୨୦ରୁ ଅଧିକ ହତ୍ୟା କରିଥିବା ସାଇକୋ କିଲର୍ ଗିରଫ, ବାପାଙ୍କ ହତ୍ୟାକାରୀକୁ ମାରିଥିଲା ୩୨ ଗୁଳି

ବିହାର ପୁଲିସ ହାତରେ ଧରାପଡ଼ିଛି ଜଣେ ସାଇକୋ କିଲର୍‌। ଗଞ୍ଜେଇ ଚୋରା ଚାଲାଣକାରୀଙ୍କୁ ଗିରଫ କରାଯିବା ପରେ ସେମାନଙ୍କ ଭିତରେ ଏହି ସାଇକୋ କିଲର୍‌ ଅବିନାଶ ଶ୍ରୀବାସ୍ତବ ରହିଥିବା ପୁଲିସ ଜାଣିବାକୁ ପାଇଛି। ୨୦ରୁ ଅଧିକ ଲୋକଙ୍କୁ ଅବିନାଶ ହତ୍ୟା କରି ପୂରା ରାଜ୍ୟରେ ଆତଙ୍କ ସୃଷ୍ଟି କରିଥିଲା, ଯାହାକୁ ଲୋକେ ସାଇକୋ କିଲର୍‌ କହୁଥିଲେ। ଅବିନାଶ ନିଜ ବାପାଙ୍କ ହତ୍ୟାକାରୀକୁ ୩୨ ରାଉଣ୍ଡ ଗୁଳି କରିଥିଲା। ହତ୍ୟାକାରୀ ନିହତ ହେବା ପରେ ତା’ ପାଖରେ ୩ ଘଣ୍ଟା ବସି ରହିଥିଲା।

ସୂଚନା ଅନୁସାରେ, ବିହାର ବୈଶାଳୀ ପୁଲିସର ସ୍ପେଶାଲ ଟିମ୍‌, ଜିଲା ଗୁଇନ୍ଦା ଶାଖା ଏବଂ ମହନାର ପୁଲିସ ଗଞ୍ଜେଇ ଚୋରା ଚାଲାଣକାରୀଙ୍କ ବିରୋଧରେ ଲଗାତାର କାର୍ଯ୍ୟାନୁଷ୍ଠାନ ନେବାରେ ଲାଗିଛି। ଏହି କାର୍ଯ୍ୟାନୁଷ୍ଠାନ ସମୟରେ ୨ ଜଣ ଗଞ୍ଜେଇ ଚାଲାଣକାରୀ ଧରାପଡ଼ିଥିଲେ। ସେଥିରୁ ଜଣେ ଥିଲା ଅବିନାଶ। ସେ ଆରଜେଡିର ପୂର୍ବତନ ଏମଏଲସି ଲଲନ ଶ୍ରୀବାସ୍ତବଙ୍କ ପୁଅ।

ଗଞ୍ଜେଇ ଚାଲାଣରେ ଅବିନାଶକୁ ଚିହ୍ନଟ କରିବା ପରେ ପୁଲିସ ଆଶ୍ଚର୍ଯ୍ୟ ହୋଇଯାଇଥିଲା। କାରଣ ଅବିନାଶ ଅପରାଧ ଜଗତରେ ସାଇକୋ କିଲର ଏବଂ ସିରିଏଲ କିଲର ନାମରେ କୁଖ୍ୟାତ ଥିଲା। ସେ ପାଟନାର କଙ୍କଡ଼ବାଗ ଥାନା ଅଧୀନ ଏମଆଇଜି କଲୋନୀରେ ରହୁଥିଲା। ବିହାରରେ ୨୦ରୁ ଊର୍ଦ୍ଧ୍ଵ ହତ୍ୟା ମାମଲାରେ ସେ ଅଭିଯୁକ୍ତ। ଗତ ସେପ୍ଟେମ୍ବରରେ ରକ୍‌ସୌଲରୁ ପୁଲିସ ତାକୁ ଗିରଫ କରିଥିଲା। କିନ୍ତୁ କିଛି ଦିନ ପରେ ଜାମିନରେ ବାହାରି ପୁଣି ଅପରାଧ ଘଟାଇଥିଲା।

ପୁଲିସ ସୂଚନା ଅନୁସାରେ, ଅବିନାଶ ଦିଲ୍ଲୀର ଜାମିଆ ମିଲିଆ ଇସଲାମିଆ ବିଶ୍ଵବିଦ୍ୟାଳୟରୁ ଏମସିଏ କରିଛି। ୨୦୦୨ରେ ହାଜୀପୁରରେ ତା’ ବାପା ତଥା ତତ୍କାଳୀନ ଏମଏଲସି ଲଲନ ଶ୍ରୀବାସ୍ତବଙ୍କୁ ଗୁଳି କରି ହତ୍ୟା କରାଯାଇଥିଲା। ସେହି ସମୟରେ ଅବିନାଶ ଇନ୍‌ଫୋସିସରେ ୪୦ ହଜାର ଟଙ୍କା ମାସିକ ଦରମାରେ ଚାକିରି କରୁଥିଲା। କିନ୍ତୁ ବାପାଙ୍କ ହତ୍ୟାର ପ୍ରତିଶୋଧ ନେବା ଲାଗି ସେ ୨୦୦୩ରେ ହତ୍ୟାକାରୀ ମୋଇନ ଖାନକୁ ୩୨ ରାଉଣ୍ଡ ଗୁଳି କରି ମାରିଥିଲା। ଏହା ପରେ ଅନ୍ୟ ହତ୍ୟାକାରୀମାନଙ୍କୁ ଜଣକ ପରେ ଜଣେ ମାରିଥିଲା। ସେମାନଙ୍କ ମଧ୍ୟରେ ପଟନାର ଡେପୁଟି ମେୟର ଅମରାବତୀ ଦେବୀଙ୍କ ସ୍ବାମୀ ଦିନା ଗୋପ ବି ସାମିଲ ଥିଲେ।

ଅବିନାଶ ପାଖରେ ଏକେ-୪୭ ମଧ୍ୟ ଥିଲା। ଏହି ଏକେ-୪୭ରେ ସେ ଦିନାଙ୍କୁ ହତ୍ୟା କରିଥିଲେ। ସେହି ସମୟରେ ସେ କ୍ୟାପ୍‌ଟେନ ସୁନୀଲଙ୍କ ଭାଇ, ବିଜୟ ଗୋପ, ଅଜୟ ଗୋପ, ଲାଲୁ ଗୋପ, ଅଜତ ଗୋପ, ଇମ୍‌ତିଆଜ, ଚନାରିକ ଗୋପ, ସୁନା ବ୍ୟବସାୟୀ ମନୋଜ ସୋନାର, ରାହୁଲ ଯାଦବଙ୍କ ସମେତ ୨୦ ଜଣଙ୍କୁ ହତ୍ୟା କରିଥିଲେ।

Comments
Loading...