୍ରାନ୍ତ ଯୁବକଙ୍କ ସହିତ ସଂସ୍ଥାର କିଛି ସମ୍ପର୍କ ନ ଥିବା କୁହାଯାଇଛି।

Comments
Loading...