ତାଲିବାନ ସହିତ ଶାନ୍ତି ଆଲୋଚନା କରିବ ଭାରତ

0

ନୂଆଦିଲ୍ଲୀ: ଆଫ୍‍ଗାନିସ୍ତାନରେ ଶାନ୍ତି ପ୍ରତିଷ୍ଠା ପାଇଁ ଭାରତ ଆତଙ୍କବାଦୀ ସଂଗଠନ ତାଲିବାନ ସହିତ ଆଲୋଚନା କରିବ। ଅନୌପଚାରିକ ଭାବେ ଏହି ଆଲୋଚନା ହେବ ବୋଲି ଭାରତର ବୈଦେଶିକ ମନ୍ତ୍ରାଳୟ ପକ୍ଷରୁ କୁହାଯାଇଛି।
ରୁଷ ନେତୃତ୍ୱରେ ଶାନ୍ତି ଆଲୋଚନା ପାଇଁ ଶୁକ୍ରବାର ମସ୍କୋଠାରେ ଏକ ଶିଖର ବୈଠକ ଅନୁଷ୍ଠିତ ହେବାକୁ ଯାଉଛି। ଏଥିପାଇଁ ଭାରତ, ଆମେରିକା, ଚୀନ୍‍, ଆଫ୍‍ଗାନିସ୍ତାନ, ପାକିସ୍ତାନ, ଇରାନ୍‍, କାଜାଖସ୍ତାନ, କିରଗିଜସ୍ତାନ, ତାଜିକିସ୍ତାନ, ତୁର୍କମେନିସ୍ତାନ ଓ ଉଜବେକିସ୍ତାନ ସମେତ ତାଲିବାନ୍‍କୁ ମଧ୍ୟ ରୁଷ ନିମନ୍ତ୍ରଣ କରିଛି। ବିଶ୍ୱ ଇତିହାସରେ ପ୍ରଥମ ଥର ପାଇଁ ଏଭଳି ବୈଠକ ଅନୁଷ୍ଠିତ ହେବାକୁ ଯାଉଛି।
ଭାରତର ବୈଦେଶିକ ମନ୍ତ୍ରାଳୟ ମୁଖପାତ୍ର ରବୀଶ କୁମାରଙ୍କ ସୂଚନା ଅନୁଯାୟୀ, ଭାରତ କେବଳ ଅନୌପଚାରିକ ଭାବେ ଏହି ବୈଠକରେ ଯୋଗ ଦେବ। ଭାରତ ସବୁବେଳେ ଆଫ୍‍ଗାନିସ୍ତାନର ଶାନ୍ତି, ସୁରକ୍ଷା, ସ୍ଥିରତା ଓ ବିକାଶ ସପକ୍ଷରେ ମତ ରଖି ଆସିଛି। ଆଫ୍‍ଗାନିସ୍ତାନ ରାଷ୍ଟ୍ରପତି ଅସ୍‍ରଫ୍‍ ଘାନିଙ୍କ ଭାରତ ଗସ୍ତ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହିତ ବିକାଶ ଓ ଶାନ୍ତି ସଂକ୍ରାନ୍ତରେ ଆଲୋଚନା ହୋଇଥିଲା। ଆଫ୍‍ଗାନିସ୍ତାନ ସରକାର ନେତୃତ୍ୱରେ ଶାନ୍ତି ଓ ପ୍ରଗତି ପାଇଁ ନିଆଯାଉଥିବା ସମସ୍ତ ପଦକ୍ଷେପକୁ ଭାରତ ସମର୍ଥନ ଓ ସ୍ୱାଗତ କରିବ ବୋଲି ଶ୍ରୀ ମୋଦୀ କହିଥିଲେ। ଭାରତ ପକ୍ଷରୁ ଅମର ସିହ୍ନା ଓ ଟି ସିଏ ରାଘବନ୍‍ ଏଥିରେ ଯୋଗ ଦେବେ। ଏହି ଦୁଇ ଜଣ ଯଥାକ୍ରମେ ଆଫ୍‍ଗାନିସ୍ତାନ ଓ ପାକିସ୍ତାନରେ ଭାରତର ରାଷ୍ଟ୍ରଦୂତ ଭାବେ କାର୍ଯ୍ୟ କରିଛନ୍ତି। ରୁଷ ରାଷ୍ଟ୍ରପତି ଭ୍ଲାଦିମାର ପୁଟିନ୍‍ଙ୍କ ଗତ ଭାରତ ଗସ୍ତ ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହିତ ବୈଠକ ସମ୍ପର୍କର୍ରେ ଆଲୋଚନା ଓ ସହମତି ହୋଇଥିବା ଜଣାପଡ଼ିଛି।

Comments
Loading...