ପାନୀୟ ଜଳ ପ୍ରକଳ୍ପ ନିର୍ମାଣକୁ ନେଇ ବିଡିଓଙ୍କ ଦ୍ଵାରସ୍ତ ହେଲେ ଝୋଡିପଦର ଗ୍ରାମବାସୀ

ଲକ୍ଷ୍ମୀପୁର : ପାନୀୟ ଜଳର ଅଭାବ ଯୋଗୁଁ ନାହିଁ ନଥିବା ଅସୁବିଧାର ସମ୍ମୁଖିନ ହେଉଛନ୍ତି ଝୋଡିପଦର ଗ୍ରାମବାସୀ। ଲକ୍ଷ୍ମୀପୁର ବ୍ଲକର ପଞ୍ଚଡା ପଞ୍ଚାୟତ ଅନ୍ତର୍ଗତ ଝୋଡିପଦର ଗ୍ରାମଠାରେ ୬୦ଘର ଆଦିବାସୀ ପରିବାର ୩ଶହରୁ ଊର୍ଦ୍ଧ୍ବ ଲୋକ ବସବାସ କରୁଥିବା ବେଳେ ଗ୍ରାମରେ ପିଇବା ପାଣିର ଘୋର ସମସ୍ୟା ଉପୁଜିଛି। ଗ୍ରାମରେ ଯେଉଁ ଗୋଟିଏ ନଳକୂପଟି ଅଛି ତାହା ଲୋକଙ୍କ ଅବଶ୍ୟକତାକୁ ମେଣ୍ଟାଇ ପାରୁନାହିଁ ।
ଏଣୁ ଜିଲା ପ୍ରଶାସନ ତରଫରୁ ଲୋକଙ୍କ ସମସ୍ୟାକୁ ଦୃଷ୍ଟିରେ ରଖି ଏକ ପାନୀୟ ଜଳ ପ୍ରକଳ୍ପ ପାଇଁ ୩୭ ଲକ୍ଷ ଟଙ୍କା ବ୍ୟୟରେ ଏକ ପ୍ରକଳ୍ପ ନିର୍ମାଣ କରାଯାଉଛି। କିନ୍ତୁ ଏହି ପ୍ରକଳ୍ପ ଝୋଡିପଦର ବଦଳରେ ଝୋଡିଖେନ୍ଦା ଗ୍ରାମରେ ନିର୍ମାଣ ଚାଲିଛି ବୋଲି ଗ୍ରାମବାସୀ ଅଭିଯୋଗ କରି ଝୋଡିପଦର ଗ୍ରାମବାସୀ ଜିଲା ପ୍ରଶାସନର ଦ୍ଵାରସ୍ତ ହୋଇଥିଲେ।

କିନ୍ତୁ ଅଭିଯୋଗ କରିବାର ୫ଦିନ ବିତି ଯାଇଥିଲେ ମଧ୍ୟ ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରା ଯାଇ ନଥିବା ଯୋଗୁଁ ଗ୍ରାମବାସୀ ଲକ୍ଷ୍ମୀପୁର ଗୋଷ୍ଠୀ ଊନ୍ନୟନ ଅଧିକାରୀ ପ୍ରୀତିରଞ୍ଜନ ରଥଙ୍କୁ ଭେଟି ଅଭିଯୋଗ କରି ଏହି ପ୍ରକଳ୍ପ ଝୋଡିପଦର ଗ୍ରାମରେ ନିର୍ମାଣ କରାଯାଉ ବୋଲି ଏକ ଦାବିପତ୍ର ପ୍ରଦାନ କରିଛନ୍ତି।

ସେହିପରି ଲକ୍ଷ୍ମୀପୁର ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗର କନିଷ୍ଠ ଯନ୍ତ୍ରୀ ପ୍ରଦୀପ୍ତ ସିଂଙ୍କୁ ପଚାରିବାରୁ ଗୋଟିଏ ପରିକଳ୍ପନାରେ ଦୁଇଟିଗ୍ରାମ ପାଇଁ ଉକ୍ତ ପ୍ରକଳ୍ପ ହୋଇଛି। ପ୍ରକଳ୍ପ ନିର୍ମାଣ ହେଲେ ଝୋଡିଖେନ୍ଦା ଓ ଝୋଡିପଦର ଦୁଇଟି ଯାକ ଗ୍ରାମବାସୀ ଉପକୃତ ହୋଇପାରିବେ। କିନ୍ତୁ ଝୋଡିଖେନ୍ଦା ଗ୍ରାମରେ ହେଲେ ତାଙ୍କ ଗ୍ରାମକୁ ପାଣି ମିଳିବ ନାହିଁ ବୋଲି ଝୋଡିପଦର ଗ୍ରାମବାସୀ ଭାବୁଛନ୍ତି। ଝୋଡିପଦର ଗ୍ରାମବାସୀ ଝଡ଼ିଖେନ୍ଦା ବୋଲି ଟେଣ୍ଡର ନୋଟିସ୍ ଦେଖି ଭାବୁଛନ୍ତି ଏହି କାମ କେବଳ ତାଙ୍କ ଗ୍ରାମ ପାଇଁ ଆସିଛି, ଦୁଇଟି ଗ୍ରାମ ପାଇଁ ଗୋଟିଏ ପ୍ରକଳ୍ପ ମଞ୍ଜୁର ହୋଇଛି। ଝୋଡିଖେନ୍ଦା ଗ୍ରାମ ଝୋଡିପଦର ଗ୍ରାମଠାରୁ ଉପରେ ଥିବାରୁ ସେଠାରେ ପ୍ରକଳ୍ପ ନିର୍ମାଣ ହେଲେ ଝୋଡି ପଦର ଗ୍ରାମକୁ ସହଜରେ ପାଣି ଆସିପାରିବ। ସେହିପରି ଗୋଷ୍ଠୀ ଉନ୍ନୟନ ଅଧିକାରୀ ଶ୍ରୀ ରଥ, ସେ ଏହି ଗ୍ରାମକୁ ଯାଇ ସମସ୍ୟାର ସମାଧାନ ଉପରେ ବ୍ୟବସ୍ଥା କରିବେ ବୋଲି କହିଛନ୍ତି।

ଦାବୀ ପତ୍ର ପ୍ରଦାନ ସମୟରେ ଝୋଡିପଦର ଗ୍ରାମର ଲକ୍ଷା ଜାନୀ, ମଙ୍ଗରାଜ ଜାନୀ, ବିଦ୍ୟାଧର ଜାନୀ, କୁନ୍ଦନ ସାଉନ୍ତା, ଦାମ ସାଉନ୍ତା, ଅଜୟ ସାଉନ୍ତା, ପ୍ରଭାସିନି ସାଉନ୍ତା, ବାସନ୍ତୀ ସାଉନ୍ତା, ଲୁଦ୍ରି ଜାନୀ, ଗଙ୍ଗା ସାଉନ୍ତା, ମିନତି ସାଉନ୍ତା, ସେବତୀ ସାଉନ୍ତା
ସୁକିଆ ଦିସାରୀ, ଶେଖର ସାଉନ୍ତା,ସୁରେଶ ପ୍ରମୁଖ ଉପସ୍ଥିତ ଥିଲେ।

Comments
Loading...