ପିପିଲିରେ ସୋମବାର କରୋନା ଟିକାକରଣ: ସମ୍ମୁଖ ଯୋଦ୍ଧା ସାମ୍ବାଦିକ ଓ ୮ଶହ ଜଣଙ୍କୁ ଦିଆଯିବ ଦ୍ୱିତୀୟମାତ୍ରା ଟିକା

ପିପିଲି:କରୋନା ଟିକା ଅଭାବ ଯୋଗୁଁ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ପିପିଲି ବ୍ଲକରେ ଗତ କିଛିଦିନ ଧରି ଟିକାକରଣ ବନ୍ଦ ରହିଥିଲା। ଆସନ୍ତା ୧୦ ତାରିଖ ସୋମବାର ଦିନ ପିପିଲି ବ୍ଲକରେ ଦ୍ୱିତୀୟମାତ୍ରା କରୋନା ପ୍ରତିଷେଧକ ଟିକାକରଣ କରାଯିବ ବୋଲି ମଙ୍ଗଳପୁର ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରର ମୁଖ୍ୟ ଚିକିତ୍ସାଧିକାରୀ ତଥା ବିପିଏଚ୍‍ଓ ଡାକ୍ତର ବିନୟ କୁମାର ପଣ୍ଡା ସୂଚନା ଦେଇଛନ୍ତି। ପିପିଲି ବ୍ଲକ ଅଞ୍ଚଳରେ କାର୍ଯ୍ୟରତ ସମ୍ମୁଖ ଯୋଦ୍ଧା ସାମ୍ବାଦିକଙ୍କୁ ପ୍ରଥମମାତ୍ରା ଟିକା ଓ ଅନ୍ୟ ୮ଶହ ଜଣଙ୍କୁ ଦ୍ୱିତୀୟମାତ୍ରା ଟିକା ଦିଆଯିବ।

ପିପିଲି ବ୍ଳକରେ ବର୍ତ୍ତମାନ ସୁଦ୍ଧା ୩ହଜାରରୁ ଉର୍ଦ୍ଧ ଲୋକ ଦ୍ୱିତୀୟମାତ୍ରା ଟିକା ନେବାକୁ ଅପେକ୍ଷା କରିଥିବା ବେଳେ ସୋମବାର ସେମାନଙ୍କ ମଧ୍ୟରୁ ୮ଶହ ଜଣଙ୍କୁ ଏହି ଟିକା ଦିଆଯିବ ବୋଲି ଡାକ୍ତର ପଣ୍ଡା ସୂଚନା ଦେଇଛନ୍ତି। ମଙ୍ଗଳପୁର ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ର, ପିପିଲି ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ର, ପାଣିଦୋଳ ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ର ଓ ସାତଶଙ୍ଖ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ୨ଶହ ଲେଖାଏଁ ଦ୍ୱିତୀୟମାତ୍ରା ଟିକା ଦିଆଯିବ। ଏଥିସହ ରାଜ୍ୟ ସରକାରଙ୍କ ଗୋପବନ୍ଧୁ ସାମ୍ବାଦିକ ବୀମା ଯୋଜନାରେ ପଞ୍ଜିକୃତ ହୋଇଥିବା ପିପିଲି ବ୍ଲକର ସାମ୍ବାଦିକଙ୍କ ପାଇଁ ମଙ୍ଗଳପୁର ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରରେ ସ୍ୱତନ୍ତ୍ର ଟିକା ଶିବିରରେ ସୋମବାର କରୋନା ପ୍ରତିଷେଧକ ପ୍ରଥମମାତ୍ରା ଟିକା ଦିଆଯିବ ବୋଲି ଡାକ୍ତର ପଣ୍ଡା ସୂଚନା ଦେଇଛନ୍ତି।