ପୁରୀ: ପୁରୀ ପେଣ୍ଠକଟା ପେଟ୍ରୋଲ ପମ୍ପରେ ଆଜି ସନ୍ଧ୍ୟାରେ ଅଗ୍ନିକାଣ୍ଡ ଘଟିଛି। ଏକ ସ୍କୁଟିରେ ପେଟ୍ରୋଲ ପକାଇବା ବେଳେ ହଠାତ ନିଆଁ ଲାଗି ଯାଇଥିଲା ଓ ସ୍କୁଟରଟି ହୁ ହୁ ହୋଇ ଜଳିଥିଲା। ସେଠାରେ କାର୍ଯ୍ୟରତ ନିକଟରେ ଥିବା ଅଗ୍ନି ନିର୍ବାପକ ଯନ୍ତ୍ର ସାହାଯ୍ୟରେ ଜଳନ୍ତା ସ୍କୁଟର ଉପରକୁ ନିଆଁ ଲିଭା ଗ୍ୟାସ ପ୍ରୟୋଗ କରିଥିଲେ। ଜଳନ୍ତା ସ୍କୁଟର ଉପରକୁ ଏକ ସଂଗେ ୩ରୁ ଅଧିକ କର୍ମଚାରୀ ନିଆଁ ଲିଭା ଗ୍ୟାସ ପ୍ରୟୋଗ କରିବା ଫଳରେ ତାହା ଆୟତ୍ତ କରାଯାଇ ପାରିଥିଲା।
ସ୍କୁଟର ନିଆଁ ଲାଗିଯିବା ଦେଖି ଚାଳକ ଓ ପେଟ୍ରୋଲ ପମ୍ପକୁ ତେଲ ପକାଇବାକୁ ଆସିଥିବା ଅନ୍ୟମାନେ ଏଣେତେଣେ ଦୌଡିବା ଆରମ୍ଭ କରି ଦେଇଥିଲେ। ତେବେ ଏହି ଘଟଣାରେ ସମସ୍ତେ ଅଳ୍ପକେ ବର୍ତ୍ତୀ ଯାଇଥିବା ଜଣାପଡିଛି। ପେଟ୍ରୋଲ ପମ୍ପ କର୍ମଚାରୀଙ୍କ ଉପସ୍ଥିତ ବୁଦ୍ଧି ଯୋଗୁ ବଡ ଧରଣର ଅଘଟଣକୁ ଏଡାଇ ଦିଆଯାଇ ପାରିଛି।
ତେବେ ଏକ ଅସମର୍ଥିତ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ସ୍କୁଟରରେ ପେଟ୍ରୋଲ ଭର୍ତ୍ତି କରାଯାଉଥିବା ବେଳେ ଅନ୍ୟ ଜଣେ ଗ୍ରାହକ ଦିଆସିଲି ଜଳାଇ ଦେବାରୁ ପେଟ୍ରୋଲ ନିଆଁ ଧରିଥିଲା ଓ ଅଘଟଣ ଘଟିଥିଲା। ଏହି ଘଟଣାରେ ସମୁଦ୍ରକୂଳ ଥାନାରେ ଏକ ମାମଲା ରୁଜ୍ଜୁ କରାଯାଇଥିବା ବେଳେ ପୁଲିସ ସ୍କୁଟରଟିକୁ ଜବତ କରି ତଦନ୍ତ ଆରମ୍ଭ କରିଛି।
Comments are closed.