ଚୌଦ୍ୱାର : ଚୌଦ୍ୱାର ପୁଲିସ୍ ଚୋରା ବନ୍ଧୁକ ବିକ୍ରି କରୁଥିବା ଜଣେ କୁଖ୍ୟାତ ଅପରାଧୀକୁ ଗିରଫ କରିଛି । ତା ନିକଟରୁ ଗୋଟିଏ ବିଦେଶୀ ୯ ଏମ୍ଏମ୍ ପିସ୍ତଲ ଓ ୨ଟି ଜୀବନ୍ତ ଗୁଳି ଜବତ କରିଛି । ଗିରଫ ଅଭିଯୁକ୍ତ ଜଣକ ହେଲା କଟକ ଖାନ୍ ନଗର ଗୁରୁ ସାହିର ଲୋକେନ୍ ଗୁରୁ (୨୩) । ପୁଲିସ୍ ସୂଚନା ଅନୁଯାୟୀ ଚୌଦ୍ୱାର ଥାନା ଏସ୍ଆଇ ଦିଲ୍ଲିପ କୁମାର ମର୍ଦ୍ଦରାଜ ଭୁୟାଁ ଗୁରୁବାର ପୁଲିସ୍ ଟିମ୍ ସହିତ ବିରୂପା ନଦୀ କୂଳ ରାସ୍ତାରେ ପାଟ୍ରୋଲିଂ କରୁଥିବାବେଳେ ଚୌଦ୍ୱାର-ବନିକା ନଦୀକୁଳ ରାସ୍ତାରେ ଜଣେ ଯୁବକ ସନ୍ଦିଗ୍ଧ ଅବସ୍ଥାରେ ବୁଲୁଥିବା ଦେଖି ତାକୁ ପଚରା ଉଚରା କରିଥିଲେ । ତାକୁ ତଲାସି କରି ତା ନିକଟରୁ ଏକ ଆମେରିକା ପ୍ରସ୍ତୁତ ୯ ଏମ୍ ଏମ୍ ଓ ୯ ବୋରର ଏକ ବିଦେଶୀ ପିସ୍ତଲ ଓ ଉକ୍ତ ପିସ୍ତଲର ଦୁଇଟି ଜୀବନ୍ତ ଗୁଳି ଜବତ କରିଥିଲେ । ତାକୁ ଅଧିକ ପଚରା ଉଚରା କରିବାରେ ସେ ଉକ୍ତ ବନ୍ଧୁକ ବିକ୍ରି ପାଇଁ ଆଣିଥିବା ସ୍ବୀକାର କରିବା ସହିତ ସେ ପୂର୍ବରୁ ଚୋରା ବନ୍ଧୁକ କାରବାରରେ ମଧ୍ୟ ଲିପ୍ତଥିବା କହିଛି । ତା’ ନାମରେ ବାଦାମବାଡ଼ି, ପୁରୀଘାଟ, ମଧୁପାଟଣା, ଓଲଟପୁର, ଜଗତପୁର ଆଦି ଥାନାରେ ୯ଟିରୁ ଅଧିକ ଅପରାଧିକ ମାମଲା ଥିବା ପୁଲିସ୍ ସୂଚନା ଦେଇଛି । ଅଭିଯୁକ୍ତ ଲୋକେନକୁ କୋର୍ଟ ଚାଲାଣ କରାଯାଇଛି । ତଦନ୍ତକାରୀ ଅଧିକାରୀ ଏଏସ୍ଆଇ ମାନସ କୁମାର ମହାରଣା ଘଟଣା ସମ୍ପର୍କରେ ଅଧିକ ତଦନ୍ତ ଜାରୀ ରଖିଛନ୍ତି ।
Comments are closed.