ଦ୍ବାରଶୁଣି ଘାଟିରେ ଆମ୍ବୁଲାନ୍ସ-ଟ୍ୟାଙ୍କର ମୁହାଁମୁହିଁ ଧକ୍କା; ରୋଗୀ ମୃତ, ୬ ଗୁରୁତର

କଳାବାଡିଆ: ମୟୂରଭଞ୍ଜ ଜିଲା ବାଙ୍ଗିରିପୋଷି ଥାନା ଅନ୍ତର୍ଗତ ଦ୍ବାରଶୁଣି ଘାଟିରେ ବୁଧବାର ଏକ ୧୦୮ ଆମ୍ବୁଲାନ୍ସ ଏବଂ ତେଲ ଟ୍ୟାଙ୍କର ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ଜଣେ ରୋଗୀଙ୍କ ମୃତ୍ୟୁ ଘଟିଛି। ଏଥିରେ ଅନ୍ୟ ୬ ଜଣ ଗୁରୁତର ଆହତ ହୋଇଥିବା ସୂଚନା ମିଳିଛି। ଆମ୍ବୁଲାନ୍ସଟି ରାଇରଙ୍ଗପୁରରୁ ରୋଗୀଙ୍କୁ ଧରି ବାରିପଦା ଆସୁଥିବାବେଳେ ଏହି ଦୁର୍ଘଟଣା ଘଟିଥିଲା।

ସୂଚନା ଅନୁସାରେ, ମୟୂରଭଞ୍ଜ ଜିଲା ଗୋରୁମହିସାଣି ଥାନା ଅନ୍ତର୍ଗତ କୁଲଡିହା ଗ୍ରାମର ବୁଧୁ ମୁଣ୍ଡା(55)ଙ୍କ ଦେହ ଅସୁସ୍ଥ ହେବାରୁ ମଙ୍ଗଳବାର ତାଙ୍କୁ ରାଇରଙ୍ଗପୁର ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେଠାରେ ତାଙ୍କର ଚିକିତ୍ସା ଚାଲିଥିଲା। ତେବେ ଶରୀର ଅଧିକ ଅସୁସ୍ଥ ହେବାରୁ ଡାକ୍ତର ତାଙ୍କୁ ବାରିପଦା ମେଡିକାଲକୁ ରେଫର କରିଥିଲେ। ବୁଧୁଙ୍କ ପୁଅ ଶମ୍ଭୁନାଥ(୨୫) ବୁଧବାର ବାପାଙ୍କୁ ୧୦୮ ଆମ୍ବୁଲାନ୍ସରେ ବାରିପଦା ନେଉଥିଲେ। ସାଥୀରେ ତାଙ୍କ ମା’ ତଥା ବୁଧୁଙ୍କ ସ୍ତ୍ରୀ ସୁମିତା, ବୁଧୁଙ୍କ ସାନ ଭାଇ ଶୁରୁ ମୁଣ୍ଡା ଥିଲେ।

ଆମ୍ବୁଲାନ୍ସଟି ଦ୍ବାରଶୁଣି ବଡଘାଟି ନିକଟରେ ହୋଇଥିବାବେଳେ ବିପରୀତ ଦିଗରୁ ଆସୁଥିବା ତେଲ ଟ୍ୟାଙ୍କର (ଏନଏଲ ୦୧ ଏଏ ୪୧୨୩) ସହିତ ମୁହାଁମୁହିଁ ଧକ୍କା ହୋଇଥିଲା। ଘଟଣାସ୍ଥଳରେ ବୁଧୁଙ୍କ ମୃତ୍ୟୁ ଘଟିଥିବାବେଳେ ପରିବାରର ଅନ୍ୟ ୩ ଜଣଙ୍କ ସହିତ ୧୦୮ ଆମ୍ବୁଲାନ୍ସ ଫାର୍ମାସିଷ୍ଟ ଯତୀନ୍ଦ୍ର ମହାନ୍ତ (35) ଏବଂ ଡ୍ରାଇଭର ଅନୁପ ମାଝି ଓ ଅନ୍ୟ ଜଣେ ବ୍ୟକ୍ତି ଗୁରୁତର ଆହତ ହୋଇଥିଲେ। ଦୁର୍ଘଟଣା ପରେ ଟ୍ୟାଙ୍କର ଡ୍ରାଇଭର ଏବଂ ହେଲ୍‌ପର ଘଟଣାସ୍ଥଳୁ ଫେରାର ହୋଇଯାଇଥିଲେ।

ଖବର ପାଇ ସ୍ଥାନୀୟ ପୁଲିସ ଏବଂ ଅଗ୍ନିଶମ କେନ୍ଦ୍ର କର୍ମଚାରୀ ଘଟଣାସ୍ଥଳରେ ପହଞ୍ଚି ୩ଟି ଆମ୍ବୁଲାନ୍ସ ଯୋଗେ ଆହତମାନଙ୍କୁ ବାରିପଦାସ୍ଥିତ ପଣ୍ଡିତ ରଘୁନାଥ ମୁର୍ମୁ ମେଡିକାଲକୁ ପଠାଇଥିଲେ। ଖବରରୁ ଜଣାପଡିଛି ଯେ, ଦୁର୍ଘଟଣା ସ୍ଥଳରେ ଏକ ଟାଭେରା ମଧ୍ୟ ଦୁର୍ଘଟଣାଗ୍ରସ୍ତ ହୋଇ ଫେରାର ହୋଇଯାଇଛି।

Comments
Loading...