ଆଇପିଏଲର ପ୍ରାୟୋଜକ ହୋଇପାରେ ପତଞ୍ଜଳି

ନୂଆଦିଲ୍ଲୀ: ଇଣ୍ଡିଆନ ପ୍ରିମିୟର ଲିଗ୍‌(ଆଇପିଏଲ) ଟାଇଟଲ ପ୍ରାୟୋଜକ ଦୌଡ଼ରେ ସାମିଲ ହୋଇଛି ସ୍ବଦେଶୀ କମ୍ପାନୀ। ବାବା ରାମଦେବଙ୍କ ପତଞ୍ଜଳି କମ୍ପାନୀ ଆଇପିଏଲ ସ୍ପନସରଶିପ୍‌ ନେବାକୁ ଆଗ୍ରହ ଦେଖାଇଛି। ସ୍ପନସରଶିପ୍‌ ଲାଗି କମ୍ପାନୀ ପକ୍ଷରୁ ଆଗ୍ରଦ ପ୍ରକାଶ କରାଯାଇଥିବା ନେଇ ପତଞ୍ଜଳି ସ୍ପଷ୍ଟ କରିଛି। କିନ୍ତୁ କାହାକୁ ସ୍ପନସରଶିପ୍‌ ମିଳିବ ତାହା ସ୍ପଷ୍ଟ ହୋଇନାହିଁ।

ନିକଟ ଅତୀତରେ ବିସିସିଆଇ ଚାଇନିଜ୍‌ ମୋବାଇଲ୍‌ କମ୍ପାନୀ ଭିଭୋ ସହିତ ଚୁକ୍ତି ରଦ୍ଦ କରିଦେଇଥିଲା। ଏହା ପରେ ବିଭିନ୍ନ କମ୍ପାନୀଗୁଡ଼ିକ ସହିତ ଯୋଗଗୁରୁ ବାବା ରାମଦେବଙ୍କ ପତଞ୍ଜଳି କମ୍ପାନୀ ବି ପ୍ରାୟୋଜକ ଦୌଡ଼ରେ ସାମିଲ ହୋଇଛି।  ପତଞ୍ଜଳିର ମୁଖପାତ୍ର ଏସ. କେ. ତିଜାରାୱାଲା କହିଛନ୍ତି ଯେ, ଆମେ ଚଳିତବର୍ଷ ଆଇପିଏଲର ଟାଇଟଲ ସ୍ପନସରଶିପ୍‌ ନେବାକୁ ବିଚାର କରୁଛୁ। ଆମେ ପତଞ୍ଜଳି ବ୍ରାଣ୍ଡକୁ ବିଶ୍ଵସ୍ତରକୁ ନେବାକୁ ଚାହୁଁଛୁ। ଏଥିପାଇଁ ଆଇପିଏଲ ଲିଗ୍‌ ଉପଯୁକ୍ତ ମଞ୍ଚ। ତେଣୁ ସେ ଏଥିପାଇଁ ବିସିସିଆଇକୁ ଏକ ପ୍ରସ୍ତାବ ପଠାଇବାକୁ ପ୍ରସ୍ତୁତି ଚଳାଇଛନ୍ତି।

ତଥ୍ୟ ଅନୁସାରେ ଏକ ଚାଇନିଜ୍‌ କମ୍ପାନୀର ବିକଳ୍ପ ଭାବେ ଗୋଟିଏ ଜାତୀୟ ବ୍ରାଣ୍ଡ ଭାବେ ପତଞ୍ଜଳି ବହୁତ ମଜଭୁତ ସ୍ଥିତିରେ ରହିଛି। କିନ୍ତୁ ଏହା ବି କୁହାଯାଉଛି ଯେ ଏକ ବହୁରାଷ୍ଟ୍ରୀୟ ବ୍ରାଣ୍ଡ ହିସାବରେ ପତଞ୍ଜଳିର କ୍ଷମତା ଅନ୍ୟ ବ୍ରାଣ୍ଡ ତୁଳନାରେ କମ୍‌ ରହିଛି।

ସୂଚନାଯୋଗ୍ୟ, ଚଳିତବର୍ଷ ୟୁଏଇରେ ଆଇପିଏଲ ଟୁର୍ଣ୍ଣାମେଣ୍ଟ ଖେଳାଯିବ। ପ୍ରାରମ୍ଭିକ ସ୍ତରରେ କେତେକ ମ୍ୟାଚରେ ଦର୍ଶକ ରହିବେ ନାହିଁ। କିନ୍ତୁ ଗଣମାଧ୍ୟମରେ ଏହାର ଜୋରଦାର ପ୍ରଚାର କରାଯିବ। ବିସିସିଆଇ ଭିଭୋ ସହିତ ସମ୍ପର୍କ ତୁଟାଇବା ପରେ ନୂଆ ପ୍ରାୟୋଜକ ପାଇଁ ଟେଣ୍ଡର ଆହ୍ବାନ କରିନାହିଁ।

Comments are closed.