ନଦୀକୁ ଡେଇଁ ଯୁବକଙ୍କ ଆତ୍ମହତ୍ୟା

ଫୁଲନଖରା : ସଦର ଥାନା ଅନ୍ତର୍ଗତ ସାଇଁଶୋ ଗ୍ରାମର ଅଭିମନ୍ୟୁ ମହାପାତ୍ର (୩୫) ସିଢ଼ୁଆ ନଦୀକୁ ଡେଇଁ ଆତ୍ମ ହତ୍ୟା କରିଥିବା ସନ୍ଦେହ କରାଯାଉଛି। କୌଣସି କାରଣକୁ ନେଇ ସେ ସୋମବାର ବିଳମ୍ବିତ ରାତିରେ ଖଲର୍ଦ୍ଦା-କୂଳସରିଚୁଆଁ ବିଜୁ ସେତୁ ଉପରୁ ନଦୀ ଗର୍ଭକୁ ଡ଼େଇଁ ପଡ଼ିଥିଲେ। ଏହା ଦେଖି ସ୍ଥାନୀୟ ଅଞ୍ଚଳର ଲୋକେ ଖୋଜାଖୋଜି କରିଥିଲେ ମଧ୍ୟ ତାଙ୍କର ପତ୍ତା ମିଳିନଥିଲା।

ମଙ୍ଗଳବାର ସକାଳେ ସଦର ଥାନା ଓ ୪୨ ମୌଜା ଫାଣ୍ଡି ପୁଲିସ ଅଗ୍ନିଶମ ବାହିନୀ କର୍ମଚାରୀଙ୍କ ସହିତ ଘଟଣାସ୍ଥଳରେ ପହଞ୍ଚି ଖୋଜାଖୋଜି ଆରମ୍ଭ କରିଛନ୍ତି। ରିପୋର୍ଟ ଲେଖାହେବ ପର୍ଯ୍ୟନ୍ତ ଅଭିମନ୍ୟୁଙ୍କୁ ଠାବ କରାଯାଇପାରିନାହିଁ। ନଦୀର ପ୍ରବଳ ସ୍ରୋତରେ ସେ ଝାରପଡ଼ା କିମ୍ବା କନ୍ଦଳ ଦିଗକୁ ଭାସିଯାଇଥିବା ଅନୁମାନ କରାଯାଉଛି। ପୋଲ ଉପରେ ଥିବା ଅଭିମନ୍ୟୁଙ୍କ ବୁଲେଟକୁ ପୁଲିସ ଜବତ କରି ତଦନ୍ତ ଚଳାଇଛି। ପାରିବାରିକ କଳହରୁ ସେ ଆତ୍ମହତ୍ୟା କରିଥିବା ପୁଲିସ ସନ୍ଦେହ କରୁଛି। ମୃତ ଅଭିମନ୍ୟୁଙ୍କ ଗୋଟିଏ ପୁଅ ପୋଖରୀରେ ବୁଡ଼ି ପ୍ରାଣ ହରାଇଥିଲାବେଳେ ବର୍ତ୍ତମାନ ପତ୍ନୀ, ଦୁଇ ଝିଅ ଓ ବିଧାବା ମା’ ଅଛନ୍ତି।

Comments are closed.