ଚେନ୍ନଇ: ଥାନଜଭୁର ପୌରପାଳିକାର କାର୍ଯ୍ୟଶୈଳୀକୁ ନେଇ ସମଗ୍ର ତାମିଲନାଡ଼ୁର ସୋସିଆଲ ମିଡିଆରେ ଅସନ୍ତୋଷର ଦାନା ବାନ୍ଧିବାରେ ଲାଗିଛି। ଆବର୍ଜନା ଗାଡ଼ିରେ ଜନୈକା ନିଃସହାୟ ମହିଳାଙ୍କ ଶବ ବୁହା ହେବା ଘଟଣାକୁ ନେଇ ଦେଖା ଦେଇଛି ଏହି ଅସନ୍ତୋଷ। ରବିବାର ୬୦ବର୍ଷିୟା ଏହି ନିଃସହାୟ ମହିଳା ଜଣକ ଥାନଜଭୁର ବ୍ରିଜ ଉପରେ ମୃତ ଅବସ୍ଥାରେ ପଡ଼ିଥିବା ଦେଖି ସ୍ଥାନୀୟ ଲୋକେ ପୁଲିସକୁ ଖବର ଦେଇଥିଲେ। ପୁଲିସ ମୃତଦେହକୁ ଜବତ୍ କରି ଏ ସମ୍ପର୍କରେ ବିଜ୍ଞପ୍ତି ଜାରି କରିଥିଲେ ମଧ୍ୟ କେହି ଉକ୍ତ ମହିଳାଙ୍କୁ ଚିହ୍ନଟ କରି ପାରିନଥିଲେ। ଫଳରେ ଅନ୍ତିମ ସଂସ୍କାର ନିମନ୍ତେ ପୁଲିସ ଥାନଜଭୁର ପୌରପାଳିକାକୁ ମୃତଦେହ ହସ୍ତାନ୍ତର କରି ଦେଇଥିଲା। ପୌର କାର୍ଯ୍ୟାଳୟ ପକ୍ଷରୁ କିଛି ମେହେନ୍ତରଙ୍କୁ ଉକ୍ତ ଶବର ସତ୍କାର ନିମନ୍ତେ ଦାୟିତ୍ୱ ପ୍ରଦାନ କରାଗଲା। ମେହେନ୍ତରମାନେ ଉକ୍ତ ମୃତଦେହକୁ ଏକ କନାରେ ବାନ୍ଧି ଆବର୍ଜନା ଗାଡ଼ିରେ ଲଦି ଦେଇଥିଲେ। ଫଳରେ ଆବର୍ଜନା ଓ ମୃତଦେହ ଏକତ୍ରିତ ଶ୍ମାଶାନ ଅଭିମୁଖେ ଯାତ୍ରା କରିଥିଲା। ଘଟଣାକୁ ନେଇ ସୋସିଆଲ ମିଡିଆରେ ତୀବ୍ର ପ୍ରତ୍ରିକ୍ରିୟା ପ୍ରକାଶ ପାଇଛି। ନିଃସହାୟ ମହିଳାଙ୍କ ଅନ୍ତିମ ସଂସ୍କାର ନିମନ୍ତେ ପୌରପାଳିକା ଅନ୍ତତଃପକ୍ଷେ ଏକ ଆମ୍ବୁଲାନ୍ସ ଯୋଗାଇ ଦେବା ଉଚିତ ଥିଲା ବୋଲି ସାଧାରଣରେ ଅଭିଯୋଗ ହୋଇଛି। ପୂର୍ବରୁ କର୍ଣ୍ଣାଟକରେ ମଧ୍ୟ ଜଣେ ସାମ୍ବାଦିକଙ୍କ ଦୁର୍ଘଟଣାରେ ମୃତ୍ୟୁ ପରେ ସ୍ଥାନୀୟ ପୁଲିସ ଏକ ଆବର୍ଜନା ଗାଡ଼ିରେ ତାଙ୍କ ମୃତଦେହ ବୋହିବା ଘଟଣା ସୋସିଆଲ ମିଡିଆରେ ସମାଲୋଚିତ ହୋଇଥିଲା।
